ഇംഗ്ലണ്ട് ഇതിഹാസ താരം ജോ റൂട്ടിനെക്കുറിച്ച് സംസാരിച്ചിരിക്കുകയാണ് ഇന്ത്യൻ ഇതിഹാസം സച്ചിൻ ടെണ്ടുൽക്കർ. റൂട്ടിനെ ആദ്യ കാലങ്ങളിൽ കളിക്കുന്നത് കണ്ടപ്പോൾ തന്നെ വലിയ താരമായി മാറുമെന്ന് താൻ പ്രവചിച്ചിരുന്നുവെന്നാണ് സച്ചിൻ പറഞ്ഞത്. റെഡ്ഡിറ്റിലെ 'ആസ്ക് സച്ചിൻ' എന്ന ആരാധക സംവാദ സെഷനിൽ സംസാരിക്കുകയായിരുന്നു മാസ്റ്റർ ബ്ലാസ്റ്റർ. 

''13000 റൺസ് മറികടക്കാൻ കഴിഞ്ഞത് ശ്രദ്ധേയമായ നേട്ടമാണ്. അദ്ദേഹം ഇപ്പോഴും മികച്ച പ്രകടനം നടത്തുന്നു. 2012ൽ നാഗ്പൂരിൽ റൂട്ട് അരങ്ങേറ്റ ടെസ്റ്റ് മത്സരം കളിക്കുമ്പോൾ റൂട്ടിനെ ഞാൻ ആദ്യമായി കണ്ടു. അപ്പോൾ ഇംഗ്ലണ്ടിനെ ഭാവി ക്യാപ്റ്റനാക്കാൻ അവർ അദ്ദേഹത്തെ നിരീക്ഷിക്കുന്നുണ്ടെന്ന് ഞാൻ എന്റെ സഹതാരങ്ങളോട് പറഞ്ഞിരുന്നു. എന്നെ ഏറ്റവുമധികം ആകർഷിച്ചത് അദ്ദേഹം വിക്കറ്റിനെ വിലയിരുത്തിയ രീതിയും സ്ട്രൈക്ക് എങ്ങനെ റൊട്ടേറ്റ് ചെയ്തു എന്നതുമാണ്. അദ്ദേഹം ഒരു വലിയ താരമാവുമെന്ന് എനിക്ക് ആ നിമിഷം തന്നെ അറിയാമായിരുന്നു'' സച്ചിൻ പറഞ്ഞു. 

ടെസ്റ്റ് ക്രിക്കറ്റ് ചരിത്രത്തിൽ ഏറ്റവും ഉയർന്ന റൺസ് നേടുന്ന താരമെന്ന സച്ചിൻ ടെണ്ടുൽക്കറിന്റെ റെക്കോർഡിന്റെ അടുത്തെത്തി നിൽക്കുകയാണ് ഇംഗ്ലണ്ട് താരം ജോ റൂട്ട്. മാസ്റ്റർ ബ്ലാസ്റ്ററിനെ മറികടക്കാൻ റൂട്ടിന് ഇനി വെറും 2378 റൺസ് മാത്രം മതി. 

മാഞ്ചസ്റ്ററിൽ നടന്ന ഇംഗ്ലണ്ടിനെതിരെയുള്ള നാലാം ടെസ്റ്റിൽ സെഞ്ച്വറി നേടിയതിന് പിന്നാലെയാണ് ടെസ്റ്റ് ക്രിക്കറ്റ് ചരിത്രത്തിൽ ഏറ്റവും കൂടുതൽ റൺസ് നേടുന്ന താരങ്ങളിൽ രണ്ടാമനായി റൂട്ട് മാറിയത്. ഈ സെഞ്ച്വറി നേടിയതിന് പിന്നാലെ ഓസ്‌ട്രേലിയൻ ഇതിഹാസം റിക്കി പോണ്ടിങ്ങിനെ മറികടന്നാണ് റൂട്ട് രണ്ടാം സ്ഥാനത്തെത്തിയത്.

13378 റൺസാണ് റിക്കി പോണ്ടിങ് ടെസ്റ്റിൽ നേടിയത്. മുൻ സൗത്ത് ആഫ്രിക്കൻ താരം ജാക് കാലിസ്, ഇന്ത്യൻ ഇതിഹാസം രാഹുൽ ദ്രാവിഡ് എന്നിവരാണ് പോണ്ടിങ്ങിന്റെ പുറകിലുള്ളത്. ജാക് കാലിസ് 13289 രാഹുൽ ദ്രാവിഡ് 13288 റൺസും ആണ് നേടിയിട്ടുള്ളത്. ടെസ്റ്റിൽ 15921 റൺസാണ് സച്ചിൻ നേടിയിട്ടുള്ളത്. 

Indian legend Sachin Tendulkar has spoken about England legend Joe Root. Sachin said that he predicted that Root would become a big star when he saw him play in his early days.