ആരോഗ്യം സംരക്ഷിക്കാനായി കൂടുതല്‍ പേരും ചെയ്യുന്നത് ജ്യൂസ് ഉണ്ടാക്കി കുടിക്കുക എന്നതാണ്. ജ്യൂസുകള്‍ കുടിക്കുന്നത് ആരോഗ്യകരമാണെങ്കിലും ഇത് ആരോഗ്യ പ്രശ്‌നങ്ങള്‍ക്കും കാരണമാകുന്നതായി പഠനങ്ങള്‍ പറയുന്നുണ്ട്. എന്നാല്‍ ജ്യൂസുകളില്‍ ചേര്‍ത്തുന്ന അമിതമായി മധുരം ടൈപ്പ്-2 പ്രമേഹ സാധ്യത വര്‍ധിപ്പിക്കുമെന്നാണ് അടുത്തിടെ നടത്തിയ ഒരു പഠനം സൂചിപ്പിക്കുന്നത്.

ജ്യൂസുകള്‍ പോഷകസമൃദ്ധമാണെന്നതില്‍ സംശയമൊന്നുമില്ല. എന്നാലും അവയില്‍ നാരുകള്‍ കുറവാണ്. മാത്രമല്ല, അവയില്‍ പ്രകൃതിദത്ത പഞ്ചസാരയും കൂടുതലാണെന്നാണ് പഠനത്തില്‍ പറയുന്നത്. ബ്രിഗാം യങ് യൂണിവേഴ്‌സിറ്റി (BYU) യിലെയും ജര്‍മ്മന്‍ സ്ഥാപനങ്ങളിലെയും ഗവേഷകര്‍ വിവിധ രാജ്യങ്ങളിലായി 500,000ത്തിലധികം വ്യക്തികളില്‍ നിന്നുള്ള ഡാറ്റ പരിശോധിച്ചിരുന്നു.

ദിവസവും 230 മില്ലി ഫ്രൂട്ട് ജ്യൂസ് കുടിക്കുമ്പോള്‍ ടൈപ്പ്-2 പ്രമേഹം വരാനുള്ള സാധ്യത 5% വര്‍ധിക്കുന്നതായ കണ്ടെത്തലുകളാണ് വെളിപ്പെടുത്തിയത്. സോഡ പോലുള്ള പഞ്ചസാര ചേര്‍ത്ത മധുരമുള്ള പാനീയങ്ങള്‍ 350 മില്ലി കുടിക്കുമ്പോള്‍ ടൈപ്പ് -2 പ്രമേഹ സാധ്യത 25 ശതമാനം വര്‍ധിക്കുന്നതായും കണ്ടെത്തി.

പഴങ്ങളും പാലുല്‍പ്പന്നങ്ങളും വഴി കഴിക്കുന്ന പ്രകൃതിദത്ത പഞ്ചസാര പ്രമേഹ സാധ്യത കുറയ്ക്കുന്നതുമായി ബന്ധപ്പെട്ടിരിക്കുന്നവയാണ്. പഴച്ചാറുകളില്‍ ഉയര്‍ന്ന അളവില്‍ പഞ്ചസാര അടങ്ങിയിട്ടുണ്ട്. 100% പഴച്ചാറില്‍ പോലും പ്രകൃതിദത്ത പഞ്ചസാര അടങ്ങിയിട്ടുണ്ട്. ഇത് രക്തത്തിലെ പഞ്ചസാരയുടെ അളവ് വര്‍ധിപ്പിക്കുന്നതിന് കാരണമാകും.

 അമിതമായി പഞ്ചസാര കഴിക്കുന്നത് പ്രമേഹ സാധ്യത വര്‍ധിപ്പിക്കുക മാത്രമല്ല, വണ്ണം വയ്ക്കാനും കാരണമാകുന്നു. ഇത് വിട്ടുമാറാത്ത നിരവധി രോഗങ്ങളുടെ സാധ്യതയാണ് കൂട്ടുന്നത്. പായ്ക്ക് ചെയ്ത പഴച്ചാറുകളില്‍ പഞ്ചസാരയും പ്രിസര്‍വേറ്റിവുകളും ധാരാളമായി അടങ്ങിയിട്ടുണ്ട്.

പഴങ്ങളിലും പച്ചക്കറികളിലും നാരുകള്‍ ഒരു പ്രധാന ഘടകം തന്നെയാണ്. ഇത് ദഹനത്തെ സഹായിക്കുകയും കൂടുതല്‍ നേരം വയര്‍ നിറഞ്ഞതായി നിലനിര്‍ത്തുകയും ചെയ്യുന്നു. ജ്യൂസുകളിലാണെങ്കില്‍ നാരുകള്‍ കുറവായതു കാരണം ഇത് പകല്‍ സമയത്ത് അമിതമായി ഭക്ഷണം കഴിക്കാനുള്ള സാധ്യത കൂട്ടുന്നു.

ദ്രാവകരൂപത്തിലുള്ള പഞ്ചസാര രക്തപ്രവാഹത്തിലേക്ക് വേഗത്തില്‍ കുതിച്ചുയരുകയും രക്തത്തിലെ പഞ്ചസാരയുടെ അളവ് കൂടാനും കാരണമാവുന്നു. ഇത് ഇന്‍സുലിന്‍ സംവേദനക്ഷമതയെ തടസ്സപ്പെടുത്തുന്നതിലൂടെ പ്രമേഹ സാധ്യത വര്‍ധിപ്പിക്കുന്നതാണ്.