ഇറാനും ഇസ്റഈലും തമ്മിലുള്ള സംഘർഷം മൂന്നാം ദിവസവും ആശങ്ക വർധിപ്പിക്കുന്നു. ഇസ്റഈലിന്റെ വ്യോമാക്രമണങ്ങളിൽ ഇറാന്റെ ഊർജ്ജ കേന്ദ്രങ്ങളും താമസസ്ഥലങ്ങളും ലക്ഷ്യമിട്ടപ്പോൾ, ഇറാന്റെ മിസൈൽ ആക്രമണങ്ങളിൽ ഇസ്റഈലിൽ 10 പേർ കൊല്ലപ്പെട്ടു. ഇസ്റഈലിന്റെ വ്യോമ പ്രതിരോധ സംവിധാനത്തെ മറികടന്ന ഇറാനിയൻ മിസൈലുകൾ രാജ്യത്തിന്റെ കേന്ദ്ര ഭാഗങ്ങളിലെ കെട്ടിടങ്ങളെ തകർത്തു. ഇസ്റഈലിന്റെ ആക്രമണത്തിൽ ഇറാന്റെ റെവലുഷനറി ഗാർഡിന്റെ മിസൈൽ പദ്ധതി മേധാവി ജനറൽ അമീർ അലി ഹാജിസാദെ ഉൾപ്പെടെ 10 ഉന്നത ജനറല്മാർ കൊല്ലപ്പെട്ടു. ഈ നഷ്ടം ഇറാന്റെ സൈനിക കമാൻഡിന് വലിയ തിരിച്ചടിയാണ്.

കഴിഞ്ഞ രണ്ട് ദിവസത്തിനിടെ ഇറാനിൽ ഇസ്റഈൽ ആക്രമണങ്ങളിൽ 80 പേർ കൊല്ലപ്പെടുകയും 800 പേർക്ക് പരുക്കേൽക്കുകയും ചെയ്തു, ഇതിൽ 20 കുട്ടികളും ഉൾപ്പെടുന്നു. ഇസ്റഈലിൽ, ഇറാന്റെ രാത്രി ആക്രമണങ്ങളിൽ 10 പേർ കൊല്ലപ്പെട്ടതോടെ മൊത്തം മരണസംഖ്യ 13 ആയി.

 

 

വെള്ളിയാഴ്ച ഇറാന്റെ ആണവ, സൈനിക കേന്ദ്രങ്ങളിൽ ഇസ്റഈൽ നടത്തിയ ബോംബാക്രമണത്തിൽ ഉന്നത ജനറൽമാരും ആണവ ശാസ്ത്രജ്ഞരും കൊല്ലപ്പെട്ടതിനെ തുടർന്ന് സംഘർഷം രൂക്ഷമായി. ഇരു രാജ്യങ്ങളും പിന്മാറ്റത്തിന്റെ ലക്ഷണങ്ങൾ കാണിക്കുന്നില്ല.

ഇറാൻ വിദേശകാര്യ മന്ത്രി അബ്ബാസ് അരഗ്ചി പറഞ്ഞു. ഇസ്റഈൽ ആക്രമണം അവസാനിപ്പിച്ചാൽ, ഞങ്ങളുടെ പ്രതികരണവും അവസാനിക്കും, എന്നാൽ, ഇസ്റഈൽ പ്രധാനമന്ത്രി ബെഞ്ചമിൻ നെതന്യാഹു, ഇറാന് "വലിയ വില" നൽകേണ്ടിവരുമെന്ന് മുന്നറിയിപ്പ് നൽകി.

 

 

വ്യോമാതിർത്തി അടച്ചു; വിമാന സർവീസുകൾ റദ്ദാക്കി

സുരക്ഷാ ആശങ്കകൾ കണക്കിലെടുത്ത്, ഇസ്റഈലിന്റെ വ്യോമാതിർത്തി സിവിലിയൻ വിമാനങ്ങൾക്കായി അടച്ചു. "വരുന്നതോ പോകുന്നതോ ആയ വിമാനങ്ങൾ സർവീസ് നടത്തുന്നില്ല, ഇസ്റഈലിന്റെ ഗതാഗത, വിദേശകാര്യ മന്ത്രാലയങ്ങൾ സംയുക്ത പ്രസ്താവനയിൽ അറിയിച്ചു.

