മ്യൂണിക്ക്:  യുവേഫ ചാംപ്യൻസ് ലീഗിൽ ഇന്ന് തുല്യ ശക്തികളുടെ കലാശപോര്. ഫ്രാൻസിലെ കരുത്തരായ പാരിസ് സെന്റ് ജെർമെയ്ൻ ഇറ്റാലിയൻ മാന്ത്രികരായ ഇന്റർ മിലാനെയാണ് നേരിടുന്നത്. മ്യൂണിക്കിലെ അലയൻസ് അരീനയിലാണ് ഫൈനൽ പോരാട്ടം നടക്കുന്നത്. യൂറോപ്പിലെ മികച്ച ടീമെന്ന കരുത്തുമായിട്ടാണ് പി.എസ്.ജി പോരാട്ടത്തിന് ഇറങ്ങുന്നത്. എന്നാൽ സീസണിന്റെ തുടക്കത്തിലെ മികച്ച ഫോമിൽ നിന്ന് പിന്നോക്കം പോയിരിക്കുകയാണ് ഇന്റർ. സീരീ എയിൽ നാപ്പോളിയോട് ഒരു പോയിന്റിന് ടീമിന് കിരീടം നഷ്ടമാവുകയും ചെയ്തു. കോപ്പാ ഇറ്റാലിയയിൽ അതുപോലെ സെമി ഫൈനലിൽ ടീം പുറത്താവുകയും ചെയ്തു. 
ലോട്ടാരോ മാർട്ടിനസിന്റെ ടീമിന് ചാംപ്യൻസ് ലീഗ് കിരീടത്തിൽ മാത്രമാണ് ഇനി ആശ്വാസം കണ്ടെത്താനാവുക. എന്നാൽ കാര്യങ്ങൾ അവർക്ക് ഒട്ടും അനുകൂലമല്ല. പരുക്ക് അടക്കമുള്ള കാര്യങ്ങൾ ടീമിനെ വലയ്ക്കുന്നുണ്ട്. ബാഴ്‌സലോണയെ വീഴ്ത്തിയാണ് ഇന്റർ കലാശപ്പോരിന് യോഗ്യത നേടിയത്. ചാംപ്യൻസ് ലീഗിൽ ഇരു ടീമുകളും ഒരുമിച്ച് പോരാടുന്നതും ആദ്യമായിട്ടാണ്. അതേസമയം ഇന്റർ അവസാനം കിരീടം നേടിയത് 2010ലാണ്. 2023ൽ മാഞ്ചസ്റ്റർ സിറ്റിയോട് ടീം പരാജയപ്പെട്ടിരുന്നു. പരുക്കാണ് ഇന്ററിനെ അലട്ടുന്ന മറ്റൊരു കാര്യം. വാലന്റിൻ കാർബോനി മത്സരിക്കുന്ന കാര്യം സംശയത്തിലാണ്. സിലെൻസ്‌കി, ബെഞ്ചമിൻ പവാർഡ് എന്നിവരും കളിച്ചേക്കില്ല. 

പി.എസ്.ജിക്ക്  പക്ഷേ അത്തരം പ്രശ്‌നങ്ങളൊന്നുമില്ല. ടീം എല്ലാ അർഥത്തിലും സജ്ജമാണ്. ഉസ്മാൻ ഡെമ്പലെയാണ് ടീമിന്റെ കരുത്ത്. നുനോ മെൻഡിസ്, വിറ്റീഞ്ഞ, ഫാബിയാൻ റൂയിസ് എന്നിവരും ടീമിന് കരുത്തേകുന്നു. പരുക്കുകൾ ഇല്ലാതെ മികച്ച ഫോമിൽ കളിക്കുന്ന പി.എസ്.ജി ഇത്തവണ കിരീടത്തിൽ കുറഞ്ഞതൊന്നും ലക്ഷ്യമിടുന്നില്ല. അതുകൊണ്ട് ഇന്ററിന് കടുത്ത മത്സരം നേരിടേണ്ടി വരും.