ദുബൈ: ടെലികോം അടിസ്ഥാന സൗകര്യങ്ങളില്‍ ലോകരാജ്യങ്ങളില്‍ യുഎഇ ഒന്നാമത്. 'സ്റ്റേറ്റ് ഓഫ് ഡിജിറ്റല്‍ ട്രാന്‍സ്‌ഫോര്‍മേഷന്‍ റിപ്പോര്‍ട്ടിന്റെ' രണ്ടാം പതിപ്പിലാണ് യുഎഇ ഒന്നാമതെത്തിയത്.

ടെലികമ്മ്യൂണിക്കേഷന്‍ ഇന്‍ഫ്രാസ്ട്രക്ചര്‍ സൂചിക, ഡിജിറ്റല്‍ ഗവണ്‍മെന്റിനായുള്ള സ്ഥാപന ചട്ടക്കൂട്, ഡിജിറ്റല്‍ ഉള്ളടക്ക സൂചിക എന്നിവയില്‍ യുഎഇ ഒന്നാം സ്ഥാനം നേടി. 

സമ്പദ്‌വ്യവസ്ഥ, ധനകാര്യം, മാനവ വിഭവശേഷി, ആരോഗ്യം, വിദ്യാഭ്യാസം, സാമൂഹിക വികസനം, സംസ്‌കാരം, യുവജനത, കുടിയേറ്റം, വിദേശകാര്യം, സുരക്ഷ, നീതി, അടിസ്ഥാന സൗകര്യങ്ങളും ഊര്‍ജ്ജവും, ലോജിസ്റ്റിക്‌സ്, പരിസ്ഥിതി എന്നിവയുള്‍പ്പെടെ 12 പ്രധാന മേഖലകളിലായി യുഎഇ സര്‍ക്കാരിന്റെ ഡിജിറ്റല്‍ നേട്ടങ്ങള്‍ റിപ്പോര്‍ട്ട് എടുത്തുകാണിക്കുന്നു.

ഡിജിറ്റല്‍ സന്നദ്ധതയും പരിവര്‍ത്തനവും യുഎഇ നേതൃത്വത്തിന്റെ ദര്‍ശനത്തിന്റെ കേന്ദ്രബിന്ദുവാണെന്നും സാങ്കേതികവിദ്യയിലൂടെ ജീവിത നിലവാരം ഉയര്‍ത്തുകയെന്നത് രാജ്യത്തിന്റെ ലക്ഷ്യമാണെന്നും യുഎഇ ഡെവല്പമെന്റ് ആന്റ് ഫ്യൂച്ചര്‍ സഹമന്ത്രി ഒഹൂദ് ബിന്ത് ഖല്‍ഫാന്‍ അല്‍ റൂമി പറഞ്ഞു.

ഡിജിറ്റല്‍ ഭരണവുമായി ബന്ധപ്പെട്ട ആഗോള മത്സരക്ഷമത സൂചികകളില്‍ യുഎഇയുടെ കഴിഞ്ഞ വര്‍ഷത്തെ പ്രധാന ഡിജിറ്റല്‍ നേട്ടങ്ങള്‍ റിപ്പോര്‍ട്ട് രേഖപ്പെടുത്തുന്നുണ്ടെന്ന് അവര്‍ അഭിപ്രായപ്പെട്ടു. ദേശീയ ഡിജിറ്റല്‍ ലക്ഷ്യങ്ങള്‍ കൈവരിക്കുന്നതിനുള്ള കൂടുതല്‍ ശ്രമങ്ങളെ പ്രോത്സാഹിപ്പിക്കുക എന്നതാണ് ഇതിന്റെ ലക്ഷ്യം.

ടെലികമ്മ്യൂണിക്കേഷന്‍ ഇന്‍ഫ്രാസ്ട്രക്ചര്‍, ഡിജിറ്റല്‍ ഗവണ്‍മെന്റ് ചട്ടക്കൂട്, ഡിജിറ്റല്‍ ഉള്ളടക്കം, ഡിജിറ്റല്‍ പരിജ്ഞാനം എന്നിവയില്‍ യുഎന്‍ സൂചികകളില്‍ ആഗോളതലത്തില്‍ യുഎഇ ഒന്നാം സ്ഥാനത്തെത്തിയെന്ന് റിപ്പോര്‍ട്ട് പറയുന്നു.

ഓക്‌സ്‌ഫോര്‍ഡ് ഇന്‍സൈറ്റ്‌സിന്റെ ആഗോള 'ഗവണ്‍മെന്റ് എഐ റെഡിനസ് ഇന്‍ഡക്‌സ് 2024'ലും യുഎഇ ഒന്നാമതെത്തി. ലോകബാങ്കിന്റെ കണക്കനുസരിച്ച് ഗവണ്‍മെന്റ് മെച്യൂരിറ്റി സൂചികയില്‍ നാലാം സ്ഥാനത്തും എത്തി. ഐഎംഡിയുടെ ഡിജിറ്റല്‍ മത്സരക്ഷമതാ സൂചികയിലും യുഎന്‍ ഇഗവണ്‍മെന്റ് വികസന സൂചികയിലും രാജ്യം പതിനൊന്നാം സ്ഥാനത്തെത്തി.

2024ല്‍ മാത്രം യുഎഇ ഫെഡറല്‍ ഗവണ്‍മെന്റ് സ്ഥാപനങ്ങള്‍ 173.7 ദശലക്ഷം ഡിജിറ്റല്‍ ഇടപാടുകളാണ് നടത്തിയത്. ഫെഡറല്‍ വെബ്‌സൈറ്റുകള്‍ 131.5 ദശലക്ഷം ആളുകളാണ് വിസിറ്റ് ചെയ്തത്. 

The UAE has secured the top global ranking in telecom infrastructure, highlighting its advanced connectivity, 5G deployment, and digital transformation leadership.