ഇസ്റഈൽ ഇറാന്റെ ഊർജ്ജ വ്യവസായവും പ്രതിരോധ മന്ത്രാലയ ആസ്ഥാനവും ലക്ഷ്യമിട്ട് വ്യാപകമായ ആക്രമണമാണ് നടത്തുന്നത്. ഇതിന് മറുപടിയായി, ടെഹ്റാനിൽ നിന്ന് പുതിയ മിസൈൽ ആക്രമണം ഇസ്റഈലിന് നേരെയും ഉണ്ടായി, ഇതിൽ നാല് പേർ കൊല്ലപ്പെട്ടതായാണ് റിപ്പോർട്ട്. ഗലീലി മേഖലയിലെ ഒരു അപ്പാർട്ട്മെന്റിലെ കെട്ടിടത്തിലാണ് നാല് മരണം സ്ഥിരീകരിച്ചത്.

ടെഹ്റാനിൽ സ്ഫോടനങ്ങൾ; ആണവ ചർച്ചകൾ റദ്ദാക്കി

ഇറാനിയൻ മിസൈലുകൾ ഇസ്റഈലിന്റെ ആകാശത്തേക്ക് പതിച്ചപ്പോൾ, ടെഹ്റാനിൽ പുതിയ സ്ഫോടനങ്ങൾ റിപ്പോർട്ട് ചെയ്തു. ഇറാന്റെ ആണവ പദ്ധതിയെക്കുറിച്ച് അമേരിക്കയുമായി നടത്താൻ നിശ്ചയിച്ചിരുന്ന ചർച്ചകൾ റദ്ദാക്കപ്പെട്ടു. ടെഹ്റാൻ ഈ ചർച്ചകളെ "അർത്ഥശൂന്യം" എന്ന് വിശേഷിപ്പിച്ചു.

ഇറാന്റെ ഊർജ്ജ വ്യവസായത്തിന് ഭീഷണി

ഇസ്റഈൽ ടെഹ്റാൻ സമീപത്തെ എണ്ണ ശുദ്ധീകരണശാലയും ബുഷെർ പ്രവിശ്യയിലെ മറ്റൊരു ശുദ്ധീകരണശാലയും ആക്രമിച്ചതായി അരഗ്ചി ആരോപിച്ചു. ഇറാന്റെ പ്രതികാര ആക്രമണങ്ങൾ ഇസ്റഈലിന്റെ "സാമ്പത്തിക" കേന്ദ്രങ്ങളെ ലക്ഷ്യമിട്ടാണെന്ന് അദ്ദേഹം വ്യക്തമാക്കി. ഈ ആക്രമണങ്ങൾ ഇറാന്റെ ഊർജ്ജ വ്യവസായത്തിന് വലിയ ഭീഷണിയായി, ആഗോള വിപണികളെ ബാധിച്ചേക്കാം.

 

 

അമേരിക്കയുടെ ഇടപെടൽ

ഇസ്റഈലിന് പൂർണ പിന്തുണ പ്രഖ്യാപിച്ച യുഎസ് പ്രസിഡന്റ് ഡൊണാൾഡ് ട്രംപ്, പുതിയ ആണവ കരാറിൽ ഒപ്പുവെച്ചാൽ മാത്രമേ ഇറാന് നാശനഷ്ടം ഒഴിവാക്കാനാകൂ എന്ന് മുന്നറിയിപ്പ് നൽകി. എന്നാൽ, ഒമാനിൽ നടക്കേണ്ടിയിരുന്ന ചർച്ചകൾ റദ്ദാക്കപ്പെട്ടു.