കോഴിക്കോട്: മലാപറമ്പ് സെക്‌സ് റാക്കറ്റ് കേസില്‍ പ്രതികളായതിന് പിന്നാലെ ഒളിവില്‍പോയ രണ്ട് പൊലിസുകാര്‍ക്കായി തിരച്ചില്‍ ഊര്‍ജിതം. പൊലിസ് ഡ്രൈവര്‍മാരായ ഷൈജിത്ത്, സനിത്ത് എന്നിവരാണ് ഒളിവിലായത്. 

കേസില്‍ ഇരുവര്‍ക്കും നേരിട്ട് ബന്ധമുണ്ടെന്ന് കണ്ടെത്തിയിട്ടുണ്ട്. പിന്നാലെ ഇരുവരെയും സര്‍വീസില്‍ നിന്ന് സസ്‌പെന്‍ഡ് ചെയ്തിരുന്നു. രണ്ടുപേരുടെയും ഫോണുകള്‍ സ്വിച്ച് ഓഫ് ചെയ്ത നിലയിലാണ്. 

മലാപറമ്പില്‍ അപ്പാര്‍ട്ട്‌മെന്റ് കേന്ദ്രീകരിച്ചാണ് പ്രതികള്‍ പെണ്‍വാണിഭം നടത്തിയിരുന്നത്. വയനാട് സ്വദേശി ബിന്ദു, കരുവന്തിരുത്തി സ്വദേശി ഉപേഷ്, ഇടുക്കി സ്വദേശി അഭിരാമി എന്നിവരെയാണ് റെയ്ഡില്‍ പൊലിസ് സംഘം അറസ്റ്റ് ചെയ്തത്. പൊലിസിന് ലഭിച്ച രഹസ്യ വിവരത്തിന്റെ അടിസ്ഥാനത്തിലായിരുന്നു അറസ്റ്റ്. 

ALSO READ: അഹമ്മദാബാദ് വിമാനദുരന്തം; അനുശോചനം രേഖപ്പെടുത്തി സൽമാൻ രാജാവും കിരീടാവകാശിയും 

കസ്റ്റഡിയിലെടുത്ത ബിന്ദു എന്ന യുവതിയെ 2022ല്‍ പൊലിസ് സമാനമായ കേസില്‍ അറസ്റ്റ് ചെയ്തിരുന്നു. ബിന്ദുവിനെ ഉപയോഗിച്ച് സനിത്തും, ഷൈജിത്തും ഉള്‍പ്പെടെയുള്ള പ്രതികള്‍ പെണ്‍വാണിഭം നടത്തിയെന്നാണ് കേസ്. ഇരുവരും സാമ്പത്തിക ലാഭമുണ്ടാക്കിയതായും കണ്ടെത്തിയിരുന്നു.

കോഴിക്കോട് സ്വദേശിയുടെ ഉടമസ്ഥതയിലുള്ള അപ്പാര്‍ട്ട്‌മെന്റ് രണ്ടുവര്‍ഷം മുമ്പാണ് ബഹ്‌റൈന്‍ ഫുട്‌ബോള്‍ ടീമിന്റെ ഫിസിയോ എന്ന് പരിചയപ്പെടുത്തിയ ബാലുശ്ശേരി സ്വദേശി വാടകയ്‌ക്കെടുത്തതെന്ന് കെട്ടിട ഉടമ പൊലീസിന് മൊഴി നല്‍കി. ഇയാളുടെ നേതൃത്വത്തിലാണ് ഇവിടെ പെണ്‍വാണിഭ സംഘം പ്രവര്‍ത്തിച്ചിരുന്നതെന്ന് പൊലീസ് കണ്ടെത്തി.