കൊച്ചി: ലക്ഷദ്വീപ് നിവാസികൾക്ക് തിരിച്ചടിയായി കപ്പൽ ടിക്കറ്റ് നിരക്ക് കുത്തനെ വർധിപ്പിച്ചു. 40 ശതമാനത്തിലധികമാണ് കൊച്ചി - ലക്ഷദ്വീപ് റൂട്ടിൽ കൂട്ടിയത്. ഈ റൂട്ടിന് പുറമെ ലക്ഷദ്വീപിലെ വിവിധ ദ്വീപുകൾക്കിടയിലും കപ്പൽ നിരക്ക് വർധിപ്പിച്ചിട്ടുണ്ട്. ബലി പെരുന്നാൾ അടുത്തിരിക്കുന്ന സമയത്തെ വർധന ദ്വീപ് നിവാസികളെ ഏറെ പ്രയാസത്തിലാക്കും.

കൊച്ചിയിൽ നിന്ന് കവരത്തിലേക്കുള്ള ബങ്ക് സീറ്റിന്റെ നിരക്ക് 330 രൂപയിൽ നിന്ന് 470 രൂപയാക്കിയാണ് വർധിപ്പിച്ചത്. സെക്കൻഡ് ക്ലാസ് ടിക്കറ്റ് 1300 രൂപയിൽ നിന്ന്‌ 1820 ആയി. ഫസ്റ്റ് ക്ലാസിന്‌ 3510 രൂപ ഉണ്ടായിരുന്നത് 4920 രൂപയാക്കി വർധിപ്പിച്ചു. 

ആന്ത്രോത്ത് ദ്വീപിലേക്ക് ബങ്ക് ക്ലാസ് ടിക്കറ്റ്​ 260 രൂപയിൽ നിന്ന് 370 രൂപയാക്കി ഉയർത്തി. ഇതേ റൂട്ടിൽ സെക്കൻഡ്​ ക്ലാസ് ടിക്കറ്റിന് മുൻപ് 940 രൂപ ഉണ്ടായിരുന്നത് ഇപ്പോൾ​ 1320 രൂപയാക്കി വർധിപ്പിച്ചു. ഫസ്റ്റ്ക്ലാസ് ടിക്കറ്റിന് ഇനി 3600 രൂപയാക്കിയാണ് വർധിപ്പിച്ചത്. മുൻപ് ഇത് 2570 രൂപയായിരുന്നു.

ALSO READ: ഗസ്സയിൽ ഇതുവരെ 50,000-ത്തിലധികം കുട്ടികൾ കൊല്ലപ്പെടുകയോ പരിക്കേൽക്കുകയോ ചെയ്തു; ഓരോ 20 മിനിറ്റിലും ഒരു കുട്ടി കൊല്ലപ്പെടുന്നു

അതേസമയം, കപ്പൽ ടിക്കറ്റ് നിരക്ക് വർധന തന്നോട് ചർച്ച ചെയ്തില്ലെന്ന് ലക്ഷദ്വീപ് എം.പി ഹംദുല്ല സഈദ് പറഞ്ഞു. അനീതിയും അന്യായവുമായ ഉത്തരവാണിതെന്ന് പറഞ്ഞ എം.പി ഈ വർധനക്കെതിരെ നിയമപരമായും രാഷ്ട്രീയപരമായും പോരാടുമെന്നും അദ്ദേഹം പറഞ്ഞു. എന്തിന്റെ അസ്ഥാനത്തിലാണ് ഇത്രയും നിരക്ക് കൂട്ടിയതെന്നും എം.പി ചോദിക്കുന്നു.

ഇതിനിടെ, നിരക്ക് വർധിപ്പിച്ചെങ്കിലും യാത്രക്കാർക്ക്‌ ആവശ്യമായ സൗകര്യങ്ങൾ ഒരുക്കാൻ കേന്ദ്ര സർക്കാരിന്റെ കീഴിലുള്ള ലക്ഷദ്വീപ്‌ അഡ്മിനിസ്ട്രേഷൻ തയ്യാറായിട്ടില്ലെന്ന ആക്ഷേപം ശക്തമാണ്. കഴിഞ്ഞദിവസം എംവി കവരത്തി എന്ന കപ്പൽ മുന്നറിയിപ്പില്ലാതെ സർവിസ് റദ്ദാക്കിയതോടെ നിരവധി യാത്രക്കാരുടെ യാത്ര മുടങ്ങിയിരുന്നു. നേരത്തേ ഏഴു കപ്പൽ സർവീസ് നടത്തിയ കൊച്ചി–ലക്ഷദ്വീപ്‌ യാത്രയ്ക്ക് ഇപ്പോൾ എംവി കവരത്തി, എംവി കോറൽസ് എന്നീ രണ്ട് കപ്പലുകൾ മാത്രമാണുള്ളത്. ഇവയ്ക്ക് പരമാവധി ആഴ്ചയിൽ നാല് സർവിസുകളിലായി 1152 പേരെയേ കൊണ്ടുപോകാൻ സാധിക്കൂ.