പൂനെ: മഹാരാഷ്ട്രയിലെ പൂനെ ജില്ലയിലെ കുഢ്മല ഗ്രാമത്തിന് സമീപം ഇന്ദ്രയാനി നദിക്ക് കുറുകെയുള്ള ഇരുമ്പ് പാലം തകർന്നുവീണ അപകടത്തിൽ രണ്ട് പേർ മരിച്ചു. നിരവധി പേർ ഒഴുക്കിൽപ്പെട്ടതായാണ് റിപ്പോർട്ട്. വാരാന്ത്യ അവധിയായതിനാൽ പാലത്തിൽ വിനോദസഞ്ചാരികൾ തിങ്ങിനിറഞ്ഞതും കനത്ത മഴയെ തുടർന്ന് ഇന്ദ്രയാനി നദിയിൽ ജലനിരപ്പ് ഉയർന്നതും വെള്ളത്തിന്റെ ശക്തമായ ഒഴുക്കും തകർച്ചയ്ക്ക് കാരണമായിരിക്കാമെന്നാണ് പ്രാഥമിക നിഗമനം. ഇതുവരെ 38 പേരെ രക്ഷപ്പെടുത്തിയതായി പൊലീസ് അറിയിച്ചു.

തലേഗാവിനടുത്തുള്ള ഇൻഡോരിയിൽ സ്ഥിതി ചെയ്യുന്ന ഈ പാലം, പ്രശസ്തമായ വിനോദസഞ്ചാര കേന്ദ്രമാണ്.സംഭവസമയത്ത് പാലത്തിൽ തിരക്കേറിയിരുന്നു. നാട്ടുകാരുടെ പ്രാഥമിക രക്ഷാപ്രവർത്തനത്തിനൊപ്പം പൊലീസും അഗ്നിശമന സേനയും ഉടൻ സ്ഥലത്തെത്തി. ദേശീയ ദുരന്ത നിവാരണ സേന (എൻഡിആർഎഫ്) രക്ഷാപ്രവർത്തനത്തിനായി എത്തിയിട്ടുണ്ട്.

ALSO READ: പൂനെയിൽ പാലം തകർന്നു: നിരവധി പേർ ഒഴുക്കിൽപ്പെട്ടു; രക്ഷാപ്രവർത്തനം തുടരുന്നു

പാലത്തിന്റെ ഘടനാപരമായ സുരക്ഷയെക്കുറിച്ച് നേരത്തെ താമസക്കാർ ആശങ്ക പ്രകടിപ്പിച്ചിരുന്നതായി റിപ്പോർട്ടുകൾ പറയുന്നു. എന്നാൽ, അപകടസാധ്യതയെക്കുറിച്ച് പല വിനോദസഞ്ചാരികൾക്ക് അറിവുണ്ടായിരുന്നില്ല.  മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ് ദുരന്തത്തിൽ ദുഃഖം രേഖപ്പെടുത്തി, രക്ഷാപ്രവർത്തനം പുരോഗമിക്കുകയാണ്,” അദ്ദേഹം പറഞ്ഞു. സംഭവത്തെക്കുറിച്ച് വിശദമായ അന്വേഷണം നടത്തുമെന്നും അദ്ദേഹം അറിയിച്ചു.