ഉള്ളി മലയാളികളുടെ പ്രിയപ്പെട്ടവയാണ്. നമ്മുടെ അടുക്കളയില്‍ നിത്യവും ഉണ്ടാകും സവാളയും ചെറിയുള്ളിയുമൊക്കെ. സംഗതി നമ്മളെ കരയിപ്പിക്കുമെങ്കിലും ഇവയില്ലാതെ മലയാളിക്ക് കറികളില്ല. കറികള്‍ക്ക് രുചി കൂട്ടാനും വെറുതെ വഴറ്റിയെടുത്ത് കഴിക്കാനും കനം കുറച്ചരിഞ്ഞ് എണ്ണയില്‍ വറുത്തെടുക്കുന്ന സവാള ബിരിയാണിയുടെ മുകളില്‍ വിതറുന്നത് ബിരിയാണിയുടെ മണവും രുചിയും വര്‍ധിപ്പിക്കുന്നതാണ്. മാത്രമല്ല ബിരിയാണിയുടെയും കോഴിക്കറിയുടെയുമൊക്കെ പ്രധാന ചേരുവ കൂടിയാണ് ഉള്ളി. 

ചമ്മന്തിക്കും കറി വറവിടാനും ചെറിയുള്ളിയാണ് കൂടുതല്‍ പേരും ഉപയോഗിക്കുക. ഇരുവരും അല്ലിയം എന്ന ഗണത്തില്‍ പെട്ടതാണെങ്കിലും സവാളയുടെയും ചെറിയുള്ളിയുടെയും ഗുണത്തിലും രുചിയിലും കുറച്ച് വ്യത്യാസങ്ങളുണ്ട്. അവ എന്താണെന്നു നോക്കാം. 

സവാള പല നിറത്തില്‍ ലഭ്യമാണ്. അവയില്‍ ഉരുണ്ടതും വലുപ്പം കൂടിയതുമുണ്ട്. യെല്ലോ ഒനിയന്‍, റെഡ് ഒനിയന്‍, വൈറ്റ് ഒനിയന്‍ എന്നിങ്ങനെ പല തരത്തിലാണ് സവാളയുള്ളത്. ഷാലറ്റ് എന്നാണ് ചെറിയുള്ളി അറിയപ്പെടുന്നത്. സവാളയെ അപേക്ഷിച്ച് ചെറിയുള്ളി വലിപ്പത്തില്‍ ചെറുതും കട്ടി കുറവുമാണ്. കൂടാതെ ഇവയ്ക്ക് നേരിയ തോതില്‍ മധുരവുമുണ്ട്.  ഒരു വിത്തില്‍ നിന്നു തന്നെ മൂന്നും നാലും അല്ലി ചെറിയുള്ളി കിട്ടുന്നതുമാണ്.

പോഷകമൂല്യം

ചെറിയുള്ളിയെക്കാള്‍ സവാളയില്‍ കലോറി കുറവാണ്. 100 ഗ്രാം സവാളയില്‍ 40 കലോറിയാണ് ഏകദേശം ഉള്ളത്. ചെറിയുള്ളില്‍ ആണെങ്കിലോ 72 കലോറിയുമുണ്ട്. എന്നാല്‍, സവാളയെക്കാള്‍ നാരുകള്‍ അടങ്ങിയിരിക്കുന്നത് ചെറിയുള്ളിയിലാണ്. ഇത് ദഹനത്തിന് വളരെ നല്ലതാണ്.

ഇവ രണ്ടിലും ധാരാളം വിറ്റാമിനും ധാതുക്കളും അടങ്ങിയിട്ടുണ്ടെങ്കിലും ചെറിയുള്ളിയാണ് മുന്നില്‍ നില്‍ക്കുന്നത്. ചെറിയുള്ളിയില്‍ 8.4 മില്ലി ഗ്രാം വിറ്റാമിന്‍ സിയാണ് അടങ്ങിയിട്ടുള്ളത്. സവാളയില്‍ അതിന്റെ അളവ് 7.4 മില്ലി ഗ്രാം ആണ്. ഇവ രണ്ടിലും ആന്റിഓക്‌സിഡന്റുകളും ധാരാളമായി അടങ്ങിയിട്ടുണ്ട്. കൂടാതെ ചെറിയുള്ളിയില്‍ വിറ്റാമിന്‍ ബി6, മാംഗനീസ്, കോപ്പര്‍, ഫോളേറ്റ് എന്നിവയും ധാരാളമുണ്ട്.

ഉള്ളി അരിഞ്ഞാല്‍ കണ്ണെരിയുന്നതിന്റെ കാരണം

 ഉള്ളിയുടെ പ്രതിരോധ സംവിധാനമാണിത്. നശിപ്പിക്കാതിരിക്കാന്‍. മണ്ണിനടിയില്‍ വളരുന്നതു കൊണ്ട് തന്നെ ധാരാളം കീടങ്ങളും ജീവികളും ഉള്ളിയെ നശിപ്പിക്കാനുള്ള സാധ്യതയുണ്ട്. അങ്ങനെ വരുമ്പോള്‍ ഉള്ളി തൊലിയില്‍ നിന്ന് 'സിന്‍ പ്രൊപ്പനേത്തിയന്‍ എസ് ഓക്‌സൈഡ്' എന്ന ഒരു സംയുക്തം പുറപ്പെടുവിക്കും.

ഇത് കണ്ണിലെ ജലപാളിയുമായി സമ്പര്‍ക്കപ്പെടുമ്പോള്‍ നേരിയ തരത്തില്‍ സള്‍ഫ്യൂരിക് ആസിഡ് ഉണ്ടാകുന്നു. ഇതാണ് കണ്ണ് എരിയാന്‍ കാരണമാകുന്നത്.