മലപ്പുറം: ഉന്നത വിദ്യാഭ്യാസ മേഖലയിൽ വലിയ പ്രതിസന്ധികൾ നിലനിൽക്കുന്നുവെന്ന് മുസ്ലിം ലീഗ് നേതാവ് പി.കെ. കുഞ്ഞാലിക്കുട്ടി. ക്യാമ്പസുകളിൽ രാഷ്ട്രീയ അതിപ്രസരമാണെന്നും ഗവർണറെ നേരിടുന്ന രീതി ശരിയല്ലെന്നും അദ്ദേഹം വിമർശിച്ചു. സ്കൂൾ സമയക്രമം മാറ്റിയ സർക്കാർ നിലപാട് ജനാധിപത്യ വിരുദ്ധമാണെന്നും അദ്ദേഹം കുറ്റപ്പെടുത്തി.

വിദ്യാഭ്യാസ പരിഷ്കരണങ്ങൾ നടപ്പാക്കുമ്പോൾ ആവശ്യമായ ചർച്ചകളും ആലോചനകളും വേണമെന്ന് കുഞ്ഞാലിക്കുട്ടി ചൂണ്ടിക്കാട്ടി. വിഷയം കൈകാര്യം ചെയ്ത രീതി മോശമായിരുന്നുവെന്നും ഇതിന്റെ പ്രത്യാഘാതങ്ങൾ വിദ്യാർഥികൾ അനുഭവിക്കേണ്ടി വരുന്നുവെന്നും അദ്ദേഹം പറഞ്ഞു. തീരുമാനങ്ങൾ വൈകിപ്പിച്ച് വിദ്യാർഥികൾക്കിടയിൽ ആശങ്ക സൃഷ്ടിച്ചത് സർക്കാരാണെന്ന് അദ്ദേഹം ആരോപിച്ചു. 

ഉന്നത വിദ്യാഭ്യാസ രംഗം മുഴുവൻ പ്രശ്നങ്ങൾ നേരിടുകയാണ്. ഒരു വശത്ത് ഗവർണറുടെ കാവി വൽക്കരണം. അതിന്റെ നേരിടുന്ന രീതി ശരിയല്ല. കായികമായി നേരിട്ടാൽ കാര്യം നടക്കില്ല. തമിഴ്നാട് ഗവർണറെ നേരിടുന്നത് മാതൃകയാക്കാം.

ALSO READ: കാരണവര്‍ വധക്കേസ് പ്രതി ഷെറിൻ ജയിലിൽ നിന്ന് പുറത്തേക്ക്; അംഗീകാരം നൽകി ഗവർണർ - എന്താണ് കാരണവർ വധക്കേസ്?

ക്യാമ്പസുകളിലെ രാഷ്ട്രീയ അതിപ്രസരം ഇപ്പോൾ മാഫിയ ഭരണം പോലെയായി മാറിയിരിക്കുന്നുവെന്ന് കുഞ്ഞാലിക്കുട്ടി വിമർശിച്ചു. ഇത്തരം സാഹചര്യങ്ങളിൽ വിദ്യാർഥികൾ എങ്ങനെ നാട്ടിൽ തുടരാനാണ്? സ്കൂൾ സമയക്രമം മാറ്റുന്നതുമായി ബന്ധപ്പെട്ട് സർക്കാർ ജനാധിപത്യ വിരുദ്ധമായ സമീപനമാണ് സ്വീകരിച്ചതെന്ന് അദ്ദേഹം ആവർത്തിച്ചു. മദ്രസ പഠനവും സ്കൂൾ പഠനവും തമ്മിൽ സംഘർഷമില്ലാതെ ഒരുമിച്ച് കൊണ്ടുപോകാൻ കഴിയണം. ഒരു ചർച്ച നടത്തിയിരുന്നെങ്കിൽ ഈ പ്രശ്നം പരിഹരിക്കാമായിരുന്നു. സമസ്ത ഉന്നയിച്ച ആവശ്യങ്ങൾ ന്യായമാണെന്നും വിദ്യാഭ്യാസ മേഖലയിൽ ഏകപക്ഷീയമായ തീരുമാനങ്ങൾ ഒഴിവാക്കണമെന്നും അദ്ദേഹം ആവശ്യപ്പെട്ടു.

നിയമസഭാ തെരഞ്ഞെടുപ്പിൽ അധിക സീറ്റുകൾ ആവശ്യപ്പെട്ടിട്ടില്ലെന്നും ഇതേക്കുറിച്ച് ചാനൽ വാർത്തകളിലൂടെയാണ് തങ്ങൾ അറിഞ്ഞതെന്നും കുഞ്ഞാലിക്കുട്ടി വ്യക്തമാക്കി. ശശി തരൂർ വിഷയത്തിൽ യു.ഡി.എഫിന് അഭിപ്രായം പറയേണ്ട ആവശ്യമില്ലെന്നും കോൺഗ്രസ് തന്നെ തീരുമാനമെടുക്കട്ടെയെന്നും അദ്ദേഹം പറഞ്ഞു. ഉരുൾപൊട്ടൽ പുനരധിവാസത്തിനായി വാങ്ങിയ ഭൂമിയിൽ യാതൊരു പ്രശ്നവുമില്ലെന്നും ഉടൻ തന്നെ ഭൂമി അവകാശികൾക്ക് രജിസ്റ്റർ ചെയ്ത് നൽകുമെന്നും അദ്ദേഹം ഉറപ്പ് നൽകി. മുസ്ലിം ലീഗ് ഇതിന്റെ വിശദാംശങ്ങൾ പ്രസിദ്ധീകരിക്കും. വീട് നിർമാണത്തിനുള്ള അപേക്ഷകൾ അടുത്ത ദിവസം മുതൽ തദ്ദേശ സ്ഥാപനങ്ങൾക്ക് നൽകിത്തുടങ്ങുമെന്നും അദ്ദേഹം അറിയിച്ചു.

Muslim League leader PK Kunhalikutty has expressed concerns about the current state of higher education, citing political overreach in campuses as a major issue. He criticized the Governor's approach and the government's decision to change school timings, calling the latter undemocratic. Kunhalikutty's comments highlight growing tensions in Kerala's education sector [1].