നിലമ്പൂര്‍: ഉപതെരഞ്ഞെടുപ്പ് ഫലം പുറത്തുവന്നതിന് പിന്നാലെ യുഡിഎഫ് പ്രവേശന സാധ്യതകള്‍ സജീവമാക്കി പിവി അന്‍വര്‍. തന്നെ യുഡിഎഫിലേക്ക് എടുക്കുകയാണെങ്കില്‍ അടുത്ത നിയമസഭാ തിരഞ്ഞെടുപ്പില്‍ മുഹമ്മദ് റിയാസിനെതിരെ ബേപ്പൂരില്‍ മത്സരിക്കുമെന്ന് അന്‍വര്‍ പറഞ്ഞു. പിണറായിസവും, മരുമോനിസവുമാണ് ഇവിടുത്തെ വെല്ലുവിളിയെന്നും, അത് ഇനിയും മനസിലാക്കിയില്ലെങ്കില്‍ പശ്ചിമ ബംഗാളിലെ അവസ്ഥ ഇവിടെ വരുമെന്നും അന്‍വര്‍ വാര്‍ത്താ സമ്മേളനത്തില്‍ പറഞ്ഞു. 

വിഡി സതീശനുമായി വ്യക്തിപരമായ വിരോധമില്ലെന്ന് അന്‍വര്‍ പറഞ്ഞു. വീണ്ടും ചര്‍ച്ച നടത്താന്‍ മടിയില്ലെന്നും, രാഷ്ട്രീയം എന്നത് ഒരു നിമിഷം കൊണ്ട് അവസാനിക്കുന്നതല്ലെന്നും അന്‍വര്‍ കൂട്ടിച്ചേര്‍ത്തു. 

നിലമ്പൂരില്‍ ജയിക്കേണ്ടത് ആന്റി പിണറായിസമാണ്. പിണറായിയുടെ കുടുംബാധിപത്യമാണ്, മരുമോനിസമാണ് ഇവിടെ ശരിയല്ലാത്തത്. ആറ് വരിപ്പാത 12 വരിയാക്കാന്‍ മരുമോന്‍ നടത്തിയ ഗിമിക്ക് നമ്മള്‍ കണ്ടതാണ്. എത്ര കോടികളാണ് അടിച്ച് മാറ്റിയത്. ഇവിടുത്തെ വിഷയം എസ്എഫ് ഒയാണ്. ഒരു പണിയുമെടുക്കാതെ ശമ്പളവും, കമ്മീഷനും പറ്റുന്ന മുഖ്യമന്ത്രിയുടെ കുടുംബം തന്നെയാണ് ഇവിടെ പ്രശ്‌നം. 

നല്ലൊരു തീരുമാനത്തിലേക്ക് യുഡിഎഫ് എത്തുകയാണെങ്കില്‍, പിണറായിസത്തിന്റെ വേരറുക്കാന്‍ 2026 മേയില്‍ നടക്കുന്ന തിരഞ്ഞെടുപ്പില്‍ ബേപ്പൂരില്‍ ഞാന്‍ മത്സരിക്കും. അവര്‍ ആലോചിക്കട്ടെ,' പിവി അന്‍വര്‍ പറഞ്ഞു. 

ALSO READ: ഇറാനിലെ ഫോർഡോ ആണവ കേന്ദ്രത്തിനു സമീപം ഇസ്റാഈൽ ആക്രമണം 

നിലമ്പൂര്‍ ഉപതെരഞ്ഞെടുപ്പ് അന്തിമ ഫലം പുറത്തുവന്നപ്പോള്‍ 11,077 വോട്ടിന്റെ വമ്പിച്ച ഭൂരിപക്ഷത്തില്‍ യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത് വിജയിച്ചു. ആകെ വോട്ട് 77,737. രണ്ടാമതെത്തിയ എല്‍ഡിഎഫ് സ്ഥാനാര്‍ഥി എം സ്വരാജിന് 66660 വോട്ടുകള്‍ മാത്രമാണ് നേടാനായത്. ശക്തമായ പ്രചരണം നടന്ന മത്സരത്തില്‍ സ്വതന്ത്ര സ്ഥാനാര്‍ഥിയായി മത്സരിച്ച പിവി അന്‍വര്‍ 19,760 വോട്ടുകള്‍ നേടി കരുത്ത് തെളിയിച്ചു. 

ആര്യാടന്‍ മുഹമ്മദിന്റെ കുത്തക മണ്ഡലമായ നിലമ്പൂര്‍ 2016 ലെ തിരഞ്ഞെടുപ്പില്‍ എല്‍ഡിഎഫ് സ്വതന്ത്രനായി മത്സരിച്ച പിവി അന്‍വര്‍ ജയിച്ച് കയറുകയായിരുന്നു. പിന്നീട് നടന്ന 2021ലെ തെരഞ്ഞെടുപ്പിലും പിവി അന്‍വര്‍ തന്നെ നിയമസഭയിലെത്തി. അതുകൊണ്ട് ഇത്തവണ എന്ത് വിലകൊടുത്തും മണ്ഡലം തിരിച്ച് പിടിക്കാനാണ് യുഡിഎഫ് ഇറങ്ങിതിരിച്ചത്.  ശക്തമായ പോരാട്ടമെന്ന പ്രതീതി പ്രചാരണ സമയത്ത് നിലനിന്നിരുന്നെങ്കിലും അതെല്ലാം വെറുതെയാണെന്നാണ് തുടക്കം മുതലുള്ള ഫലം കാണിക്കുന്നത്. പോസ്റ്റല്‍ വോട്ടെണ്ണുന്നത് മുതല്‍ മുന്നില്‍ എത്തിയ ഷൗക്കത്തിന് ഒരു ഘട്ടത്തിലും പുറകില്‍ പോകേണ്ടി വന്നില്ല. 

P.V. Anwar has stated that if he joins the UDF, he will contest as a candidate from the Beypore constituency in the 2026 Kerala Legislative Assembly election.