ലഖ്‌നൗ: ഉത്തര്‍പ്രദേശിലെ അലിഗഡില്‍ ഗോരക്ഷാഗുണ്ടകള്‍ തല്ലിച്ചതച്ച നാലുയുവാക്കള്‍ക്കെതിരേ ചുമത്തിയ കേസുകള്‍ പിന്‍വലിക്കാതെ പൊലിസ്. ഇരകള്‍ സഞ്ചരിച്ച വാഹനത്തില്‍നിന്ന് കണ്ടെടുത്തത് പശുവിന്റെ മാംസമല്ലെന്ന് സ്ഥിരീകരിച്ചതിന് പിന്നാലെ ഇവര്‍ക്കെതിരേ ചുമത്തിയ ഗോഹത്യാനിരോധന നിയമത്തിലെ വകുപ്പ് നീക്കിയെങ്കിലും കേസ് റദ്ദാക്കില്ലെന്ന് പൊലിസ് അറിയിച്ചു. മാംസം കൊണ്ടുപോകാനുള്ള അനുമതിയിലോ മൃഗങ്ങളോടുള്ള ക്രൂരതയുമായി ബന്ധപ്പെട്ട നിയമത്തിലോ മറ്റ് പോരായ്മകള്‍ കണ്ടെത്തിയാല്‍ ബന്ധപ്പെട്ട വകുപ്പുകള്‍ എഫ്.ഐ.ആറില്‍ ചേര്‍ക്കുമെന്നും അലിഗഡ് പൊലിസ് സൂപ്രണ്ട് അമൃത് ജെയിന്‍ പറഞ്ഞു.

പ്രദേശത്തെ ഹിന്ദുത്വസംഘടനാ നേതാവിന്റെ പരാതിയില്‍ ഉത്തര്‍പ്രദേശ് ഗോവധ നിരോധന നിയമപ്രകാരം മറ്റൊരു എഫ്.ഐ.ആറുമാണ് ഇവര്‍ക്കെതിരേ രജിസ്റ്റര്‍ ചെയ്തത്. കണ്ടെടുത്തത് പശുമാംസം അല്ലെന്ന് വ്യക്തമായതോടെയാണ് ഗോവധനിരോധന വകുപ്പ് നീക്കിയത്. വാഹനത്തില്‍നിന്ന് കണ്ടെടുത്തത് എരുമമാംസം ആണെന്ന് ഫോറന്‍സിക് സയന്‍സ് ലബോറട്ടറിയില്‍ നടത്തിയ പരിശോധനയില്‍ സ്ഥിരീകരിച്ചതായി കഴിഞ്ഞദിവസം ഹര്‍ദുവാഗഞ്ച് പൊലിസ് സ്റ്റേഷനിലെ സ്റ്റേഷന്‍ ഹൗസ് ഓഫിസര്‍ പൊലിസ് ഇന്‍സ്‌പെക്ടര്‍ ധീരജ് കുമാര്‍ വ്യക്തമാക്കിയിട്ടുണ്ട്.

കഴിഞ്ഞമാസം 24നാണ് അലിഗഡിലെ അല്‍ഹദാദ്പൂര്‍ ഗ്രാമത്തിന് സമീപം പശു മാംസം കടത്തുന്നുവെന്ന് ആരോപിച്ച് ആഖില്‍ അഹമ്മദ് (43), അര്‍ബാജ് (38), മുഹമ്മദ് അഖീല്‍ (35), നദീം (32) എന്നിവരെ തീവ്ര ഹിന്ദുത്വസംഘാംഗങ്ങള്‍ ക്രൂരമായി തല്ലിച്ചതച്ചത്. മരത്തടിയും ഇരുമ്പുവടിയും ഉപയോഗിച്ചുള്ള ആക്രമണത്തില്‍ ഗുരുതരമായി പരുക്കേറ്റ ഇവര്‍ ഇപ്പോഴും ആശുപത്രിയിലാണ്. അക്രമികള്‍ ഇരകളുടെ വാഹനത്തിന് തീയിടുകയും അവരുടെ ഫോണുകളും പണവും മോഷ്ടിക്കുകയും ചെയ്യുകയുണ്ടായി. ഇതിനിടെയാണ് ഇരകള്‍ക്കെതിരായ എഫ്.ഐ.ആര്‍ റദ്ദാക്കില്ലെന്ന പൊലിസ് നിലപാടെടുത്തത്.

കേസില്‍ വിജയ് ഗുപ്ത (50), ഭാനു പ്രതാപ് (28), ലവ് കുഷ് (27), വിജയ് ബജ്രംഗി (23) എന്നിവരാണ് പിടിയിലായത്. ഭാരതീയ ന്യായ് സംഹിതയിലെ സെക്ഷന്‍ 191(2) (കലാപം), 191(3) (നിയമവിരുദ്ധമായി സംഘംചേരല്‍), 190 (ക്രിമിനല്‍ പ്രവൃത്തിക്കായി സംഘം ചേരല്‍), 109 (കൊലപാതകശ്രമം), 308 (കൊള്ളയടിക്കല്‍), 310(2) (കവര്‍ച്ച) എന്നീ വകുപ്പുകള്‍ പ്രകാരമാണ് ഇവര്‍ക്കെതിരായ കേസ്. സംഭവത്തില്‍ ആകെ 38 പ്രതികളാണുള്ളത്. 

Aligarh mob attack over beef; Police will not withdraw case against victims