ഉക്രെയ്ന് നേരെയുള്ള യുദ്ധത്തിനിടെ ഒരു റഷ്യൻ സൈനികൻ സഹ സൈനികനെ കൊന്ന് മൃതദേഹം ഭക്ഷിച്ച ശേഷം മരിച്ച നിലയിൽ കണ്ടെത്തിയതായി റിപ്പോർട്ട്. യുദ്ധത്തിന്റെ ഭീകര സാഹചര്യങ്ങളിൽ ജീവൻ നിലനിർത്താൻ ശ്രമിക്കവേ ‘ബ്രെലോക്’ എന്ന സൈനികൻ തന്റെ നാട്ടുകാരനായ ‘ഫോമ’യെ കൊലപ്പെടുത്തി രണ്ടാഴ്ചത്തേക്ക് മൃതദേഹം ഭക്ഷിച്ചുവെന്നാണ് വിവരം. ഉക്രെയ്‌നിന്റെ രഹസ്യാന്വേഷണ വിഭാഗം രണ്ട് റഷ്യൻ സൈനികർ തമ്മിലുള്ള ഫോൺ സംഭാഷണം ചോർത്തിയതിനെ തുടർന്നാണ് ഈ ഞെട്ടിക്കുന്ന സംഭവം പുറത്തറിഞ്ഞത്. ബ്രെലോക് അവനെ തിന്നു രണ്ടാഴ്ചത്തേക്ക് മൃതദേഹം ഭക്ഷിച്ചു,” ഫോൺ സംഭാഷണത്തിൽ ഒരു റഷ്യൻ സൈനികൻ പറഞ്ഞതായി ന്യൂയോർക്ക് പോസ്റ്റ് റിപ്പോർട്ട് ചെയ്തു.

റഷ്യയുടെ ക്രിമിനലുകൾ യുദ്ധമുഖത്ത്

റഷ്യ ഉക്രെയ്‌നിൽ യുദ്ധം ചെയ്യാൻ കൊലയാളികളെയും നരഭോജികളെയും ഉൾപ്പെടെ ജയിലിലെ കുറ്റവാളികളെ റിക്രൂട്ട് ചെയ്തതായും റിപ്പോർട്ടുകൾ വ്യക്തമാക്കുന്നു. 2012-ൽ നാല് പേരെ കൊലപ്പെടുത്തിയ കേസിൽ 22 വർഷം തടവിന് ശിഖിപ്പോട്ട ഡെനിസ് ഗോർനിനെ 2023-ൽ യുദ്ധത്തിനായി മോചിപ്പിച്ചു. ഇയാൾ തന്റെ ഇരയുടെ ശരീരഭാഗം ഭക്ഷിച്ച കുറ്റവാളിയാണ്. യുദ്ധത്തിൽ പരുക്കേറ്റ ശേഷം റഷ്യൻ പ്രസിഡന്റ് വ്‌ളാഡിമർ പുടിൻ ഇയാ‌ൾക്ക് മാപ്പ് നൽകി. 2006-ൽ യുവതികളെ കൊലപ്പെടുത്തി അവരുടെ അവയവങ്ങൾ പാചകം ചെയ്ത നിക്കോളായ് ഒഗോലോബിയാക് എന്നയാളെയും മൂന്ന് പുരുഷന്മാരെ കൊലപ്പെടുത്തി ഹൃദയം വറുത്ത ദിമിത്രി മാലിഷേവ് എന്നിവരെയും റഷ്യ യുദ്ധത്തിന് അയച്ചിരുന്നു.

ALSO READ: കൊലപാതകങ്ങൾ, പീഡനങ്ങൾ, നരഭോജനം: പശ്ചിമാഫ്രിക്കയിലെ കുറ്റകൃത്യങ്ങൾ പ്രോത്സാഹിപ്പിക്കുന്ന റഷ്യയുടെ വാഗ്നർ ഗ്രൂപ്പിനെതിരെ അന്വേഷണം

യുദ്ധം തുടരുന്നു

ഇതിനിടെ, റഷ്യയും ഉക്രെയ്‌നും തമ്മിലുള്ള യുദ്ധം കൂടുതൽ ശക്തമാകുകയാണ്. കഴിഞ്ഞ ശനിയാഴ്ച റഷ്യൻ സൈന്യം ഉക്രെയ്‌നിന്റെ ഡൊണെറ്റ്‌സ്ക് മേഖലയിലെ സപോരിജ്ജ്യ എന്ന ഗ്രാമം പിടിച്ചെടുത്തതായി റഷ്യൻ വാർത്താ ഏജൻസി ടാസ് റിപ്പോർട്ട് ചെയ്തു. 200-ലേറെ താമസക്കാർ മാത്രമുള്ള ഈ ഗ്രാമം തന്ത്രപ്രധാന നഗരമായ പോക്രോവ്സ്കിന് സമീപമാണ്.

റഷ്യൻ ഡ്രോണുകൾ ഒഡെസ, ഖാർകിവ് നഗരങ്ങളിൽ ആക്രമണം നടത്തി. ഇതിൽ ഒരാൾ മരിക്കുകയും 17, 12 വയസ്സുള്ള പെൺകുട്ടികൾ ഉൾപ്പെടെ നിരവധി പേർക്ക് പരുക്കേൽക്കുകയും ചെയ്തതായി ഉക്രെയ്ൻ പ്രസിഡന്റ് വോളോഡിമർ സെലെൻസ്കി പറഞ്ഞു. “റഷ്യ ജനങ്ങൾക്കെതിരെ ഭീകരത തുടരുകയാണ്,” അദ്ദേഹം ആരോപിച്ചു.

കീവിൽ വൻ ആക്രമണം

ഈ ആഴ്ചയുടെ തുടക്കത്തിൽ റഷ്യ കീവിൽ വൻ മിസൈൽ, ഡ്രോണ്‍ ആക്രമണം നടത്തി. 14 പേർ മരിക്കുകയും നിരവധി പേർക്ക് പരുക്കേൽക്കുകയും ചെയ്തു. “പാർപ്പിട കെട്ടിടങ്ങൾ, സ്കൂളുകൾ, അടിസ്ഥാന സൗകര്യങ്ങൾ തകർന്നു,” ഉക്രെയ്ൻ ആഭ്യന്തര മന്ത്രി ഇഗോർ ക്ലൈമെൻകോ പറഞ്ഞു. റഷ്യ ഉത്തരകൊറിയൻ മിസൈലുകൾ ഉപയോഗിച്ചതായി സെലെൻസ്കി ആരോപിച്ചു. റഷ്യ, ഉത്തരകൊറിയ, ഇറാൻ എന്നിവയെ അദ്ദേഹം ‘കൊലപാതകികളുടെ സഖ്യം’ എന്ന് വിശേഷിപ്പിച്ചു. റഷ്യയ്ക്കെതിരെ ഉപരോധം ശക്തമാക്കാൻ യുഎസിനെയും യൂറോപ്പിനെയും അദ്ദേഹം ആവശ്യപ്പെട്ടു.

യുദ്ധത്തിൽ റഷ്യൻ സൈന്യം കൂടുതൽ മുന്നേറാൻ ശ്രമിക്കുന്നുണ്ടെങ്കിലും വലിയ നേട്ടങ്ങൾ കൈവരിച്ചിട്ടില്ലെന്ന് യുഎസ് ആസ്ഥാനമായ ഇൻസ്റ്റിറ്റ്യൂട്ട് ഫോർ ദി സ്റ്റഡി ഓഫ് വാർ റിപ്പോർട്ട് ചെയ്തു.