മലപ്പുറം: തദ്ദേശ സ്ഥാപനങ്ങളിലേക്ക് നടക്കാനിരിക്കുന്ന തെരഞ്ഞടുപ്പിൽ 2025 ജനുവരി രണ്ടിന് ശേഷം 18 വയസ് തികഞ്ഞ ആർക്കും വോട്ടില്ല. 2025 ജനുവരി ഒന്നിന് 18 വയസ് തികഞ്ഞവർക്ക് മാത്രം സംസ്ഥാന തെരഞ്ഞെടുപ്പ് കമ്മിഷൻ വോട്ടവകാശം നിജപ്പെടുത്തിയതാണ് ആയിരങ്ങൾക്ക് വോട്ടില്ലാതാക്കുന്നത്.

തദ്ദേശ തെരഞ്ഞെടുപ്പ് നടക്കുന്നത് നവംബർ-ഡിസംബർ മാസത്തിലാണ്.ജനുവരി ഒന്നിന് ശേഷം ആ സമയത്തേക്ക് 18 തികഞ്ഞ ആർക്കും വോട്ടവകാശമുണ്ടാകില്ല.എന്നാൽ കേന്ദ്ര തെരഞ്ഞടുപ്പ് കമ്മിഷന്റെ ലോക്സഭാ,നിയമസഭാ വോട്ടേഴ്‌സ് ലിസ്റ്റിൽ പേര് ചേർക്കാൻ ജനന തിയതി ജനുവരി,ഏപ്രിൽ, ജൂലൈ, ഒക്ടോബർ എന്നീ നാല് മാസങ്ങളിലെ ഒന്നാം തിയതികളാണ് യോഗ്യത തിയതിയായി കണക്കാകുന്നത്.ഇതനുസരിച്ച്  നവംബറിലാണ്  തെരഞ്ഞെടുപ്പ് നക്കുന്നതെങ്കിൽ ഒക്ടോബറിൽ 18 തികഞ്ഞവർക്കും വോട്ട് ചെയ്യാൻ അവസരം ലഭിക്കും.

പതിനെട്ട് വയസ് തികയുന്നതിന്റെ ആറ് മാസം മുമ്പ് തന്നെ പേര് ചേർക്കുന്നതിന് അപേക്ഷ നൽകാവുന്നതും 18 വയസ് തികയുന്ന മുറയ്ക്ക് ഐഡന്റിറ്റി കാർഡ് നൽകുന്നതുമാണ്. വോട്ടർ പട്ടികയിൽ പേര്  ചേർക്കുന്നതിന് കേന്ദ്ര തെരഞ്ഞെടുപ്പ് കമ്മിഷന്റെ മാനദണ്ഡം തന്നെ സംസ്ഥാന തെരഞ്ഞെടുപ്പ് കമ്മിഷൻ സ്വീകരിക്കാത്തതിന്റെ പേരിൽ പതിനായിരങ്ങൾക്കാണ് വോട്ടവകാശമില്ലാതാകുന്നത്.ഇവർക്കെല്ലാം അടുത്ത നിയമസഭ തെരഞ്ഞെടുപ്പിൽ വോട്ട്‌ചെയ്യാനുള്ള അവസരം ലഭിക്കുന്നുമുണ്ട്.

ALSO READ: രാസലഹരി; കെമിക്കലുകൾ എത്തുന്നത് ആഫ്രിക്കയിൽ നിന്ന്; ഉൽപാദനം കെമിക്കൽ മാനുഫാക്ചറിങ് യൂനിറ്റുകളുടെ മറവിൽ  

അതേസമയം തദ്ദേശ തെരഞ്ഞെടുപ്പിനുള്ള  വോട്ടേഴ് ലിസ്റ്റിൽ പേര് ചേർക്കുന്നതിന് അപേക്ഷകൻ തെളിവുകൾ സഹിതം ഹിയറിങ്ങിനായി തദ്ദേശ സെക്രട്ടറിക്ക് മുമ്പാകെ ഹാജരാകണം. ഇത് അന്യ സംസ്ഥാനങ്ങളിൽ പഠിക്കുന്ന വിദ്യാർഥികൾക്കടക്കം ദുരിതമാണ്. അപേക്ഷയോടൊപ്പം സമർപ്പിക്കുന്ന സ്‌കൂൾ സർട്ടിഫിക്കറ്റ്, റേഷൻ കാർഡ്, ഫോട്ടോ, ആധാർ കാർഡ് എന്നിവ പരിശോധിച്ച് ലിസ്റ്റിൽ ഉൾപ്പെടുത്താം. അതേസമയം തദ്ദേശ കരട് വോട്ടർപട്ടിക ബുധനാഴ്ച പ്രസിദ്ധീകരിക്കും.ഇതിന് ശേഷം 2025 ജനുവരി ഒന്നിന് മുമ്പ് 18 തികഞ്ഞവർക്ക് വോട്ടർ പട്ടികയിൽ പേര് ചേർക്കാനാകും.