ബോയിംഗ് 787-8 ഡ്രീംലൈനർ സർവീസ് നടത്തുന്ന AI171 വിമാനം, ഉച്ചയ്ക്ക് 1:38 നാണ് അപകടത്തിപ്പെട്ടത്. അഹമ്മദാബാദ് സർദാർ വല്ലഭായ് പട്ടേൽ അന്താരാഷ്ട്ര വിമാനത്താവളത്തിൽ നിന്ന് പുറപ്പെട്ട് ലണ്ടൻ ഗാറ്റ്വിക്കിലേക്കുള്ള യാത്രയ്ക്കായി ടേക്ക് ഓഫ് ചെയ്ത് സെക്കന്റുകൾക്ക് ഉള്ളിൽ വിമാനം തീഗോളമായി മാറുകയായിരുന്നു. 800 മീറ്റർ ഉയരം വരെ പറന്നുയർന്ന വിമാനം പെട്ടെന്ന് താഴ്ന്ന് നിലത്ത് ഇടിക്കുകയായിരുന്നു. 230 യാത്രക്കാരും 2 പൈലറ്റുമാരും 10 ക്യാബിൻ ക്രൂ അംഗങ്ങളും വിമാനത്തിലുണ്ടായിരുന്നു.

അഹമ്മദാബാദ് വിമാനാപകടം മാത്രമല്ല ഇന്ത്യയ്ക്ക് ദാരുണമായ വിമാനാപകടങ്ങളുടെ ഒരു നീണ്ട ചരിത്രം തന്നെയുണ്ട്, അവയിൽ പലതും വ്യോമയാന നിയമങ്ങളിലും വിമാന പ്രവർത്തനങ്ങളിലും പരിഷ്കാരങ്ങൾക്ക് കാരണമായി.

ഇന്ത്യയിലെ വിമാനാപകടങ്ങൾ

എയർ ഇന്ത്യ എക്സ്പ്രസ് ഫ്ലൈറ്റ് IX-1344 - കോഴിക്കോട് 2020

2020 ഓഗസ്റ്റ് 7ന് സംഭവിച്ച ഈ അപകടത്തിൽ 21 പേരാണ് മരിച്ചത്. വന്ദേ ഭാരത് മിഷന്റെ ഭാഗമായി പറന്ന ബോയിംഗ് 737 വിമാനം, കുറഞ്ഞ ദൃശ്യപരതയും കനത്ത മഴയും കാരണം കോഴിക്കോടിന്റെ ടേബിൾടോപ്പ് റൺവേയിൽ നിന്ന് തെന്നിമാറുകയായിരുന്നു. അപകടത്തിൽ വിമാനം രണ്ടായി പിളർന്നു. രണ്ട് പൈലറ്റുമാരും തൽക്ഷണം മരിച്ചു. 100-ലധികം യാത്രക്കാർക്ക് പരുക്കേറ്റു. ഈ അപകടം ടേബിൾടോപ്പ് റൺവേകളുടെ സുരക്ഷയെക്കുറിച്ച് ഗുരുതരമായ ചോദ്യങ്ങൾ ഉയർത്തി. 

എയർ ഇന്ത്യ എക്സ്പ്രസ് ഫ്ലൈറ്റ് IX-812 - മംഗലാപുരം 2010

2010 മെയ് 22ന് മംഗലാപുരത്ത് സംഭവിച്ച വിമാനാപകടത്തിൽ 158 പേരാണ് മരിച്ചത്. ദുബൈയിലേക്ക് പോകുകയായിരുന്ന വിമാനം മംഗലാപുരത്തെ ടേബിൾടോപ്പ് റൺവേയിൽ അപകടത്തിൽപെടുകയായിരുന്നു. വിമാനം റൺവേയിൽ നിന്ന് തെന്നിമാറി ഒരു മലയിടുക്കിലേക്ക് വീണ് തീപിടുത്തമുണ്ടായി. വെറും എട്ട് പേർ മാത്രമാണ് ഈ അപകടത്തിൽ രക്ഷപ്പെട്ടത്. പൈലറ്റിന്റെ ക്ഷീണവും തെറ്റായ വിധിനിർണയവുമാണ് അപകടത്തിന്റെ കാരണമായി അന്വേഷണ ഉദ്യോഗസ്ഥർ ചൂണ്ടിക്കാട്ടുന്നത്.

അലയൻസ് എയർ ഫ്ലൈറ്റ് 7412 - പട്ന 1998

1998 ജൂലൈ 17ന് ബീഹാറിലെ പട്നയിലുണ്ടായ അപകടത്തിൽ 60 പേരാണ് മരിച്ചത്.‌ പറന്നുയർന്ന വിമാനം വിമാനത്താവളത്തിന് സമീപമുള്ള ഒരു പാർപ്പിട പ്രദേശത്ത് തകർന്നു വീഴുകയായിരുന്നു. ഫ്ലൈറ്റ് ക്രൂവിന്റെ അപര്യാപ്തമായ ഏകോപനവും മോശം തീരുമാനമെടുക്കലും ഈ അപകടത്തിന്റെ കാരണങ്ങളായിരുന്നു. ബിഹാറിന്റെ ചരിത്രത്തിലെ ഏറ്റവും മാരകമായ വിമാനാപകടങ്ങളിലൊന്നാണിത്.

