മലപ്പുറം: 'നിലമ്പൂർ  മണ്ഡലത്തിൽ 20,000ത്തോളം ആദിവാസി വോട്ടുകളുണ്ട്. ഞങ്ങളിറങ്ങിയാൽ ആദിവാസി വോട്ടുകൾ ആർക്കും ലഭിക്കില്ല. ആരുടെ പെട്ടിയിലും വോട്ടുകൾ വീഴില്ല, സാധ്യമായ വോട്ടുകളെല്ലാം ഞങ്ങൾ തിരിക്കും'...  
22 ദിവസങ്ങളായി മലപ്പുറം സിവിൽസ്റ്റേഷൻ പരിസരത്ത് ഒരുതുണ്ട് ഭൂമിക്കുവേണ്ടി സമരം ചെയ്യുന്ന നിലമ്പൂരിലെ ആദിവാസികളുടെ സമരനായിക ബിന്ദു വൈലശ്ശേരിയുടെ വാക്കുകളാണിത്. നിലമ്പൂർ ആദിവാസി കോളനികളിലെ 60 കുടുംബങ്ങളാണ് സമരവേദിയിലുള്ളത്. കൃഷിയോഗ്യമായ ഭൂമിക്കുവേണ്ടിയുള്ള ദിവസങ്ങളുടെ കാത്തിരിപ്പിലാണ് ഇവർ.  സർക്കാർ നൽകിയ ഉറപ്പ് പാലിക്കുന്നതുവരെ സമരവേദിയിൽ  തുടരുമെന്നും നിലമ്പൂർ ഉപതെരഞ്ഞെടുപ്പ് ബഹഷ്‌കരിക്കുമെന്നും അവർ ഉറപ്പിച്ചു പറയുന്നു.

നേരത്തെ നിലമ്പൂരിലെ സമര സമയത്ത് പ്രതിപക്ഷ നേതാവിനെ തിരുവനന്തപുരത്തെത്തി സന്ദർശിച്ച് ആദിവാസികൾ നിവേദനം സമർപ്പിച്ചിരുന്നു. നിലമ്പൂരിലെ സമര വേദിയിലെത്താമെന്ന് അദ്ദേഹം അവർക്ക് ഉറപ്പുനൽകിയെങ്കിലും അതിനു സാധിച്ചിരുന്നില്ല. ഉപതെരഞ്ഞെടുപ്പുമായി ബന്ധപ്പെട്ട് കഴിഞ്ഞ ദിവസം നിലമ്പൂരിലെത്തിയപ്പോൾ അദ്ദേഹം മലപ്പുറത്തെ സമരവേദിയിലെത്തിയിരുന്നു. 

എന്നാൽ, കൃഷിഭൂമിയുടെ കാര്യത്തിൽ സർക്കാർ നൽകിയ ഉറപ്പ് പാലിക്കാത്തിടത്തോളം അതിലൊന്നും വലിയ പ്രതീക്ഷയില്ലന്ന് ബിന്ദു വൈലശ്ശേരി പറഞ്ഞു. തൊട്ടടുത്ത ദിവസങ്ങളിൽ  മണ്ഡലത്തിലെ മുഴുവൻ ആദിവാസി കുടുംബങ്ങളിലേക്കും ഞങ്ങൾ കയറി ചെല്ലുമെന്നും എല്ലാവരിലേക്കും ഞങ്ങൾ ഉയർത്തിപിടിക്കുന്ന സമരസന്ദേശം കൈമാറി ഇടതു-വലതു മുന്നണികളുടെയും സ്വതന്ത്ര സ്ഥാനാർഥികളുടെയും വോട്ടുപെട്ടികളിൽ വോട്ടുവീഴാതിരിക്കാനുള്ള ശ്രമങ്ങൾ നടത്തുമെന്നും  അവർ പറഞ്ഞു.
അതേസമയം, നിലമ്പൂരിലെ ആദിവാസികളുടെ പ്രശ്‌നങ്ങൾ ചർച്ചയാക്കാതെ മുന്നണികളും പി.വി അൻവർ ഉൾപ്പെടെയുള്ള മറ്റു സ്ഥാനാർഥികളും തിരക്കിട്ട തെരഞ്ഞെടുപ്പ് പ്രചാരണം തുടരുകയാണ്.

adivasis to boycott the by election in nilambur