തെഹ്‌റാൻ: ഇറാൻ അന്താരാഷ്ട്ര ആണവോർജ ഏജൻസി (IAEA)യുമായുള്ള സഹകരണം ഔദ്യോഗികമായി അവസാനിപ്പിച്ചു. ഇറാൻ പാർലമെന്റിന്റെ ഈ തീരുമാനം ഗാർഡിയൻ കൗൺസിൽ അംഗീകരിച്ചതോടെ,  അന്താരാഷ്ട്ര ആണവോർജ ഏജൻസി പ്രതിനിധികൾക്ക് ഇനി രാജ്യത്ത് പ്രവേശിക്കാനോ ആണവ കേന്ദ്രങ്ങളിൽ പരിശോധന നടത്താനോ അനുമതിയില്ല. ആണവോർജ കേന്ദ്രങ്ങളിൽ സ്ഥാപിച്ചിട്ടുള്ള മോണിറ്ററിംഗ് ക്യാമറകൾ നീക്കം ചെയ്യാനും തീരുമാനമായി.  അന്താരാഷ്ട്ര ആണവോർജ ഏജൻസി-യുമായുള്ള സഹകരണം നിർത്തലാക്കിയതായി ഗാർഡിയൻ കൗൺസിൽ വക്താവ് ഹാദി തഹാൻ-നാസിഫ് വ്യക്തമാക്കി.

പശ്ചാത്തലം

ഇസ്റാഈലുമായുള്ള സംഘർഷത്തിന്റെ പശ്ചാത്തലത്തിൽ,  അന്താരാഷ്ട്ര ആണവോർജ ഏജൻസി-യുടെ പക്ഷപാതപരമായ നിലപാടിനെതിരെ ഇറാൻ രൂക്ഷ വിമർശനം ഉന്നയിച്ചിരുന്നു. ഇറാൻ അന്താരാഷ്ട്ര നിയമങ്ങൾ പാലിക്കുന്ന രാഷ്ട്രമാണെന്നും,  അന്താരാഷ്ട്ര ആണവോർജ ഏജൻസി ഇസ്റാഈലിന്റെ താൽപ്പര്യങ്ങൾക്കനുസരിച്ച് പ്രവർത്തിക്കുന്നുവെന്നും ഇറാൻ ആരോപിച്ചു. 2025 ജൂൺ 13-ന് ഇറാന്റെ ആണവ സമ്പുഷ്ടീകരണ കേന്ദ്രങ്ങൾക്ക് നേരെ ഇസ്റാഈൽ നടത്തിയ ആക്രമണത്തിൽ, മേജർ ജനറൽ മുഹമ്മദ് ബാഖിരി ഉൾപ്പെടെ ആറ് മുതിർന്ന ഉദ്യോഗസ്ഥരും ആണവ ശാസ്ത്രജ്ഞരും കൊല്ലപ്പെട്ടിരുന്നു.

തിരിച്ചടി

ഈ ആക്രമണത്തിന് മറുപടിയായി, ഇറാൻ-ഇസ്റാഈലിന്റെ ഹൈഫ തുറമുഖ നഗരത്തിനും വീസ്മാൻ ഇൻസ്റ്റിറ്റ്യൂട്ടിനും നേരെ ശക്തമായ ആക്രമണങ്ങൾ നടത്തി. സംഘർഷം രൂക്ഷമായതോടെ, അമേരിക്ക ഇറാനെ ആക്രമിച്ചതിനെ തുടർന്ന് ഖത്തറിലെ യുഎസ് സൈനിക താവളങ്ങൾക്ക് നേരെ ഇറാൻ ആക്രമണം നടത്തി.അതോടെ ഇറാൻ-ഇസ്റാഈൽ  വെടിനിർത്തലിന് അമേരിക്ക മധ്യസ്ഥത വഹിച്ചു.എന്നാൽ അമേരിക്കയുടെ ആക്രമണത്തെ ലോക രാജ്യങ്ങൾ വിമർശിച്ചു.

പാർലമെന്റിന്റെ തീരുമാനം

ഇസ്റാഈലുമായുള്ള വെടിനിർത്തലിന് തൊട്ടുമുമ്പ്, അന്താരാഷ്ട്ര ആണവോർജ ഏജൻസി-യുമായുള്ള സഹകരണം അവസാനിപ്പിക്കാൻ ഇറാൻ പാർലമെന്റ് തീരുമാനിച്ചിരുന്നു. ജൂൺ 25-ന് പാർലമെന്റ് ഈ ബിൽ ഏകകണ്ഠമായി പാസാക്കി, എല്ലാ 290 അംഗങ്ങളും അനുകൂലമായി വോട്ട് ചെയ്തു. ഈ ബിൽ ഗാർഡിയൻ കൗൺസിലിന്റെ അംഗീകാരത്തിനായി അയച്ചു, തുടർന്ന് കൗൺസിൽ ജൂൺ 26-ന് ഇത് അംഗീകരിച്ചു.അന്താരാഷ്ട്ര ആണവോർജ ഏജൻസിയുമായുള്ള സഹകരണം അവസാനിപ്പിക്കാനുള്ള ഇറാന്റെ തീരുമാനം, ഈ സംഘർഷങ്ങളുടെ പശ്ചാത്തലത്തിൽ, അന്താരാഷ്ട്ര സമ്മർദ്ദത്തിനെതിരായ ശക്തമായ നിലപാടായാണ് വിലയിരുത്തപ്പെടുന്നത്.

Iran has officially ended its cooperation with the International Atomic Energy Agency (IAEA) after the Guardian Council approved the parliament’s unanimous decision on June 26, 2025. IAEA inspectors will no longer be allowed to enter Iran or inspect nuclear facilities, and monitoring cameras will be removed. The move follows Iran’s criticism of IAEA’s alleged bias towards Israel, especially after Israel’s June 13 attack on Iran’s nuclear sites, which killed six officials, including Major General Mohammad Baqiri. Iran retaliated against Israeli targets, escalating tensions before a US-mediated ceasefire.