തിരുവനന്തപുരം: എസ്.എന്‍.ഡി.പി നേതാവ് വെള്ളാപ്പള്ളി നടേശന്റെ വര്‍ഗീയ പരാമര്‍ശങ്ങള്‍ക്ക് പിന്നില്‍ മുഖ്യമന്ത്രിയാണെന്നും ഇത്തരം പരാമര്‍ശങ്ങളില്‍ നിന്ന് സമുദായ നേതാക്കള്‍ പിന്‍മാറണമെന്നും പ്രതിപക്ഷ നേതാവ് വി.ഡി. സതീശന്‍. മുഖ്യമന്ത്രി പിണറായി വിജയന്‍ പറഞ്ഞുകൊടുക്കുന്നതാണ് വെള്ളാപ്പള്ളി നടേശന്‍ പ്രചരിപ്പിക്കുന്നതെന്നാണ് പ്രതിപക്ഷ നേതാവിന്റെ പ്രതികരണം.

സംസ്ഥാനത്തെ ജനങ്ങളെ ഭിന്നിപ്പിക്കുന്ന ഇത്തരം പരാമര്‍ശങ്ങളില്‍ നിന്ന് സമുദായ നേതാക്കള്‍ പിന്‍മാറണമെന്നും അദ്ദേഹം ചൂണ്ടിക്കാട്ടി.

 ശ്രീനാരായണ ഗുരുവില്‍ വിശ്വസിക്കുന്നവരാണ് കേരള ജനത. ഇത് ശ്രീനാരായണ ഗുരുവിന്റെ ദര്‍ശനങ്ങള്‍ക്ക് യോജിച്ചതല്ല.  ഗുരു പറഞ്ഞതിന് വിരുദ്ധമായ കാര്യങ്ങളാണ് ദൗര്‍ഭാഗ്യവശാല്‍ ജനറല്‍ സെക്രട്ടറി പ്രചരിപ്പിക്കുന്നതെന്നും വി.ഡി സതീശന്‍ ചൂണ്ടിക്കാട്ടി.

 വെള്ളാപ്പള്ളി ഇപ്പോള്‍ പറഞ്ഞുകൊണ്ടിരിക്കുന്നത് ശ്രീനാരാഗണ ഗുരു പറയാന്‍ പാടില്ല എന്ന് പറഞ്ഞ കാര്യങ്ങളാണ്. ഇത് മുഖ്യമന്ത്രിയുടെ നരേറ്റീവാണ്. അദ്ദേഹം ഡല്‍ഹിയില്‍ പി.ആര്‍. ഏജന്‍സികളെ കൊണ്ട് പറയിപ്പിച്ചതിലും ഹിന്ദുവിന് ഡല്‍ഹിയില്‍ നിന്ന് കൊടുത്ത അഭിമുഖത്തിലും മലപ്പുറത്തിനെതിരായ പരാമര്‍ശമുണ്ടായത് കേരളം കണ്ടതാണ്. മലപ്പുറത്തിനെതിരെ വ്യാപകമായി പറഞ്ഞുകൊണ്ടിരിക്കുന്നവരാണ് കേരളത്തിലെ സി.പി.എം നേതാക്കള്‍. മുന്‍ മുഖ്യമന്ത്രി വി.എസ്. അച്യുതാനന്ദനും മുഖ്യമന്ത്രി പിണറായി വിജയനും പോളിറ്റ് ബ്യൂറോ അംഗം എ. വിജയരാഘവനും മലപ്പുറത്തെ കുറിച്ച് പറഞ്ഞത് എല്ലാവരും കേട്ടതാണ്. ഇവര്‍ക്കെല്ലാം ഒരേ നരേറ്റീവാണ്. ഇതെല്ലാം മുഖ്യമന്ത്രി പറഞ്ഞുപറയിപ്പിക്കുന്നതാണ്-  വി.ഡി. സതീശന്‍ വിമര്‍ശിച്ചു.

കഴിഞ്ഞ ദിവസം കോട്ടയത്ത് നടന്ന കോട്ടയത്ത് നടന്ന എസ്.എന്‍.ഡി.പി നേതൃസംഗമം പരിപാടിക്കിടെയായിരുന്നു വെള്ളാപ്പള്ളിയുടെ വിദ്വേഷ പരാമര്‍ശം. 

കേരളത്തില്‍ മുസ്‌ലിം ജനസംഖ്യ വര്‍ധിക്കുകയാണെന്നും ഈഴവ സമുദായത്തിന് പ്രധാന്യം കിട്ടുന്നത് തൊഴിലുറപ്പ് പദ്ധതിയില്‍ മാത്രമാണെന്നുമാണ് വെള്ളാപ്പള്ളിയുടെ പരാമര്‍ശം. കേരളം മുസ്‌ലിം ഭൂരിപക്ഷ സംസ്ഥാനമായി മാറുമെന്ന് വി.എസ്. അച്യൂതാനന്ദന്‍ മുമ്പ് പറഞ്ഞത് ശരിവെക്കുന്ന രീതിയിലാണ് കാര്യങ്ങളുടെ പോക്കെന്നും വെള്ളാപ്പള്ളി പറഞ്ഞു.  കാന്തപുരം പറയുന്നത് കേട്ട് ഭരിച്ചാല്‍ മതി എന്ന സ്ഥിതിയാണ് കേരള സര്‍ക്കാറിനെന്നും വെള്ളാപ്പള്ളി ആരോപിച്ചു. ഇന്ന് കൊച്ചിയില്‍ നടന്ന ആദരിക്കല്‍ ചടങ്ങിലും വെള്ളാപ്പള്ളി വിദ്വേഷം ആവര്‍ത്തിച്ചു.

Opposition Leader V.D. Satheesan has accused Kerala Chief Minister Pinarayi Vijayan of being behind SNDP leader Vellappally Natesan's recent communal statements. Satheesan urged community leaders to refrain from making such divisive remarks.