ചാർഖി ദാദ്രി മിഡ് എയർ കൂട്ടിയിടി 1996

സഊദി അറേബ്യൻ എയർലൈൻസിന്റെ ബോയിംഗ് 747 വിമാനവും കസാക്കിസ്ഥാൻ എയർലൈൻസിന്റെ ഇല്യുഷിൻ ഇൽ-76 വിമാനവും കൂട്ടിയിടിച്ചുണ്ടായ ഈ ദുരന്തം ലോകത്തിലെ ഏറ്റവും മാരകമായ വിമാന അപകടങ്ങളിലൊന്നായി പട്ടികപ്പെടുത്തിയിട്ടുണ്ട്. തെറ്റായ ആശയവിനിമയവും ഉയരം സംബന്ധിച്ച നിർദേശങ്ങൾ അനുസരിക്കാതിരുന്നതുമാണ് ഈ ദുരന്തത്തിന് കാരണമായത്. ഈ ദുരന്തം ട്രാഫിക് കൊളിഷൻ അവോയ്ഡൻസ് സിസ്റ്റം (TCAS) നിർബന്ധമായും സ്ഥാപിക്കേണ്ടതിന്റെ ആവശ്യകത ഉൾപ്പെടെ ഇന്ത്യയിലെ എയർ ട്രാഫിക് കൺട്രോൾ നടപടിക്രമങ്ങളുടെ പൂർണ്ണമായ പരിഷ്കരണത്തിന് വഴിയൊരുക്കി.

ഇന്ത്യൻ എയർലൈൻസ് ഫ്ലൈറ്റ് 491 - ഔറംഗാബാദ് 1993

1993 ഏപ്രിൽ 26 ന് മഹാരാഷ്ട്രയിലെ ഔറംഗബാദിലുണ്ടായ വിമാനാപകടത്തിൽ 55 പേരാണ് മരിച്ചത്. പറന്നുയരുന്നതിനിടെ, അബദ്ധത്തിൽ റൺവേയിലേക്ക് വന്ന ഒരു ട്രക്കിൽ വിമാനം ഇടിച്ചുകയറുകയായിരുന്നു. അസാധാരണവും ഒഴിവാക്കാവുന്നതുമായ ഈ അപകടം വിമാനത്താവള സുരക്ഷാ, വാഹന നിയന്ത്രണ നടപടിക്രമങ്ങളിലുണ്ടായ വലിയ പിഴവുകളാണ് എടുത്തു കാണിക്കുന്നത്. 

ഇന്ത്യൻ എയർലൈൻസ് ഫ്ലൈറ്റ് 605 - ബെംഗളൂരു 1990

1990 ഫെബ്രുവരി 14 ന് ബെംഗളൂരുവിലുണ്ടായ അപകടത്തിൽ 92 പേരാണ് മരിച്ചത്.  ഇന്ത്യൻ സിവിൽ ഏവിയേഷൻ അധികൃതർ ഈ സംഭവത്തെത്തുടർന്ന് ലാൻഡിംഗ് നടപടിക്രമങ്ങളും പുതിയ തലമുറ വിമാനങ്ങൾക്കായുള്ള സിമുലേറ്റർ പരിശീലനവും പുനരവലോകനം ചെയ്യാൻ തീരുമാനിച്ചു.

ഇന്ത്യൻ എയർലൈൻസ് ഫ്ലൈറ്റ് 113 - അഹമ്മദാബാദ് 1988

1988 ഒക്ടോബർ 19 ന് അഹമ്മദാബാദിലുണ്ടായ അപകടത്തിൽ 133 പേരാണ് മരിച്ചത്. പ്രതികൂലമായ കാലാവസ്ഥയിൽ ലാൻഡ് ചെയ്യാനുള്ള ശ്രമത്തിനിടെ, വിമാനം റൺവേയിൽ നിന്ന് വളരെ അകലെയായി തകർന്നു വീഴുകയായിരുന്നു. ഈ അപകടത്തിൽ രണ്ട് പേർ മാത്രമാണ് രക്ഷപ്പെട്ടത്. 

എയർ ഇന്ത്യ ഫ്ലൈറ്റ് 855 - മുംബൈ 1978

1978 ജനുവരി ഒന്നിന് മുംബൈയ്ക്ക് സമീപമാണ് അപകടമുണ്ടായത്. സാങ്കേതിക തകരാറിനാൽ തകർന്ന വിമാനം അറബിക്കടലിലേക്ക് വീഴുകയായിരുന്നു. 213 പേർക്കാണ് ഈ ദുരന്തത്തിൽ ജീവഹാനി സംഭവിച്ചത്.

India has witnessed some of the most catastrophic aviation disasters in history, leaving deep scars on the nation's collective memory. From the Boeing 747 crash off Mumbai coast to the Airbus A320 tragedy at HAL Airport, these incidents reshaped aviation safety protocols. This retrospective examines the causes, aftermath, and lessons learned from India's deadliest air crashes—revealing how human error, technical failures, and systemic gaps have impacted flight safety over the decades.