റായഗഡ (ഒഡിഷ): ​ഗ്രാമത്തിൽ വേരുറച്ച് നിലനിൽക്കുന്ന ആചാരങ്ങള്‍ക്ക് വിരുദ്ധമായി, ജാതി മാറി വിവാഹം കഴിച്ചെന്നാരോപിച്ച് യുവ ദമ്പതികളെ ക്രൂരമായി ശിക്ഷിച്ച് ജനക്കൂട്ടം. യുവാവിനെയും യുവതിയെയും മരനുകത്തിൽ കെട്ടിയിട്ട് വയലിലൂടെ വലിച്ചിഴച്ച് ഉഴുതുമറിക്കുന്നതിന് നിർബന്ധിച്ചതിന്റെ ഞെട്ടിക്കുന്ന വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയാണ്. ഇത് വൻ പ്രതിഷേധത്തിന് കാരണമായി. ഒഡീഷയിലെ റായഗഡ ജില്ലയിലെ കാഞ്ചമജ്ഹിര ഗ്രാമത്തിലെ ദമ്പതികളാണ് ജനക്കൂട്ടത്തിന്റെ ഈ ക്രൂരതയ്ക്ക് ഇരയായത്.

പ്രണയത്തിലായിരുന്ന ദമ്പതികൾ അടുത്തിടെയാണ് വിവാഹിതരായത്. യുവാവ് യുവതിയുടെ പിതൃസഹോദരിയുടെ മകനായതിനാൽ ഗ്രാമത്തിലെ ചിലർ ഈ വിവാഹത്തെ എതിർത്തിരുന്നു. ​ഗ്രാമത്തിലെ സാമൂഹിക മാനദണ്ഡങ്ങൾ അനുസരിച്ച് ഇത്തരം വിവാഹം നിഷിദ്ധമായാണ് കണക്കാക്കപ്പെടുന്നത്. ദമ്പതികളെ ശിക്ഷിക്കാനും അപമാനിക്കാനും ഉദ്ദേശിച്ച് ജനക്കൂട്ടം ഇവരെ മരനുകത്തിൽ കെട്ടിയിട്ട് ​ദീർഘ നേരത്തോളം വയലിലൂടെ വലിച്ചിഴക്കുകയായിരുന്നു. വീഡിയോയിൽ, രണ്ട് പുരുഷന്മാർ ദമ്പതികളെ വടികൊണ്ട് അടിക്കുന്നതും വ്യക്തമാണ്. ഈ പരസ്യമായ അപമാനത്തിന് ശേഷം, ദമ്പതികളെ ഗ്രാമത്തിലെ ആരാധനാലയത്തിലേക്ക് കൊണ്ടുപോയി, അവരുടെ 'പാപം' ശുദ്ധീകരിക്കാനെന്ന പേര് പറഞ്ഞ് ചടങ്ങുകൾ നടത്താനും നിർബന്ധിച്ചു.

സംഭവത്തെക്കുറിച്ച് അന്വേഷിക്കാൻ പൊലീസ് ഗ്രാമം സന്ദർശിച്ചതായി റായഗഡ ജില്ലാ പൊലീസ് സൂപ്രണ്ട് എസ്. സ്വാതി കുമാർ അറിയിച്ചു. ഉടൻ തന്നെ കേസ് രജിസ്റ്റർ ചെയ്യുമെന്നും പൊലീസ് വ്യക്തമാക്കി. നേരത്തെ, ജനുവരിയിൽ സമാനമായ ഒരു സംഭവത്തിൽ, മറ്റൊരു ജാതിയിൽപ്പെട്ട ഒരാളെ വിവാഹം കഴിച്ച ഒരു സ്ത്രീയുടെ കുടുംബത്തിലെ 40 അംഗങ്ങളെ 'ശുദ്ധീകരണ' ചടങ്ങിന്റെ ഭാഗമായി തല മൊട്ടയടിക്കാൻ നിർബന്ധിച്ചിരുന്നു. പ്രാദേശിക ആചാരങ്ങളുടെ പേര് പറഞ്ഞ് തുടർച്ചയായി ഉയരുന്ന നടക്കുന്ന അതിക്രമങ്ങൾക്കെതിരെ കർശന നടപടികൾ സ്വീകരിക്കണമെന്ന ആവശ്യവും ഉയർന്നിട്ടുണ്ട്.

In Odisha's Rayagada district, a young couple faced brutal punishment for marrying against local customs. Tied to a wooden yoke and beaten with sticks, they were forced to plow fields as a mob humiliated them. The shocking incident, captured on video and widely shared online, has sparked outrage. Police are investigating, and a case will soon be registered