ഇംഫാൽ: ഗവർണർ മാപ്പുപറയണമെന്നാവശ്യപ്പെട്ട് മണിപ്പൂരിലെ മെയ്തി വിഭാഗക്കാർ നടത്തുന്ന സമരം ശക്തമാവുന്നു. ഇന്നലെ നൂറിലധികം വരുന്ന സമരക്കാർ സംസ്ഥാന തെരഞ്ഞെടുപ്പ് കമ്മിഷൻ ഓഫിസിന് പൂട്ടിട്ടു. കേന്ദ്ര സർക്കാറിന്റെ ഓഫിസുകൾ നാളെ മുതൽ പ്രവർത്തിക്കാൻ അനുവദിക്കില്ലെന്ന് സംയുക്ത സമരസമിതി വ്യക്തമാക്കി. രാഷ്ട്രപതി ഭരണം പിൻവലിക്കണമെന്നും സർക്കാർ ബസിന്റെ പേരിൽ നിന്ന് മണിപ്പൂർ മായ്ച്ചുകളഞ്ഞതിൽ ഗവർണർ മാപ്പ് പറയണമെന്നും അവർ ആവശ്യപ്പെട്ടു.

ഇതേ ആവശ്യം ഉന്നയിച്ചുകൊണ്ട് പ്രബല വനിതാ സംഘടനയായ മെയ്രാ പെയ്ബീസിന്റെ നേതൃത്വത്തിൽ കഴിഞ്ഞ ദിവസം രാത്രി തീപ്പന്തമേന്തി പ്രകടനം നടത്തി. ഇന്നലെ നൂറുകണക്കിന് സ്ത്രീകളാണ് ഗവർണറുടെ രാജി ആവശ്യപ്പെട്ട് തെരുവിലിറങ്ങിയത്. മണിപ്പൂരിലെ ജനപ്രതിനിധികൾ എം.എൽ.എ സ്ഥാനം രാജിവയ്ക്കണമെന്നാവശ്യപ്പെട്ട് മെയ്തി സംഘടനകൾ സർക്കാറിന് പരാതി നൽകി. ഇതിനിടെ സംസ്ഥാനത്ത് രാഷ്ട്രപതി ഭരണം തികഞ്ഞ പരാജയമാണെന്ന് സംസ്ഥാന കോൺഗ്രസ് നേതൃത്വം പറഞ്ഞു. ക്രമസമാധാന നില തകർന്നതായും സംസ്ഥാനത്ത് തെരഞ്ഞെടുപ്പ് നടത്തണമെന്നും അവർ ആവശ്യപ്പെട്ടു.