തിരുവനന്തപുരം: ശ്രീ പത്മനാഭസ്വാമി ക്ഷേത്രത്തിൽ വീണ്ടും മോഷണശ്രമം. ക്ഷേത്രത്തിനായി എത്തിച്ച 25 ലിറ്റർ മിൽമ പാൽ പുറത്തേക്ക് കടത്താൻ ശ്രമിച്ച സംഭവത്തിൽ അസിസ്റ്റന്റ് സ്റ്റോർ കീപ്പർ സുനിൽകുമാറിനെതിരെ അന്വേഷണം ആരംഭിച്ചു.

തുടർച്ചയായി പാൽ മോഷണം നടക്കുന്നുവെന്ന പരാതിയെ തുടർന്ന് ക്ഷേത്ര വിജിലൻസ് വിഭാഗം നിരീക്ഷണം ശക്തമാക്കിയിരുന്നു. മിൽമയിൽ നിന്ന് എത്തിച്ച പാൽ ക്ഷേത്രത്തിനകത്തേക്ക് കൊണ്ടുപോകുന്നതിന് പകരം പുറത്തേക്ക് കടത്താൻ ശ്രമിക്കുകയായിരുന്നു. പൊലീസിന്റെ ശ്രദ്ധയിൽപ്പെട്ടതോടെ, ജീവനക്കാരൻ പാൽ വണ്ടിയിൽ തിരികെ ക്ഷേത്രത്തിനുള്ളിൽ എത്തിച്ച് വെക്കുകയായിരുന്നു.

സിസിടിവി ദൃശ്യങ്ങൾ ഉൾപ്പെടെ വിശദമായി പരിശോധിച്ചാണ് അന്വേഷണം പുരോഗമിക്കുന്നത്. ക്ഷേത്ര വിജിലൻസ് ഓഫീസറുടെ നേതൃത്വത്തിലാണ് അന്വേഷണം നടക്കുന്നത്.