മ്യൂണിക്ക്: യുവേഫ നേഷൻസ് ലീഗിലെ ലൂസേഴ്‌സ് ഫൈനൽ പോരാട്ടത്തിൽ ജർമനിയെ തകർത്ത് ഫ്രാൻസ് തകർപ്പൻ വിജയമാണ് സ്വന്തമാക്കിയത്. എതിരില്ലാത്ത രണ്ടുഗോളുകൾക്കാണ് ജർമനിയെ ഫ്രാൻസ് തകർത്തത്. ആദ്യ പകുതി അവസാനിക്കാനിരിക്കെ 45ാം മിനുട്ടിൽ ഫ്രാൻസ് ടീം ക്യാപ്റ്റൻ കൂടിയായ കിലിയൻ എംബാപ്പെയാണ് ആദ്യ ഗോൾ നേടിയത്. ഓറെലിൻ ചൗമേനിയിൽ നിന്നുള്ള മികച്ചൊരു പാസിൽ നിന്നായിരുന്നു എംബാപ്പെയുടെ ഗോൾ പിറന്നത്.

ഈ ഗോളിന് പിന്നാലെ ഫ്രാൻസ് ദേശിയ ടീമിനായി 50 ഫയലുകൾ പൂർത്തിയാക്കാനും എംബാപ്പെക്ക് സാധിച്ചു. ഇതോടെ ഫ്രാൻസിനായി ഏറ്റവും വേഗത്തിൽ 50 ഗോളുകൾ സ്വന്തമാക്കുന്ന താരമായി മാറാനും എംബാപ്പെക്ക് സാധിച്ചു. 90 മത്സരങ്ങളിൽ നിന്നുമാണ് എംബാപ്പെ 50 ഗോളുകൾ സ്വന്തമാക്കിയത്. ഇതിഹാസ താരം തിയറി ഹെൻറിയെ മറികടന്നാണ് എംബാപ്പ ഈ റെക്കോർഡ് കൈവരിച്ചത്. 113 മത്സരങ്ങളിൽ നിന്നാണ് ഹെൻറി 50 ഗോളുകൾ സ്വന്തമാക്കിയിരുന്നത്. 

ഈ സീസണിൽ ക്ലബ് തലത്തിൽ റയൽ മാഡ്രിഡിന് വേണ്ടിയും മികച്ച പ്രകടനമാണ് ഫ്രഞ്ച് താരം പുറത്തെടുത്തത്. റയലിനൊപ്പം അരങ്ങേറ്റ സീസണിൽ ഏറ്റവും കൂടുതൽ ഗോളുകൾ നേടുന്ന താരമായി മാറാനും എംബാപ്പെക്ക് കഴിഞ്ഞിരുന്നു. 43 ഗോളുകളാണ് ഈ സീസണിൽ ഫ്രഞ്ച് താരം നേടിയത്. 37 ​ഗോളുകൾ നേടിയ ഇവാൻ സൊമറാനോയെ മറികടന്നാണ് എംബാപ്പെ ഈ നേട്ടം കൈവരിച്ചത്. 1992-93 സീസണിൽ ആണ് താരം 37 ഗോളുകൾ സ്വന്തമാക്കിയത്. 

അതേസമയം ലൂസേഴ്‌സ് ഫൈനലിൽ ഫ്രാൻസിന്റെ രണ്ടാം ഗോളിന് വഴിയൊരുക്കിയതും എംബാപ്പെ തന്നെയാണ്. റോബിൻ കോച്ചിന്റെ പിഴവിൽ നിന്ന് പന്ത് പിടിച്ചെടുത്ത എംബാപ്പെ നിസ്വാർത്ഥമായ നീക്കത്തിലൂടെ മൈക്കിൽ ഒലിസെയ്ക്ക് പന്ത് കൈമാറുകയായിരുന്നു. ഒലിസെ അനായാസം ഗോൾ നേടുകയും ചെയ്തു. 

A single goal led to a golden achievement Mbappe made history with France