തിരുവന്തപുരം: കേരളത്തില്‍ കോവിഡ് കേസുകള്‍ ഉയരുന്നതില്‍ ആശങ്ക വേണ്ടെന്ന് ആരോഗ്യ മന്ത്രി വീണാ ജോര്‍ജ്. കേരളം കൃത്യമായി കോവിഡ് കണക്കുകള്‍ റിപ്പോര്‍ട്ട് ചെയ്യുന്നതിനാലാണ് എണ്ണം വര്‍ധിക്കുന്നതെന്നും മന്ത്രി പറഞ്ഞു. പുതുതായി പടരുന്ന വൈറസിന് വ്യാപന ശേഷി കൂടുതലാണെങ്കിലും രോഗ തീവ്രത കുറവാണെന്നും മന്ത്രി വ്യക്തമാക്കി. 

''കോവിഡ് കേസുകള്‍ എപ്പോഴും കേരളത്തില്‍ കൂടുതല്‍ കാണുന്നത് നമ്മള്‍ ടെസ്റ്റ് ചെയ്യുന്നത് കൊണ്ടും, ആ കണക്ക് കൃത്യമായി രേഖപ്പെടുത്തുന്നത് കൊണ്ടുമാണ്. അതുകൊണ്ട് ആശങ്കപ്പെടേണ്ട സാഹചര്യമില്ല. ഇത് സംബന്ധിച്ച് വളരെ സൂക്ഷ്മമായ നിരീക്ഷണം നടത്തുന്നുണ്ട്. അധികം തീവ്രമാകാത്ത വകഭേദമാണെന്ന് തെളിഞ്ഞെങ്കിലും വ്യാപനശേഷി കൂടുതലാണ്,' മന്ത്രി പറഞ്ഞു. 

മറ്റ് രോഗങ്ങള്‍ ഉള്ളവര്‍ക്കാണ് വൈറസ് ഗുരുതരമാവുന്നത്. രോഗങ്ങള്‍ ഉള്ളവര്‍ നിര്‍ബന്ധമായും മാസ്‌ക് ധരിക്കണം. ഇവര്‍ പ്രത്യേക മുന്‍കരുതല്‍ എടുക്കണമെന്നും മന്ത്രി നിര്‍ദേശിച്ചു.

ALSO READ: പോരാട്ട ചിത്രം തെളിഞ്ഞു : പി.വി. അൻവർ, എം. സ്വരാജ് എന്നിവർ നാമനിർദേശ പത്രിക സമർപ്പിച്ചു Read more 

അതേസമയം കേരളത്തിലുള്‍പ്പെടെ ഇന്ത്യയൊട്ടാകെ കോവിഡ് കേസുകളില്‍ വന്‍ വര്‍ധനവാണ് റിപ്പോര്‍ട്ട് ചെയ്തിട്ടുള്ളത്. ഇന്ന് രാവിലെ വരെ രാജ്യത്ത് 3961 സജീവ കോവിഡ് കേസുകളാണുള്ളതെന്ന് കേന്ദ്ര ആരോഗ്യ മന്ത്രാലയം അറിയിച്ചു. 23 മണിക്കൂറിനിടെ 203 പേര്‍ക്ക് രോഗം സ്ഥിരീകരിച്ചു. നാല് മരണങ്ങളും റിപ്പോര്‍ട്ട് ചെയ്തിട്ടുണ്ട്. 

മേയ് 22ന് സജീവ കോവിഡ് കേസുകള്‍ 257 ആയിരുന്നു. പത്ത് ദിവസത്തിനിടെ ഇത് 15 മടങ്ങ് വര്‍ധിച്ചെന്നാണ് കണ്ടെത്തല്‍. കേരളത്തില്‍ നിലവില്‍ 1435 പേര്‍ കോവിഡ് ബാധിച്ച് ചികിത്സയിലുണ്ട്.

Kerala Health Minister Veena George stated that the increase in covid numbers is due to Kerala accurately reporting COVID data