കരുത്തരായ സ്പാനിഷ് പടയെ കീഴടക്കി പോർച്ചുഗൽ വീണ്ടും യൂറോപ്യൻ ഫുട്ബോളിന്റെ നെറുകയിൽ എത്തിയിരിക്കുകയാണ്. കലാശപോരാട്ടത്തിൽ സ്പെയിനിനെ പെനാൽറ്റിയിൽ 5-3 എന്ന സ്കോർ ലൈനിന് തകർത്താണ് ക്രിസ്റ്റ്യാനോ റൊണാൾഡോയും സംഘവും കിരീടം ചൂടിയത്.

മത്സരത്തിന്റെ നിശ്ചിത സമയത്തും എക്സ്ട്രാ ടൈമിലും ഇരു ടീമുകളും രണ്ട് വീതം ഗോളുകൾ നേടി സമനില പാലിച്ചപ്പോൾ മത്സരം പെനാൽറ്റിയിലേക്ക് നീങ്ങുകയായിരുന്നു. പോർച്ചുഗലിന്റെ രണ്ടാം യുവേഫ നേഷൻസ് ലീഗ് കിരീട നേട്ടമായിരുന്നു ഇത്. 2019ലാണ് ഇതിനു മുമ്പ് പോർച്ചുഗൽ ആദ്യമായി ഈ ടൂർണമെന്റ് വിജയിച്ചത്. 

മത്സരശേഷം കിരീടം നേടിയതിന്റെ സന്തോഷത്തെക്കുറിച്ചും ഫുട്ബോളിലെ തന്റെ ഭാവിയെക്കുറിച്ചും റൊണാൾഡോ സംസാരിച്ചിരുന്നു. താൻ അൽ നാസറിൽ തന്നെ തുടരുമെന്നാണ് റൊണാൾഡോ പറഞ്ഞത്. 

''സന്തോഷം കൊണ്ടായിരുന്നു ആ കണ്ണുനീർ. പോർച്ചുഗലിനായി എന്തെങ്കിലും നേടുമ്പോൾ ഞാൻ ഇങ്ങനെയാണ്. എന്റെ അഭിപ്രായത്തിൽ ദേശീയ ടീമിനായി വിജയിക്കുന്നത് പോലെ മറ്റൊന്നും ഫുട്ബോളിൽ ഇല്ല. ഈ തലമുറ ഈ കിരീടം അർഹിച്ചിരുന്നു. ഫൈനൽ മത്സരം  ബുദ്ധിമുട്ടായിരിക്കുമെന്ന് ഞങ്ങൾക്കറിയാമായിരുന്നു, പക്ഷേ ഞങ്ങൾ ഇത് അർഹിച്ചിരുന്നു, ഇത് ഞങ്ങൾക്ക് കൂടുതൽ ആത്മവിശ്വാസം നൽകുന്നു. ഈ വിജയം കൂടുതൽ ആത്മവിശ്വാസത്തോടെ ലോകകപ്പിലേക്ക് പോകാൻ ഞങ്ങളെ സഹായിക്കുന്നു. ഭാവിയിൽ മാറ്റമൊന്നുമില്ല. അൽ നസറിൽ തന്നെ തുടരും'' റൊണാൾഡോ ഓജോഗോയോട് പറഞ്ഞു.

അടുത്ത വർഷം നടക്കുന്ന ഫിഫ ലോകകപ്പിലും റൊണാൾഡോ കളിക്കുമെന്നാണ് പ്രതീക്ഷിക്കുന്നത്. ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും.

2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

Cristiano Ronaldo on the reason he burst into tears in the UEFA Nations League final