നിലമ്പൂര്‍: നിലമ്പൂര്‍ വഴിക്കടവ് വെള്ളക്കട്ടയില്‍ വിദ്യാര്‍ഥി ഷോക്കേറ്റ് മരിച്ച സംഭവത്തില്‍ ഒരാള്‍ അറസ്റ്റില്‍. മുഖ്യപ്രതിയായ വഴിക്കടവ് സ്വദേശി വിനീഷാണ് പിടിയിലായത്. കാട്ടുപന്നിയുടെ ഇറച്ചിക്ക് വേണ്ടിയാണ് കെണിയൊരുക്കിയതെന്നാണ് ഇയാള്‍ പറയുന്നത്. ഇയാള്‍ക്കെതിരെ മനപൂര്‍വമല്ലാത്ത നരഹത്യക്ക് വഴിക്കടവ് പൊലിസ് കേസെടുത്തു. 

വിനീഷ്,കുഞ്ഞുമുഹമ്മദ് എന്നിവരാണ് പൊലിസ് കസ്റ്റഡിയിലുള്ളത്. പ്രതികളായ ഇരുവരും സ്ഥിരം കുറ്റവാളികളാണ്. രണ്ടു പേരെയും ചോദ്യം ചെയ്ത് വരികയാണ്. അതേസമയം, കേസിന്റെ അന്വേഷണം ക്രൈംബ്രാഞ്ചിന് നല്‍കിയിട്ടുണ്ട്. ഡി.വൈ.എസ്.പി അലവിക്കാണ് അന്വേഷണ ചുമതല. 

ALSO READ: ഗസ്സക്ക് ചോരയില്‍ മുങ്ങിയ പെരുന്നാള്‍ ദിനങ്ങള്‍; മുന്നറിയിപ്പില്ല, ഒഴിഞ്ഞുപോകാന്‍ നിര്‍ദ്ദേശമില്ല, 24 മണിക്കൂറിനിടെ കൊന്നൊടുക്കിയത് 75 ഫലസ്തീനികളെ

വയലില്‍ സ്ഥാപിച്ചിരുന്ന ഇലക്ട്രിക് കമ്പിയില്‍ നിന്ന് ഷോക്കേറ്റാണ് പത്താം ക്ലാസ് വിദ്യാര്‍ത്ഥി അനന്തു മരിക്കുന്നത്. നാലു കുട്ടികള്‍ക്ക് പരുക്കേറ്റിരുന്നു. ഇവരില്‍ ഒരാളുടെ നില അതീവ ഗുരുതരമാണ്. ഗുരുതരമായി പരിക്കേറ്റ വിദ്യാര്‍ത്ഥിയെ പാലാടിലുള്ള സ്വകാര്യ ആശുപത്രിയിലും മറ്റുള്ളവരെ നിലമ്പൂര്‍ ജില്ലാ ആശുപത്രിയിലുമാണ് പ്രവേശിപ്പിച്ചിരിക്കുന്നത്.

ALSO READ: വഴിക്കടവിൽ പത്താം ക്ലാസ് വിദ്യാർത്ഥി ഷോക്കേറ്റ് മരിച്ച സംഭവം; മനപൂർവമല്ലാത്ത നരഹത്യയ്ക്ക് കേസ്, സംഭവത്തിൽ പ്രതിഷേധം ശക്തം

വഴിക്കടവ് വെള്ളക്കെട്ട് പ്രദേശത്താണ് ഞെട്ടിക്കുന്ന ഈ സംഭവം നടന്നത്. കുട്ടികള്‍ മീന്‍ പിടിക്കാനായി പോകുമ്പോഴാണ് അപകടം ഉണ്ടായത്. അനധികൃത ഇലക്ട്രിക് ഫെന്‍സിംഗ് പതിവായി ഈ മേഖലയിലുണ്ടാവാറുണ്ടെന്ന് പ്രദേശവാസികള്‍ പറയുന്നു. സംഭവത്തില്‍ പ്രദേശത്ത് കടുത്ത പ്രതിഷേധമാണ് ഉയരുന്നത്.

സംഭവത്തില്‍ കടുത്ത പ്രതിഷേധമാണ് നടക്കുന്നത്. ഇതിന്റെ പേരില്‍ രാഷ്ട്രീയ പോരും നടക്കുന്നുണ്ട്. സര്‍ക്കാര്‍ സ്‌പോണ്‍സേഡ് കൊലപാതകമെന്നാണ് കോണ്‍ഗ്രസ് നേതാവും നിലമ്പൂര്‍ മണ്ഡലം സ്ഥാനാര്‍ഥിയുമായി ആര്യാടന്‍ ഷൗക്കത്ത് ചൂണ്ടിക്കാട്ടിയത്. എന്നാല്‍  നിലമ്പൂരില്‍ വിദ്യാര്‍ഥി ഷോക്കേറ്റ് മരിച്ച സംഭവം രാഷ്ട്രീയവല്‍ക്കരിക്കാനാണ് ശ്രമമെന്ന് എതിര്‍സ്ഥാനാര്‍ഥി സ്വരാജും വനംമന്ത്രി എ.കെ ശശീന്ദ്രനും പ്രതികരിച്ചു. തെരഞ്ഞെടുപ്പ് മുന്നില്‍കണ്ടാണ് ഇത്തരത്തില്‍ സംഭവത്തെ രാഷ്ട്രീയവല്‍ക്കരിക്കാനുള്ള നീക്കമുണ്ടാവുന്നതെന്നും ഇത് അംഗീകരിക്കാനാവില്ലെന്നും ശശീന്ദ്രന്‍ പറഞ്ഞു. സ്വകാര്യവ്യക്തിയുടെ പറമ്പിലെ കെണിയില്‍ നിന്നാണ് വിദ്യാര്‍ഥിക്കടക്കം പരിക്കേറ്റത്. ഇതില്‍ വനംവകുപ്പിനോ സര്‍ക്കാറിനോ പങ്കില്ല. വിഷയത്തില്‍ വനംവകുപ്പിന് എന്തെങ്കിലും വീഴ്ച സംഭവിച്ചിട്ടുണ്ടെങ്കില്‍ പരിശോധിക്കുമെന്നും അദ്ദേഹം കൂട്ടിച്ചേര്‍ത്തു.

A Class 10 student died after being electrocuted by an illegal electric fence in Nilambur’s Vazhakadavu area. Police arrested the main accused, Vineesh, who set the trap for wild boar meat. The case has sparked political controversy ahead of the by-election.