ഇടുക്കി: ചെമ്മണ്ണാറില്‍ ശക്തമായ മഴയില്‍ കവുങ്ങ് മുറിഞ്ഞു വീടിനു മുകളിലേക്ക് വീണു മൂന്നു വയുസുള്ള കുട്ടിക്ക് പരിക്കേറ്റു. ചെമ്മണ്ണാര്‍ സ്വദേശിയായ സനിഷിന്റെ മകന്‍ ക്രിസ്റ്റിക്കാണ് പരിക്കേറ്റത്. രാവിലെ അഞ്ചു മണിയോടെയാണ് അപകടം സംഭവിച്ചത്. കിടപ്പു മുറിക്കു മുകളിലേക്കാണ് കവുങ്ങ് ഒടിഞ്ഞു വീണത്.

ആസ്ബറ്റോസ് ഷീറ്റിന്റെ പാളി വീണാണ് കുഞ്ഞിനു പരിക്കേറ്റത്. ഈ സമയത്ത് സനീഷും ഭാര്യയും കുഞ്ഞും റൂമിലുണ്ടായിരുന്നു. ചിന്നക്കനാല്‍ ബിയല്‍റാമില്‍ ശക്തമായ കാറ്റില്‍ മരങ്ങള്‍ ഒടിഞ്ഞു വീഴുകയും വൈദ്യുതി തടസ്സപ്പെടുകയും ചെയ്തു. സംസ്ഥാനത്ത് അതി തീവ്രമഴ തുടരുകയാണ്.

ഇന്ന് അഞ്ചുജില്ലകളില്‍ റെഡ് അലര്‍ട്ടും 3 ജില്ലകളില്‍ യെല്ലോ അലര്‍ട്ടും പ്രഖ്യാപിച്ചു. മലപ്പുറത്തും വയനാടും കോഴിക്കോടും കണ്ണൂരും കാസര്‍കോഡുമാണ് റെഡ് അലര്‍ട്ട്. 11 ജില്ലകളില്‍ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധി പ്രഖ്യാപിച്ചു. കണ്ണൂരില്‍ കനത്ത മഴയില്‍ ബാവലി പുഴയില്‍ കുളിക്കാനിറങ്ങിയ യുവാവിനെ കാണാതായി. താഴ്ന്ന പ്രദേശങ്ങളില്‍ വെള്ളം കയറുകയും ചെയ്തു.