ശ്രീനഗര്‍: പഹല്‍ഗാമില്‍ ടൂറിസ്റ്റുകളെ വെടിവച്ചുകൊലപ്പെടുത്തിയതിന് പിന്നാലെ പാക് ഭീകരതാവളങ്ങളെ ലക്ഷ്യംവച്ച് ഇന്ത്യ നടത്തിയ തിരിച്ചടിയുടെ പശ്ചാത്തലത്തില്‍ കശ്മീരി അധ്യാപകനെ പാക് തീവ്രവാദിയാക്കി അവതരിപ്പിച്ച മുന്‍നിര ചാനലുകള്‍ക്കെതിരേ എഫ്.ഐ.ആര്‍ രജിസ്റ്റര്‍ ചെയ്യാന്‍ കോടതി ഉത്തരവ്. ദേശീയതലത്തില്‍ പൊതുവായി ബി.ജെ.പി അനുകൂല വാര്‍ത്തകള്‍ പ്രസിദ്ധീകരിക്കുന്നുവെന്ന് ആക്ഷേപമുള്ള സീ ന്യൂസ്, ന്യൂസ് 18 എന്നീ ചാനലുകള്‍ക്കെതിരേ കേസെടുത്ത് വിചാരണ നടത്താന്‍ പൂഞ്ച് കോടതിയാണ് ഉത്തരവിട്ടത്.

അഭിഭാഷകന്‍ ഷെയ്ഖ് മുഹമ്മദ് സലീം സമര്‍പ്പിച്ച പരാതിയുടെ അടിസ്ഥാനത്തില്‍ സബ് ജഡ്ജിയും സ്‌പെഷല്‍ മൊബൈല്‍ മജിസ്‌ട്രേറ്റുമായ ഷഫീഖ് അഹമ്മദാണ് ജമ്മുകശ്മീര്‍ പൊലിസിന് നിര്‍ദേശം നല്‍കിയത്. കഴിഞ്ഞമാസം ഏഴിന് പാകിസ്ഥാന്‍ നടത്തിയ ഷെല്‍വര്‍ഷത്തില്‍ കൊല്ലപ്പെട്ട പൂഞ്ചിലെ ജാമിഅ സിയഉല്‍ഉലൂമിലെ അധ്യാപകനായിരുന്ന ഖാരിഅ് മുഹമ്മദ് ഇഖ്ബാലിനെ ഈ ചാനലുകള്‍ പാക് ഭീകരനാക്കി ചിത്രീകരിച്ചതാണ് കേസിന്നാധാരം. 

ഓപ്പറേഷന്‍ സിന്ദൂറിനെക്കുറിച്ചുള്ള വാര്‍ത്തകളുടെ തത്സമയ സംപ്രേക്ഷണത്തിനിടെയാണ്, 2019 ലെ പുല്‍വാമ ആക്രമണവുമായി ബന്ധമുള്ള ഭീകരനേതാവായ കമാന്‍ഡര്‍ എന്ന വിശേഷണത്തോടെ ചാനലുകള്‍ വാര്‍ത്ത നല്‍കിയത്. മുഹമ്മദ് ഇഖ്ബാലിന്റെ ചിത്രസഹിതമായിരുന്നു വാര്‍ത്ത. എന്നാല്‍, വിഷയത്തില്‍ ജമ്മുകശ്മീര്‍ പൊലിസ് വ്യക്തതവരുത്തിയതോടെ ചാനലുകള്‍ വാര്‍ത്ത പിന്‍വലിക്കുകയുണ്ടായി. എങ്കിലും ചാനലിന്റെ ഉള്ളടക്കം മുഹമ്മദ് ഇഖ്ബാലിന്റെ കുടുംബത്തിന് സമൂഹത്തിലുണ്ടായിരുന്ന പ്രശസ്തിക്ക് കോട്ടം തട്ടിയെന്ന് ചൂണ്ടിക്കാട്ടിയാണ് പരാതിക്കാരന്‍ കോടതിയെ സമീപിച്ചത്.

ഇഖ്ബാല്‍ പാക് ഭീകരനാണെന്ന് ആദ്യം സംപ്രേഷണം ചെയ്‌തെങ്കിലും അത് പിന്‍വലിക്കുകയും ക്ഷമാപണം നടത്തുകയുംചെയ്‌തെങ്കിലും ഇരയുടെ കുടുംബത്തിനുണ്ടായ മാനഹാനിക്ക് പരിഹാരമല്ലെന്ന് മജിസ്‌ട്രേറ്റ് ഷഫീഖ് അഹമ്മദ് പറഞ്ഞു. ശിക്ഷ വിധിക്കുന്ന സമയത്ത് ക്ഷമാപണം പരിഗണിച്ചേക്കാം. പക്ഷേ ഒരു തിരിച്ചറിയാവുന്ന കുറ്റകൃത്യം വെളിപ്പെടുത്തിക്കഴിഞ്ഞാല്‍ എഫ്.ഐ.ആര്‍ രജിസ്റ്റര്‍ ചെയ്യേണ്ട പൊലിസിന്റെ നിയമപരമായ കടമയെ ഇത് തടയുന്നില്ല- ജഡ്ജി നിരീക്ഷിച്ചു. 2023 ലെ ഇന്‍ഫര്‍മേഷന്‍ ടെക്‌നോളജി ആക്ടിന്റെ സെക്ഷന്‍ 353(2) (പൊതു ദ്രോഹം), 356 (അപകീര്‍ത്തിപ്പെടുത്തല്‍), 196(1) (മതവികാരം വ്രണപ്പെടുത്തല്‍) എന്നീ വകുപ്പുകള്‍ പ്രകാരം എഫ്.ഐ.ആര്‍ രജിസ്റ്റര്‍ ചെയ്യാന്‍ പൂഞ്ച് പൊലിസിനാണ് നിര്‍ദേശം.

Jammu and Kashmir Court directed the registration of a first information report (FIR) against news channels, Zee News and News18 India, for allegedly broadcasting false and defamatory content about a teacher during their coverage of Operation Sindoor, the country's recent military operation against Pakistan after the Pahalgam attack