ഡെറാഡൂണ്‍: ഉത്തരാഖണ്ഡില്‍ ഹെലികോപ്ടര്‍ തകര്‍ന്ന് ഏഴുപേര്‍ മരിച്ച സംഭവത്തില്‍ ഹെലികോപ്ടര്‍ കമ്പനിക്ക് ഗുരുതര വീഴ്ച്ചയുണ്ടായതായി കണ്ടെത്തല്‍. കാലാവസ്ഥ പ്രതികൂലമാണെന്ന് അറിഞ്ഞിട്ടും, നിശ്ചയിച്ചതിനും 50 മിനുട്ട് മുന്‍പേ ഹെലികോപ്ടര്‍ ടേക്ക് ഓഫ് ചെയ്‌തെന്നാണ് കണ്ടെത്തല്‍. 

പ്രദേശത്ത് കനത്ത മൂടല്‍മഞ്ഞ് രൂപപ്പെട്ട സാഹചര്യത്തിലും സര്‍വീസ് തുടരാന്‍ കമ്പനി തീരുമാനിക്കുകയായിരുന്നു. സംഭവത്തില്‍ കമ്പനിയുടെ ഓപ്പറേഷനല്‍ മാനേജരടക്കം രണ്ടുപേര്‍ക്കെതിരെ മനപൂര്‍വ്വമല്ലാത്ത നരഹത്യക്ക് കേസെടുത്തു.

ഞായറാഴ്ച്ച പുലര്‍ച്ചെ 5.20ഓടെയാണ് കേദാര്‍നാഥില്‍ നിന്ന് ഗുപ്തകാശിയിലേക്ക് പോയ ഹെലികോപ്ടര്‍ തകര്‍ന്ന് വീണത്. ഉത്തരാഖണ്ഡിലെ ഗൗരികുണ്ഡിന് സമീപമാണ് അപകടമുണ്ടായത്. ഗുപ്തകാശിയില്‍ നിന്ന് പുലര്‍ച്ചെ 05:10ന് ഹെലികോപ്റ്റര്‍ പറന്നുയര്‍ന്ന് 05:18ന് കേദാര്‍നാഥ് ഹെലിപാഡില്‍ ഇറങ്ങി. 05:19ന് ഹെലികോപ്റ്റര്‍ വീണ്ടും പറന്നുയര്‍ന്ന് ഗൗരികുണ്ഡിന് സമീപം തകര്‍ന്നുവീഴുകയായിരുന്നു. ആര്യന്‍ ഏവിയേഷന്‍ ഗുപ്തകാശി സര്‍വീസ് നടത്തുന്ന ഹെലികോപ്റ്ററാണ് തകര്‍ന്നുവീണത്.

ALSO READ: കേരള കോൺഗ്രസ് പിളർപ്പിലേക്ക്; പി.ജെ ജോസഫിന്റെ മകൻ അപു ജോസഫിനെതിരേ പടയൊരുക്കം 

ഹെലികോപ്റ്ററില്‍ ഏഴ് പേര്‍ ഉണ്ടായിരുന്നുവെന്ന് എന്‍ഡിആര്‍എഫ് വൃത്തങ്ങള്‍ അറിയിച്ചു. പൈലറ്റ് രാജ്വീര്‍, ബികെടിസിയിലെ താമസക്കാരനായ വിക്രം റാവത്ത്, റാസി ഉഖിമത്ത്, വിനോദ്, ട്രിസ്റ്റ് സിംഗ്, രാജ്കുമാര്‍, ശ്രദ്ധ, 10 വയസ്സുകാരിയായ റാഷി എന്നിവരാണ് ഹെലികോപ്റ്ററില്‍ ഉണ്ടായിരുന്നത്. സംഭവത്തില്‍ ഏഴ് പേര്‍ കൊല്ലപ്പെട്ടതായി ഉദ്യോഗസ്ഥര്‍ വാര്‍ത്താ ഏജന്‍സിയായ പിടിഐയോട് പറഞ്ഞു. അപകടത്തില്‍ ഉത്തരാഖണ്ഡ് മുഖ്യമന്ത്രി പുഷ്‌കര്‍ സിംഗ് ധാമി അനുശോചനം രേഖപ്പെടുത്തി.