ലോർഡ്‌സ്: വേൾഡ് ടെസ്റ്റ് ചാമ്പ്യൻഷിപ്പ് ഫൈനൽ പോരാട്ടത്തിൽ ഓസ്‌ട്രേലിയൻ താരം സ്റ്റീവൻ സ്മിത്തിന് പരുക്ക്. മത്സരത്തിന്റെ മൂന്നാം ദിവസം ഫീൽഡ് ചെയ്യുന്നതിനിടെ സ്മിത്തിന്റെ വലതുകൈക്കാണ് പരുക്ക് പറ്റിയത്. സൗത്ത് ആഫ്രിക്കൻ ക്യാപ്റ്റൻ ടെംബ ബവുമയുടെ ക്യാച്ച് സ്ലിപ്പിൽ നിന്നും എടുക്കാൻ ശ്രമിക്കുന്നതിനിടെയാണ് സ്മിത്തിന് പരുക്കേറ്റത്. പരുക്ക് ഗുരുതരമായതോടെ താരം മൈതാനം വിടുകയായിരുന്നു. ഇതോടെ ജൂൺ ൨൫ മുതൽ ആരംഭിക്കുന്ന വെസ്റ്റ് ഇൻഡീസിനെതിരെയുള്ള ടെസ്റ്റ് പരമ്പരയിൽ സ്മിത്ത് കളിക്കുമോ എന്നതും ഇപ്പോൾ സംശയമായി നിലനിൽക്കുന്നതാണ്. 

അതേസമയം ഓസ്‌ട്രേലിയക്കെതിരെ സൗത്ത് ആഫ്രിക്ക 282 റൺസിന്റെ വിജയലക്ഷ്യം പിന്തുടർന്ന് കൊണ്ടിരിക്കുകയാണ്. രണ്ടാം ഇന്നിങ്സിൽ ഓസ്‌ട്രേലിയ 207 റൺസിനാണ് പുറത്തായത്. രണ്ടാം ഇന്നിങ്സിൽ അവസാന വിക്കറ്റിൽ മിച്ചൽ സ്റ്റാർക്കും ജോഷ് ഹേസൽവുഡും മികച്ച കൂട്ടുക്കെട്ടാണ് പടുത്തുയർത്തിയത്. 148 റൺസിന്‌ ഒമ്പത് വിക്കറ്റുകൾ എന്ന നിലയിൽ നിൽക്കെയാണ് ഇരുവരും ചേർന്ന് ടീമിനെ 207 എന്ന സ്കോർ ലൈനിൽ എത്തിച്ചത്.

അതേസമയം ആദ്യ ഇന്നിംഗ്സിൽ ഓസ്‌ട്രേലിയ 212 റൺസിനാണ് പുറത്തായത്. സൗത്ത് ആഫ്രിക്ക ആദ്യ ഇന്നിംഗ്സിൽ 138 റൺസിനാണ് പുറത്തായത്. 

നായകൻ പാറ്റ് കമ്മിൻസിന്റെ (6 വിക്കറ്റ്) നേതൃത്വത്തിലുള്ള ഓസീസ് പേസ് ആക്രമണമാണ് ദക്ഷിണാഫ്രിക്കയെ തകർത്തത്. മിച്ചൽ സ്റ്റാർക്ക് 2 വിക്കറ്റ് വീഴ്ത്തി. ദക്ഷിണാഫ്രിക്കയിൽനിന്ന് ഡേവിഡ് ബെഡിങ്ഹാം (45) നായകൻ ടെംബാ ബാവുമ (36) എന്നിവർ മാത്രമാണ് ശ്രദ്ധേയ പ്രകടനം നൽകിയത്.

രണ്ടാം ദിനം 43-4 എന്ന സ്കോറിൽ ബാറ്റിംഗ് പുനരാരംഭിച്ച ദക്ഷിണാഫ്രിക്ക, ബാവുമ-ബെഡിങ്ഹാം കൂട്ടുകെട്ടിൽ (64 റൺസ്) പ്രതീക്ഷ നൽകി. എന്നാൽ, കമ്മിൻസിന്റെ പന്തിൽ ബാവുമ കവർ ഡ്രൈവിന് ശ്രമിച്ച് മാർനസ് ലാബുഷെയ്നിന്റെ കൈകളിൽ അവസാനിച്ചു. 94-5 എന്ന നിലയിൽനിന്ന് ദക്ഷിണാഫ്രിക്ക തകർന്നടിഞ്ഞു.

മറുപടി ബാറ്റിംഗിനിറങ്ങിയ ഓസ്ട്രേലിയയും ദക്ഷിണാഫ്രിക്കൻ പേസിന് മുന്നിൽ തകർന്നു. ലാബുഷെയ്ൻ (22), സ്റ്റീവ് സ്മിത്ത് (13) എന്നിവർ മാത്രം രണ്ടക്കം കണ്ടു. ലുങ്കി എൻഗിഡി (3 വിക്കറ്റ്), കാഗിസോ റബാഡ (3വിക്കറ്റ്) എന്നിവർ ഓസീസിനെ വരിഞ്ഞു. ആദ്യ ദിനം ടോസ് നഷ്ടപ്പെട്ട് ബാറ്റിംഗിനിറങ്ങിയ ഓസ്ട്രേലിയ, റബാഡയുടെ (5 വിക്കറ്റ്) മികവിൽ 212 റൺസിന് ഓൾഔട്ടായിരുന്നു.

സൗത്ത് ആഫ്രിക്ക പ്ലെയിംഗ് ഇലവൻ

റയാൻ റിക്കൽടൺ, എയ്ഡൻ മാർക്രം, വിയാൻ മൾഡർ, ടെംബ ബാവുമ (ക്യാപ്റ്റൻ), ഡേവിഡ് ബെഡിംഗ്ഹാം, ട്രിസ്റ്റൻ സ്റ്റബ്‌സ്, കൈൽ വെറെയ്‌നെ (വിക്കറ്റ് കീപ്പർ), മാർക്കോ ജാൻസൻ, കേശവ് മഹാരാജ്, കാഗിസോ റബാഡ , ലുങ്കി എൻഗിഡി. 

ഓസ്‌ട്രേലിയൻ പ്ലെയിംഗ് ഇലവൻ

ഉസ്മാൻ ഖവാജ, മാർനസ് ലാബുഷാഗ്നെ, കാമറൂൺ ഗ്രീൻ, സ്റ്റീവ് സ്മിത്ത്, ട്രാവിസ് ഹെഡ്, ബ്യൂ വെബ്‌സ്റ്റർ, അലക്സ് കാരി (വിക്കറ്റ് കീപ്പർ), പാറ്റ് കമ്മിൻസ് (ക്യാപ്റ്റൻ), മിച്ചൽ സ്റ്റാർക്ക്, നഥാൻ ലിയോൺ, ജോഷ് ഹേസൽവുഡ്.

Australian batsman Steven Smith injured in World Test Championship final