പശ്ചിമേഷ്യയിൽ ഇസ്റാഈലും ഇറാനും തമ്മിലുള്ള വ്യോമാക്രമണം മൂന്നാം ദിവസവും തുടരുന്ന സാഹചര്യത്തിൽ, ഇസ്റാഈലിലെ ഇന്ത്യൻ പൗരന്മാർക്ക് ജാഗ്രതാ നിർദേശവുമായി ടെൽ അവീവിലെ ഇന്ത്യൻ എംബസി. കെയർഗിവർമാർ, നഴ്സുമാർ, തൊഴിലാളികൾ, വിദ്യാർത്ഥികൾ, വ്യാപാരികൾ എന്നിവർ ഉൾപ്പെടുന്ന ഇസ്റാഈലിലെ ഇന്ത്യൻ സമൂഹത്തോട് സുരക്ഷ ഉറപ്പാക്കാൻ ആവശ്യമായ മുൻകരുതലുകൾ സ്വീകരിക്കണമെന്ന് എംബസി ആവശ്യപ്പെട്ടു. അനാവശ്യ യാത്രകൾ ഒഴിവാക്കാനും, ഇസ്റാഈൽ അധികാരികളുടെ സുരക്ഷാ മാർഗനിർദേശങ്ങൾ കർശനമായി പാലിക്കാനും, സുരക്ഷിതമായ സ്ഥലങ്ങളിൽ അഭയം തേടാനും എംബസി നിർദേശിച്ചു.

“നിലവിലെ സാഹചര്യത്തിൽ, ഇസ്റാഈലിലെ എല്ലാ ഇന്ത്യൻ പൗരന്മാരും ജാഗ്രത പാലിക്കണം. അനാവശ്യ യാത്രകൾ ഒഴിവാക്കി, സുരക്ഷാ ഷെൽട്ടറുകൾക്ക് സമീപം തുടരണം. എംബസി സ്ഥിതിഗതികൾ നിരന്തരം നിരീക്ഷിക്കുകയും ഇസ്റാഈൽ അധികാരികളുമായി നിരന്തരം ആശയവിനിമയം നടത്തുകയും ചെയ്യുന്നുണ്ട്,” എംബസി എക്സിലൂടെ പുറത്തിറക്കിയ പ്രസ്താവനയിൽ വ്യക്തമാക്കി. അടിയന്തര സാഹചര്യങ്ങളിൽ ബന്ധപ്പെടുന്നതിനായി 24 മണിക്കൂറും പ്രവർത്തിക്കുന്ന ഹെൽപ്‌ലൈൻ നമ്പറുകളും എംബസി പുറത്തുവിട്ടു: +972-547520711, +972-543278392, ഇമെയിൽ: [email protected].

ഇസ്റാഈലിന്റേ ദേശീയ അടിയന്തരാവസ്ഥാ പ്രഖ്യാപനത്തിനും വ്യോമാതിർത്തി അടച്ചതിനും പിന്നാലെയാണ് ഈ മുന്നറിയിപ്പ്. ഇസ്റാഈലിന്റേ പ്രശസ്തമായ അയൺ ഡോം മിസൈൽ പ്രതിരോധ സംവിധാനത്തെ പോലും നിഷ്പ്രഭമാക്കി, ഇറാൻ വിക്ഷേപിച്ച നിരവധി മിസൈലുകൾ ടെൽ അവീവ്, ഹൈഫ തുടങ്ങിയ പ്രധാന നഗരങ്ങളിൽ നാശം വിതച്ചു. ഇസ്റാഈലിന്റേ വ്യാവസായിക നഗരമായ ഹൈഫയിൽ കനത്ത നാശനഷ്ടം റിപ്പോർട്ട് ചെയ്തു. ഇതുവരെ 13 മരണങ്ങളും 35 പേർ കാണാതാവുകയും 200-ലധികം പേർക്ക് പരിക്കേൽക്കുകയും ചെയ്തതായി അധികൃതർ അറിയിച്ചു.

ഇറാന്റെ എണ്ണ സംഭരണശാലകൾ, ഊർജ കേന്ദ്രങ്ങൾ, ആണവ സൗകര്യങ്ങൾ എന്നിവ ലക്ഷ്യമിട്ടാണ് ഇസ്റാഈൽ ആക്രമണങ്ങൾ നടത്തിയത്. ഇറാനിൽ 78 പേർ കൊല്ലപ്പെടുകയും തെഹ്റാൻ ഉൾപ്പെടെയുള്ള നഗരങ്ങളിൽ വ്യാപകമായ നാശനഷ്ടങ്ങൾ ഉണ്ടാവുകയും ചെയ്തതായി റിപ്പോർട്ടുകൾ സൂചിപ്പിക്കുന്നു. ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു “ഓപ്പറേഷൻ റൈസിംഗ് ലയൺ” എന്ന പേര് നൽകിയ ഈ ആക്രമണം ഇറാന്റെ ആണവ പദ്ധതിയെ തടയാനുള്ള ശ്രമമാണെന്ന് പ്രഖ്യാപിച്ചു.

📢 ADVISORY/INSTRUCTIONS FOR INDIAN NATIONALS IN ISRAEL (AS ON JUNE 15) pic.twitter.com/ubDecSywqe

— India in Israel (@indemtel) June 15, 2025

അമേരിക്ക ഈ ആക്രമണങ്ങളിൽ നിന്ന് വിട്ടുനിൽക്കുന്നുവെന്ന് പ്രസിഡന്റ് ഡൊണാൾഡ് ട്രംപ് വ്യക്തമാക്കി. എന്നാൽ, “സാഹചര്യം ആവശ്യമെങ്കിൽ അമേരിക്ക ഇടപെട്ടേക്കാം” എന്ന് അദ്ദേഹം സൂചിപ്പിച്ചു. ഇന്ത്യൻ വിദേശകാര്യ മന്ത്രാലയം ഇരു രാജ്യങ്ങളോടും സംയമനം പാലിക്കാൻ ആവശ്യപ്പെട്ടു. “പശ്ചിമേഷ്യയിലെ സംഘർഷം വർദ്ധിക്കുന്നത് ആശങ്കാജനകമാണ്. എല്ലാ കക്ഷികളും സംയമനം പാലിക്കണം. സംഘർഷം വിപുലമായ പ്രാദേശിക യുദ്ധത്തിലേക്ക് വഴിവയ്ക്കാതിരിക്കാൻ നയതന്ത്രം ഉപയോഗിക്കണമെന്ന്,” മന്ത്രാലയം പ്രസ്താവനയിൽ അറിയിച്ചു.

As Israel-Iran airstrikes enter the third day, the Indian Embassy in Tel Aviv has urged all Indian nationals—including caregivers, nurses, students, and workers—to avoid unnecessary travel and follow local security instructions. The embassy emphasized that the safety of Indian citizens is its top priority and released 24x7 helpline numbers:
📞 +972 547520711
📞 +972 543278392

The embassy continues to monitor developments and remains in contact with Israeli authorities.