പരപ്പനങ്ങാടി: അന്യസംസ്ഥാന തൊഴിലാളി ക്യാംപുകളില്‍ പരപ്പനങ്ങാടി എക്‌സൈസ് സര്‍ക്കിള്‍ ടീം നടത്തിയ റെയ്ഡില്‍ ആയിരക്കണക്കിന് പാക്കറ്റ് നിരോധിത പുകയില ഉല്‍പന്നങ്ങള്‍ പിടികൂടി. പരപ്പനങ്ങാടി എക്‌സൈസ് സര്‍ക്കിള്‍ ഇന്‍സ്‌പെക്ടര്‍ രാഘേഷിന്റെ നേതൃത്വത്തിലുള്ള സംഘമാണ് റെയ്ഡ് നടത്തിയത്. വെളിമുക്ക്, പടിക്കല്‍ ഭാഗങ്ങളില്‍ നിന്നാണ് ഉല്‍പന്നങ്ങള്‍ കണ്ടെടുത്തത്. മലപ്പുറം ജില്ലാ ഡപ്യൂട്ടി എക്‌സൈസ് കമ്മിഷണറുടെ നിര്‍ദേശപ്രകാരം എല്ലാ എക്‌സൈസ് സര്‍ക്കിള്‍ പരിധികളിലെയും അന്യസംസ്ഥാന തൊഴിലാളികള്‍ താമസിക്കുന്ന ക്യാംപുകളില്‍ പരിശോധന നടത്തുന്നതിന്റെ ഭാഗമായാണ് ഇന്നലെ പരിശാധന നടത്തിയത്.  
ഒറീസ സ്വദേശികളായ ജധു, ഒല്ലിക്കിടാവ്, ദോള്‍ഗോഡിന്‍, ഭൂവന്‍, കര്‍വതി എന്നിവരില്‍ നിന്നാണ് പുകയില ഉല്‍പന്നങ്ങള്‍ പിടികൂടിയത്. ഇവര്‍ക്കെതിരേ കേസെടുത്തു. സര്‍ക്കിള്‍ ഇന്‍സ്‌പെക്ടര്‍ രാഘേഷിന് പുറമെ എ.ഇ.ഐ വി.പി ഭാസ്‌കരന്‍, വി.ഇ.ഒ മാരായ ഷിജിത്ത്, ജയകൃഷ്ണന്‍, ദിലീപ്കുമാര്‍ എന്നിവരും പരിശോധനാ സംഘത്തിലുണ്ടായിരുന്നു. വരും ദിവസങ്ങളിലും പരിശോധന തുടരുമെന്ന് സര്‍ക്കിള്‍ ഇന്‍സ്‌പെക്ടര്‍ രാഘേഷ് പറഞ്ഞു.