തെഹ്റാന്‍: ഇറാന്റെ ഫോർഡോ ആണവ കേന്ദ്രത്തിന് നേരെ ഇസ്റാഈൽ നടത്തിയ ആക്രമണം മേഖലയിൽ യുദ്ധഭീതി വർധിപ്പിക്കുന്നു. തെഹ്റാന്റെ തെക്കുഭാഗത്ത് കനത്ത സുരക്ഷയുള്ള യുറേനിയം സമ്പുഷ്ടീകരണ പ്ലാന്റാണ് ഫോർഡോ. മുൻ ഇസ്റാഈലി നയതന്ത്രജ്ഞനും നിരീക്ഷകനുമായ അലോൺ പിങ്കാസ് അൽ ജസീറയോട് പറഞ്ഞത് പ്രകാരം അമേരിക്കൻ സൈന്യം ഇടപെടാതെ ഇറാന്റെ ഭീഷണി നിർവീര്യമാക്കാൻ ഇസ്റാഈലിന് കഴിയില്ലെന്നാണ്.

ഇറാന്റെ ആണവ-സൈനിക സൗകര്യങ്ങൾ ഒറ്റയ്ക്ക് തകർക്കാൻ ഇസ്റാഈലിന് ശേഷി ഇല്ല. ഇതിന് ബോംബറുകളും ഡെലിവറി സംവിധാനങ്ങളും ആവശ്യമാണ്. അതുകൊണ്ടാണ് പ്രധാനമന്ത്രി ബെഞ്ചമിൻ നെതന്യാഹു യുഎസിനെ യുദ്ധത്തിലേക്ക് വലിച്ചിഴയ്ക്കാൻ ശ്രമിക്കുന്നത്," പിങ്കാസ് വ്യക്തമാക്കി. അമേരിക്കയുടെ ഇടപെടൽ ഇല്ലെങ്കിൽ ഇസ്റാഈലിന്റെ തന്ത്രം പരാജയപ്പെടുമെന്നും അദ്ദേഹം കൂട്ടിച്ചേർത്തു.

അതേസമയം, ഇറാൻ ചർച്ചകൾക്ക് തയ്യാറാണെന്ന് ഇറാനിയൻ സുരക്ഷാ ഉദ്യോഗസ്ഥൻ വെളിപ്പെടുത്തി. എന്നാൽ, അവരുടെ 'ചുവന്ന വരകൾ' പരിഗണിക്കപ്പെടണമെന്നാണ് വ്യവസ്ഥ. ഇസ്റാഈലിന്റെ നിലവിലെ തന്ത്രം ലക്ഷ്യങ്ങൾ കൈവരിച്ചിട്ടില്ലെന്നും പുതിയ ആക്രമണ മാർഗങ്ങൾ തേടുകയാണെന്നും ഉദ്യോഗസ്ഥൻ ചൂണ്ടിക്കാട്ടി. അമേരിക്കയുടെ ഏതൊരു ഇടപെടലും മേഖലയെ മുഴുവൻ യുദ്ധത്തിലേക്ക് തള്ളിവിടുമെന്നും അദ്ദേഹം മുന്നറിയിപ്പ് നൽകി.

ഇസ്റാഈലിന്റെ ആക്രമണം ആണവ മലിനീകരണ ഭീഷണി വർധിപ്പിക്കുന്നതായി ഐക്യരാഷ്ട്രസഭയുടെ ആണവ നിരീക്ഷണ സമിതി തലവൻ റാഫേൽ ഗ്രോസി ആശങ്ക പ്രകടിപ്പിച്ചു. ഇറാന്റെ നാറ്റാൻസ് ആണവ കേന്ദ്രത്തിലെ കേടുപാടുകൾ റേഡിയോളജിക്കൽ, കെമിക്കൽ മലിനീകരണത്തിന് കാരണമാകുമെന്നാണ് മുന്നറിയിപ്പ്.

മെയ് മാസത്തിൽ ഇന്ത്യ-പാകിസ്ഥാൻ സംഘർഷവും യൂറോപ്പിലെ സപോരിജിയ ആണവ നിലയത്തിന്റെ നിയന്ത്രണത്തിനായുള്ള റഷ്യ-ഉക്രെയ്ൻ തർക്കവും ആണവ വികിരണ ഭീഷണിയെ സൂചിപ്പിക്കുന്നതിനിടെയാണ് ഇസ്റാഈലിന്റെ ആക്രമണം. ആഗോള സമൂഹവും ആണവോർജ്ജ നിയന്ത്രണ ഏജൻസികളും ഇതിനെതിരെ ആശങ്കയിലാണ്.