തിരുവനന്തപുരം: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡിന്റെ ആഭിമുഖ്യത്തില്‍ പ്രഖാപിച്ച ലഹരി വിരുദ്ധ ക്യാമ്പയിന്റെ ഭാഗമായി മദ്‌റസകള്‍ മുഖേന സമാഹരിച്ച 10 ലക്ഷം പേര്‍ ഒപ്പിട്ട ഭീമ ഹര്‍ജി ബുധനാഴ്ച(11-06-2025) സമസ്ത പ്രസിഡണ്ട് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളുടെ നേതൃത്വത്തില്‍ സമസ്ത നേതാക്കള്‍ മുഖ്യമന്ത്രി പിണറായി വിജയന് സമര്‍പ്പിക്കും. ലഹരിക്കെതിരെ വ്യാപകമായ ക്യാമ്പയിന്‍ പ്രവര്‍ത്തനങ്ങളാണ് സമസ്തയുടെയും പോഷക സംഘടനകളുടെയും ആഭിമുഖ്യത്തില്‍ നടന്നുവരുന്നത്. മെയ് 18ന് സമസ്തയുടെ 10992 മദ്‌റസകളില്‍ നടത്തിയ സ്‌പെഷ്യല്‍ അസംബ്ലിയില്‍ 12 ലക്ഷം കുട്ടികള്‍ പങ്കെടുക്കുകയും ലഹരിക്കെതിരെ പ്രതിജ്ഞ എടുക്കുകയും ചെയ്തിരുന്നു. അന്നെ ദിവസം തന്നെ 10 ലക്ഷം പേര്‍ ഒപ്പു ചാര്‍ത്തുകയും ചെയ്തു. സംസ്ഥാനത്ത് മദ്യം, മയക്കുമരുന്ന്, മറ്റു ലഹരി വസ്തുക്കളുടെ ഉപയോഗവും വിപണനവും പൂര്‍ണമായും നിരോധിക്കുക, ലഹരിക്കെതിരെയുള്ള നിയമ നടപടികള്‍ കര്‍ശനമാക്കുക എന്നീ ആവശ്യങ്ങളാണ് ഹര്‍ജിയില്‍ ഉള്‍ക്കൊളിച്ചത്. ക്യാമ്പയിന്റെ ഭാഗമായി മദ്‌റസകളും മഹല്ലുകളും കേന്ദ്രീകരിച്ച് ബോധവര്‍ക്കരണ ക്ലാസുകള്‍, ഡോക്യുമെന്ററി പ്രദര്‍ശനം, ഗൃഹ സന്ദര്‍ശനം, വിദ്യാര്‍ത്ഥി സഭ രൂപീകരണം എന്നിവയും സംഘടിപ്പിച്ചു വരുന്നു.