തിരുവനന്തപുരം: സംസ്ഥാന സര്‍ക്കാര്‍ സംഘടിപ്പിച്ച പരിസ്ഥിതി ദിനാഘോഷ പരിപാടിയില്‍ സ്ഥാപിച്ച, ആര്‍.എസ്.എസ് സ്ഥിരമായി ഉപയോഗിക്കുന്ന കാവിക്കൊടി പിടിച്ച ഭാരതാംബയുടെ ചിത്രം മാറ്റില്ലെന്ന നിലപാട് ആവര്‍ത്തിച്ച് ഗവര്‍ണര്‍. ഇതോടെ കേരളം ഒരിക്കല്‍ കൂടി ഗവര്‍ണര്‍- സര്‍ക്കാര്‍ പോരിന് വേദിയാവുകയാണ്. സര്‍ക്കാറുമായി നിരന്തരം ഇടഞ്ഞ ആരിഫ് മുഹമ്മദ് ഖാന്‍ മാറി രാജേന്ദ്ര ആര്‍ലേക്കര്‍ വന്നതോടെ, സര്‍ക്കാര്‍-ഗവര്‍ണര്‍ പോരില്‍ സമവായം പ്രകടമായെങ്കിലും ഭാരതാംബയുടെ ചിത്രത്തില്‍ ഉടക്കി വീണ്ടും പോരിലേക്ക് പോവുന്നതാണ് ഇപ്പോള്‍ കാണുന്നത്. 

 കഴിഞ്ഞ ദിവസമായിരുന്നു ഗവര്‍ണറുടെ വിവാദം നടപടി. സര്‍ക്കാരിന്റെ പരിസ്ഥിതി ദിനാഘോഷത്തിന്റെ ഔദ്യോഗിക ഉദ്ഘാടനം രാജ്ഭവനില്‍ നടത്താനായിരുന്നു സര്‍ക്കാര്‍ തീരുമാനം.  മുന്നൊരുക്കങ്ങള്‍ വിലയിരുത്താനായി ബുധനാഴ്ച വൈകിട്ട് കൃഷി വകുപ്പ് ഉദ്യോഗസ്ഥര്‍ രാജ്ഭവനില്‍ എത്തിയതോടെയാണ് ചിത്രം ശ്രദ്ധയില്‍പ്പെട്ടത്. തുടര്‍ന്ന് ഇക്കാര്യം മന്ത്രിയെ അറിയിച്ചു. പിന്നാലെയാണ് ചിത്രം മാറ്റണമെന്ന് സര്‍ക്കാര്‍ ആവശ്യപ്പെട്ടു. എന്നാല്‍ ഈ ചിത്രം മാറ്റാനാവില്ലെന്ന് ഗവര്‍ണര്‍ സര്‍ക്കാരിനെ അറിയിച്ചു. പരിപാടി തുടങ്ങുമ്പോള്‍ കാവിക്കൊടി പിടിച്ച ഭാരതാംബയുടെ ചിത്രത്തില്‍ പുഷ്പാര്‍ച്ചന വേണമെന്നും ഗവര്‍ണര്‍ നിര്‍ബന്ധം പിടിച്ചു. ഇതോടെ വേദി മാറ്റുക തന്നെ വേണമെന്ന നിലപാടിലേക്ക് സര്‍ക്കാര്‍ എത്തുകയായിരുന്നു. വിഷയത്തില്‍ ഇടപെട്ട മുഖ്യമന്ത്രി പിണറായി വിജയനും കൃഷിമന്ത്രിയുമായി ആശയവിനിമയം നടത്തി. കൃഷി മന്ത്രി പി.പ്രസാദ് ഇടപെട്ട് പരിപാടിയുടെ വേദി സെക്രട്ടേറിയറ്റിലെ ദര്‍ബാര്‍ ഹാളിലേക്കു മാറ്റി. 

അതേസമയം സര്‍ക്കാര്‍ പരിപാടിയുടെ വേദി മാറ്റിയെങ്കിലും ഗവര്‍ണര്‍ നിലപാടു മാറ്റിയില്ല. ഭാരതാംബയുടെ അതേചിത്രത്തില്‍ പുഷ്പാര്‍ച്ചന നടത്തി രാജ്ഭവന്‍ പരിസരത്ത് വൃക്ഷത്തൈയും നട്ട് ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ പരിസ്ഥിതി ദിനം ആചരിച്ചു. ചിത്രം മാറ്റിവെയ്ക്കാന്‍ പറ്റില്ലെന്ന് അറിയിച്ചതുകൊണ്ടാണ് മന്ത്രി എത്താത്തതെന്നും ഇത് എന്തു ചിന്താഗതിയാണെന്നും പിന്നീട് നടന്ന സ്വകാര്യ പരിപാടിയില്‍ ഗവര്‍ണര്‍ ചോദിച്ചു. ഭാരതാംബ രാജ്യത്തിന്റെ അടയാളമാണ്. അതുമാറ്റാന്‍ കഴിയില്ലെന്നും ഗവര്‍ണര്‍ പറഞ്ഞു. 

സി.പി.എം സംസ്ഥാന സെക്രട്ടറി എം.വി ഗോവിന്ദന്‍ മന്ത്രി പി. പ്രസാദിന്റെ നിലപാടിനെ പിന്തുണച്ച് രംഗത്തെത്തി. ഏതു ഭാരതാംബയെന്ന് ചോദിച്ച അദ്ദേഹം ഭാരതാംബ എന്നു പറയുന്ന ഒരു ഔദ്യോഗിക ചിഹ്നമോ രൂപമോ ഇല്ലെന്നും കൂട്ടിചേര്‍ത്തു. രാജ്ഭവന്‍ ആര്‍.എസ്.എസ് ആസ്ഥാനം ആക്കരുതെന്ന് പ്രതിപക്ഷ നേതാവ് വി.ഡി സതീശനും പ്രതികരിച്ചു. ഗവര്‍ണര്‍ക്കെതിരേ ചുണ്ടനക്കാന്‍ മുഖ്യമന്ത്രിക്ക് പേടിയാണെന്നും സതീശന്‍ പറഞ്ഞു.