തെഹ്റാൻ: ഇറാനിലെ ഫോർഡോ ആണവ കേന്ദ്രത്തിനു സമീപം ഇസ്റാഈൽ സൈന്യം ആക്രമണം നടത്തിയതായി സ്ഥിരീകരിച്ചു. കഴിഞ്ഞ ദിവസം യുഎസ് ഫോർഡോ കേന്ദ്രത്തിനു നേരെ ആക്രമണം നടത്തിയതിനു പിന്നാലെ, കേന്ദ്രത്തിലേക്കുള്ള "പ്രവേശന പാതകൾ തടസ്സപ്പെടുത്താൻ" ലക്ഷ്യമിട്ടാണ് ആക്രമണം നടത്തിയതെന്ന് ഇസ്റാഈൽ സൈന്യം പ്രസ്താവനയിൽ അറിയിച്ചു. ഫോർഡോയിലേക്കുള്ള ഒരു "ആക്സസ് റോഡ്" ആണ് ആക്രമണ ലക്ഷ്യമെന്ന് ഇസ്റാഈൽ ആർമി റേഡിയോ, പേര് വെളിപ്പെടുത്താത്ത സുരക്ഷാ സ്രോതസ്സിനെ ഉദ്ധരിച്ച് റിപ്പോർട്ട് ചെയ്തു.

വടക്കുപടിഞ്ഞാറൻ ഇറാനിലെ ക്വോം നഗരത്തിന് 30 കിലോമീറ്റർ വടക്കുകിഴക്കായി, ഒരു പർവതത്തിനുള്ളിൽ നൂറുകണക്കിന് മീറ്റർ ആഴത്തിലാണ് ഫോർഡോ ആണവ കേന്ദ്രം സ്ഥിതി ചെയ്യുന്നത്. 2023-ൽ നടന്ന ഒരു അപ്രഖ്യാപിത പരിശോധനയിൽ, ആയുധ-ഗ്രേഡ് ശുദ്ധതയുള്ള യുറേനിയം കണികകൾ ഈ കേന്ദ്രത്തിൽ നിന്ന് ഐഎഇഎ പരിശോദകർ കണ്ടെത്തിയിരുന്നു.

ALSO READ: ഇറാനിലെ സർക്കാർ, സൈനിക കേന്ദ്രങ്ങൾ ലക്ഷ്യമിട്ട് ഇസ്റാഈൽ വ്യോമാക്രമണം: കുപ്രസിദ്ധമായ എവിൻ ജയിലിന് നേരെയും ആക്രമണം

അതേസമയം, തെഹ്റാനിലെ കുപ്രസിദ്ധമായ എവിൻ ജയിലിനു നേരെയും ഇസ്റാഈൽ വ്യോമാക്രമണം നടത്തി. ആക്രമണത്തിൽ ജയിലിന്റെ നാശനഷ്ടത്തിന്റെ വ്യാപ്തി വ്യക്തമല്ല. എന്നാൽ, സ്ഥിതി നിയന്ത്രണവിധേയമാണെന്നും അസ്വസ്ഥതയെക്കുറിച്ചുള്ള അഭ്യൂഹങ്ങൾ അടിസ്ഥാനരഹിതമാണ്" എന്നും ഇറാൻ ജുഡീഷ്യറി അറിയിച്ചു. ജയിൽ ലക്ഷ്യമിട്ട ആക്രമണം അന്താരാഷ്ട്ര നിയമങ്ങളുടെ "നഗ്നമായ ലംഘനമാണ്" എന്ന് അവർ കൂട്ടിച്ചേർത്തു.

ഇസ്റാഈലിന്റെ വ്യോമാക്രമണങ്ങളിൽ ഇതുവരെ 13 കുട്ടികൾ കൊല്ലപ്പെട്ടതായി ഇറാൻ ആരോഗ്യ മന്ത്രാലയം വ്യക്തമാക്കി. ജൂൺ 13 മുതൽ തുടങ്ങിയ ആക്രമണങ്ങളിൽ, ഏറ്റവും ഇളയ ഇരയ്ക്ക് "വെറും രണ്ട് മാസം പ്രായമുള്ള കുഞ്ഞാണ്" എന്ന് മന്ത്രാലയത്തിന്റെ പബ്ലിക് റിലേഷൻസ് മേധാവി ഹൊസൈൻ കെർമൻപോർ സോഷ്യൽ മീഡിയ പോസ്റ്റിൽ പറഞ്ഞു. 44 സ്ത്രീകൾ, അതിൽ രണ്ട് ഗർഭിണികളും, കൊല്ലപ്പെട്ടതായും അദ്ദേഹം അറിയിച്ചു.

ശനിയാഴ്ചത്തെ മറ്റൊരു പോസ്റ്റിൽ, സംഘർഷം തുടങ്ങിയതിനു ശേഷം 400-ലധികം പേർ കൊല്ലപ്പെടുകയും 3,056 പേർക്ക് പരുക്കേൽക്കുകയും ചെയ്തതായി കെർമൻപോർ വെളിപ്പെടുത്തി. "മരണപ്പെട്ടവരും പരുക്കേറ്റവരും ഭൂരിഭാഗം സാധാരണക്കാരാണ്," അദ്ദേഹം വ്യക്തമാക്കി.

എവിൻ ജയിൽ, ഇരട്ട പൗരത്വമുള്ളവർ ഉൾപ്പെടെയുള്ള നിരവധി രാഷ്ട്രീയ തടവുകാരെ പാർപ്പിക്കുന്നതിനും പാശ്ചാത്യ രാജ്യങ്ങളുമായി തടവുകാരെ കൈമാറുന്നതിനും ഇറാൻ ഉപയോഗിക്കുന്ന കേന്ദ്രമാണ്. കഴിഞ്ഞ ദിവസം യുഎസ് ഇറാന്റെ ആണവ കേന്ദ്രങ്ങൾ ആക്രമിച്ചതിനു പിന്നാലെ, ഇറാൻ ഇസ്റാഈലിനു നേരെ മിസൈലുകളും ഡ്രോണുകളും ഉപയോഗിച്ച് തിരിച്ചടിച്ചിരുന്നു.