കുവൈത്ത് സിറ്റി: അതിര്‍ത്തി നടപടിക്രമങ്ങള്‍ ലളിതവും കാര്യക്ഷമവുമാക്കുന്നതിനും പ്രാദേശിക ഗതാഗതം പ്രോത്സാഹിപ്പിക്കുന്നതിനുമായി കുവൈത്ത്, കരമാര്‍ഗം രാജ്യത്ത് പ്രവേശിക്കുന്ന യാത്രക്കാര്‍ക്ക് 7 ദിവസത്തെ ട്രാന്‍സിറ്റ് വിസ അനുവദിക്കാന്‍ തീരുമാനിച്ചു. ഗള്‍ഫ് പൗരന്മാര്‍, ജിസിസി നിവാസികള്‍, യൂറോപ്യന്‍ പൗരന്മാര്‍, നയതന്ത്ര ഉദ്യോഗസ്ഥര്‍, പ്രത്യേകിച്ച് ഇറാഖില്‍ നിന്നോ ഇറാന്‍ വഴിയോ എത്തുന്നവര്‍ എന്നിവര്‍ക്കാകും ഈ വിസ ലഭ്യമാകുക.

ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അല്‍ യൂസഫിന്റെ നിര്‍ദേശപ്രകാരമാണ് പുതിയ തീരുമാനം. അബ്ദാലി ബോര്‍ഡര്‍ ക്രോസിംഗ് അഡ്മിനിസ്‌ട്രേഷന്‍ ഡയറക്ടര്‍ കേണല്‍ വലീദ് അല്‍ അസ്മി, കുവൈത്ത് ടിവിയിലെ അല്‍ അഖ്ബര്‍ പ്രോഗ്രാമിന് നല്‍കിയ അഭിമുഖത്തില്‍ വെച്ചാണ് പദ്ധതി പ്രഖ്യാപിച്ചത്. അബ്ദാലി അതിര്‍ത്തി വഴി കരമാര്‍ഗം കുവൈത്തിലെത്തുന്ന യാത്രക്കാര്‍ക്ക് മെച്ചപ്പെട്ട സൗകര്യം ഉറപ്പാക്കാനാണ് ഈ നീക്കമെന്നും അദ്ദേഹം വ്യക്തമാക്കി.

ALSO READ: Israel-Iran conflict LIVE: കുവൈത്തില്‍ ഷെല്‍ട്ടറുകള്‍, ബഹ്‌റൈനില്‍ വര്‍ക്ക് ഫ്രം ഹോം, റേഡിയോ ആക്ടീവ് ഇഫക്റ്റുകളില്ലെന്ന് സഊദിയും ഖത്തറും; ഗള്‍ഫ് രാജ്യങ്ങളുടെ നീക്കം ഇങ്ങനെ

പുതിയ ട്രാന്‍സിറ്റ് വിസ യോഗ്യരായ യാത്രക്കാര്‍ക്ക് കുവൈത്തില്‍ 7 ദിവസം വരെ തങ്ങാന്‍ അനുമതി നല്‍കുന്നു. അബ്ദാലി തുറമുഖത്തിനും കുവൈത്ത് അന്താരാഷ്ട്ര വിമാനത്താവളത്തിനും ഇടയില്‍ യാത്ര ചെയ്യാനും മുന്നോട്ടുള്ള യാത്രാ ക്രമീകരണങ്ങള്‍ ഒരുക്കാനും ഇത് സഹായിക്കും. ആഭ്യന്തര, വിദേശകാര്യ മന്ത്രാലയങ്ങള്‍ ഏകോപിപ്പിച്ച പ്രത്യേക ഇളവുകള്‍ പ്രകാരം കുവൈത്തിലെ പ്രവാസികള്‍ക്കും വിസ ലഭിക്കും.

'ദേശീയ സുരക്ഷ ഉറപ്പാക്കിക്കൊണ്ട് അതിര്‍ത്തി കടക്കുന്നതിന്റെ ഫ്‌ളെക്‌സബിലിറ്റി വര്‍ധിപ്പിക്കുകയാണ് ലക്ഷ്യം,' കേണല്‍ അല്‍ അസ്മി പറഞ്ഞു. 'നയതന്ത്ര ഉദ്യോഗസ്ഥര്‍ക്കും എംബസി പ്രതിനിധികള്‍ക്കും അവരുടെ പൗരന്മാര്‍ക്ക് പ്രവേശനനിര്‍ഗമന നടപടിക്രമങ്ങളില്‍ സഹായം നല്‍കാന്‍ ഈ നടപടി സഹായകമാകും.'

അബ്ദാലി ക്രോസിംഗില്‍ നിലയുറപ്പിച്ച ആഭ്യന്തര മന്ത്രാലയ ടീമുകള്‍ക്കാണ് വിസ നടപടിക്രമങ്ങള്‍ വേഗത്തിലും പ്രൊഫഷണലായും നടപ്പാക്കാനുള്ള ചുമതല. മാനുഷിക, നയതന്ത്ര പരിഗണനകളില്‍ യോഗ്യത നേടുന്നവര്‍ക്ക് മുന്‍ഗണന നല്‍കുമെന്നും അദ്ദേഹം കൂട്ടിച്ചേര്‍ത്തു.

Kuwait has introduced a 7-day transit visa for GCC residents and European nationals, aiming to boost tourism and facilitate smoother travel. The new policy is expected to enhance regional connectivity and attract more short-term visitors through Kuwait's international airports.