കോപ്പൻഹേഗൻ: ഹോർമുസ് കടലിടുക്കിലൂടെയുള്ള കപ്പൽ ഗതാഗതം തുടരുമെന്ന് ഡാനിഷ് ഷിപ്പിംഗ് കമ്പനിയായ മെഴ്‌സ്ക് അറിയിച്ചു. എന്നാൽ, മേഖലയിലെ സുരക്ഷാ സാഹചര്യങ്ങൾ വിലയിരുത്തി കപ്പലുകളുടെ സുരക്ഷ ഉറപ്പാക്കാൻ പുനഃപരിശോധന നടത്താൻ തയ്യാറാണെന്നും കമ്പനി വ്യക്തമാക്കി.

ഹോർമുസ് കടലിടുക്കിലൂടെ സഞ്ചരിക്കുന്ന ഞങ്ങളുടെ കപ്പലുകളുടെ സുരക്ഷാ അപകടസാധ്യതകൾ ഞങ്ങൾ നിരന്തരം നിരീക്ഷിക്കുന്നു. ആവശ്യമെങ്കിൽ ഉചിതമായ നടപടികൾ സ്വീകരിക്കാൻ തയ്യാറാണ്," മെഴ്‌സ്ക് ഇന്ന് പുറത്തിറക്കിയ പ്രസ്താവനയിൽ പറഞ്ഞു.

ജൂൺ 13 മുതൽ ഇസ്റാഈൽ ഇറാനിൽ നടത്തിവരുന്ന അപ്രതീക്ഷിത വ്യോമാക്രമണങ്ങളും, ഇറാനിലെ ആണവകേന്ദ്രങ്ങളിൽ യു.എസ്. നടത്തിയ രാത്രികാല ആക്രമണവും മേഖലയിൽ ഉയർന്ന ജാഗ്രതയ്ക്ക് കാരണമായിട്ടുണ്ട്. ആഗോള ഊർജ വിതരണത്തിന്റെ 20 ശതമാനവും കടന്നുപോകുന്ന ഹോർമുസ് കടലിടുക്കിൽ എണ്ണ, വാതക പ്രവാഹം തടസ്സപ്പെടുമോ എന്ന ആശങ്കയിൽ നിക്ഷേപകരും ഊർജ വിപണികളും ഉറ്റുനോക്കുകയാണ്.

നിലവിലെ വിവരങ്ങളുടെ അടിസ്ഥാനത്തിൽ ഞങ്ങൾ ഹോർമുസ് കടലിടുക്കിലൂടെയുള്ള ഗതാഗതം തുടരും. എന്നാൽ, സുരക്ഷാ സാഹചര്യങ്ങൾ വിലയിരുത്തി ആവശ്യമെങ്കിൽ നടപടികൾ സ്വീകരിക്കും," മെഴ്‌സ്ക് പ്രസ്താവനയിൽ വ്യക്തമാക്കി.