അബൂദബി: യുഎഇയില്‍ കാലാവസ്ഥാ മാറ്റത്തിന് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു. വേനല്‍ തുടരുന്നുണ്ടെങ്കിലും, അബൂദബിയുള്‍പ്പെടെ യുഎഇയിലെ പല പ്രദേശങ്ങളിലും ഇന്ന് രാവിലെ കനത്ത മൂടല്‍മഞ്ഞ് രൂപപ്പെട്ടു. ഇതിനെത്തുടര്‍ന്ന് കാലാവസ്ഥാ കേന്ദ്രം റെഡ്, യെല്ലോ അലേര്‍ട്ടുകള്‍ പുറപ്പെടുവിച്ചു.

ALSO READ: ഇറാൻ-ഇസ്രായേൽ സംഘർഷം: അബൂദബി വിമാനത്താവളത്തിൽ വിമാന സർവിസുകൾ തടസ്സപ്പെട്ടു

മൂടല്‍മഞ്ഞ് മൂലം ചില പ്രദേശങ്ങളില്‍ ദൃശ്യപരത ഗണ്യമായി കുറയുമെന്നും നാളെ രാവിലെയോടെ മൂടല്‍ മഞ്ഞ് കുറഞ്ഞേക്കുമെന്നും മുന്നറിയിപ്പില്‍ വ്യക്തമാക്കി. അല്‍ ദഫ്‌റ മേഖലയിലെ അല്‍ റുവൈസ്, ഗയാത്തി റോഡ്, ബു ഹംറ, ഔതൈദ്, ബു ഹസ, ഹമീം, അബൂദബിയിലെ അല്‍ വത്ബ, അല്‍ ഐന്‍, അബൂദബി റോഡ്, അല്‍ അജ്ബാന്‍ തുടങ്ങിയ പ്രദേശങ്ങളിലാണ് കനത്ത മൂടല്‍ മഞ്ഞ് അനുഭവപ്പെട്ടത്.

ഈ സാഹചര്യത്തില്‍ വാഹനമോടിക്കുന്നവര്‍ വേഗത കുറയ്ക്കണമെന്നും ജാഗ്രത പാലിക്കണമെന്നും അബൂദബി പൊലിസ് അറിയിച്ചു. ഇലക്ട്രോണിക് ഇന്‍ഫര്‍മേഷന്‍ ബോര്‍ഡുകളില്‍ പ്രദര്‍ശിപ്പിച്ച വേഗപരിധി കര്‍ശനമായി പാലിക്കണമെന്നും നിര്‍ദേശിച്ചു.

അതേസമയം, യുഎഇയുടെ ഉള്‍പ്രദേശങ്ങളില്‍ താപനില 44 മുതല്‍ 48°C വരെയും, തീരപ്രദേശങ്ങളിലും ദ്വീപുകളിലും 40 മുതല്‍ 45°C വരെയും, പര്‍വതപ്രദേശങ്ങളില്‍ 35 മുതല്‍ 40°C വരെയും ഉയരാന്‍ സാധ്യതയുണ്ട്. വരും ദിവസങ്ങളില്‍ പകല്‍ താപനില ഉയരുകയും പുലര്‍ച്ചെ മൂടല്‍മഞ്ഞ് രൂപപ്പെടുകയും ചെയ്യുമെന്നും നേരിയതോ മിതമായതോ ആയ കാറ്റിനൊപ്പം പൊടിക്കാറ്റിന് സാധ്യതയുണ്ടെന്നും മുന്നറിയിപ്പില്‍ പറയുന്നു.

ALSO READ: ഒമാന്‍ ഉള്‍ക്കടലില്‍ കപ്പലുകൾ കൂട്ടിയിടിച്ച് അപകടം; 24 പേരെ രക്ഷപ്പെടുത്തി യുഎഇ 

നാഷണല്‍ സെന്റര്‍ ഓഫ് മെറ്റീരിയോളജിയുടെ റിപ്പോര്‍ട്ട് പ്രകാരം, അല്‍ ഐനിലെ സ്വെയ്ഹാനില്‍ താപനില 50.1°Cല്‍ എത്തി. ഇന്ന് രേഖപ്പെടുത്തിയ ഏറ്റവും കുറഞ്ഞ താപനില അല്‍ ദഫ്‌റ മേഖലയിലെ ബറാക്ക 2ലെ 21.8°C ആണ്.

Dense fog disrupts visibility across Abu Dhabi as the Meteorological Department issues an alert. Drivers are urged to exercise caution due to low visibility and changing weather conditions.