തൃശ്ശൂർ: തൃശ്ശൂർ യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡന്റ് വി.എസ്. സുജിത്തിനെ കുന്നംകുളം പൊലിസ് സ്റ്റേഷനിൽ വെച്ച് ക്രൂരമായി മർദിച്ച സംഭവത്തിൽ പ്രതികളായ പൊലിസുകാർക്ക് രക്ഷപ്പെടാൻ വഴിയൊരുക്കി പൊലിസ്. കേസിൽ ദുർബല വകുപ്പുകൾ മാത്രമാണ് ചുമത്തിയിരിക്കുന്നത്. ലോക്കപ്പ് മർദനത്തിന്റെ സിസിടിവി ദൃശ്യങ്ങൾ പുറത്തുവന്നിട്ടും, ഒരു വർഷം തടവ് ലഭിക്കാവുന്ന ഐ.പി.സി. 323 (കൈകൊണ്ട് ഇടിച്ചു) എന്ന വകുപ്പ് മാത്രമാണ് പ്രതികൾക്കെതിരെ ചുമത്തിയിരിക്കുന്നത്. രണ്ട് വർഷത്തെ നിയമപോരാട്ടത്തിനൊടുവിൽ, വിവരാവകാശ കമ്മീഷന്റെ ഉത്തരവ് പ്രകാരമാണ് മർദന ദൃശ്യങ്ങൾ സുജിത്ത് പുറത്തുകൊണ്ടുവന്നത്.

ALSO READ: കുന്നംകുളത്ത് യൂത്ത് കോൺഗ്രസ് നേതാവിനെ പൊലിസ് മർദിച്ച സംഭവം; പ്രതിഷേധം ശക്തമാക്കാൻ കോൺഗ്രസ്

അതേസമയം, ഒരു കുറ്റത്തിന് രണ്ട് ശിക്ഷ നൽകാനാകില്ലെന്ന നിയമോപദേശം പൊലിസിന് ലഭിച്ചു. നാല് പൊലീസുകാർക്കും മൂന്ന് വർഷത്തേക്ക് പ്രമോഷൻ നിഷേധിക്കുകയും രണ്ട് വർഷത്തേക്ക് ഇൻക്രിമെന്റ് തടയുകയും ചെയ്തു. ഇതിനാൽ, ഇനി വകുപ്പുതല നടപടി സാധ്യമല്ലെന്നും തുടർനടപടികൾ കോടതി തീരുമാനപ്രകാരം മതിയെന്നും പൊലിസിന് നിയമോപദേശം ലഭിച്ചു. എ.സി.പി. കെ.സി. സേതു നടത്തിയ അന്വേഷണ റിപ്പോർട്ട്, കുന്നംകുളം പൊലിസിന്റെ മർദനം ശരിവെക്കുന്നതാണ്. എസ്.ഐ. ന്യൂമാൻ, സീനിയർ സി.പി.ഒ. ശശിധരൻ, സി.പി.ഒ.മാരായ സന്ദീപ്, സജീവ് എന്നിവർ സുജിത്തിനെ ക്രൂരമായി മർദിച്ചതായി റിപ്പോർട്ടിൽ വ്യക്തമാക്കുന്നു. 

പ്രതികളായ പൊലിസുകാർക്കെതിരെ ശക്തമായ നിയമ നടപടി എടുക്കാത്തതിൽ പ്രതിഷേധിച്ച് കോൺഗ്രസ് പോരാട്ടം ശക്തമാക്കാൻ തീരുമാനിച്ചു. കെ.പി.സി.സി. പ്രസിഡന്റ് സണ്ണി ജോസഫ് ഇന്ന് ഡി.സി.സി. ഓഫീസിൽ സുജിത്തിനെ സന്ദർശിക്കും. കുറ്റക്കാരായ പൊലിസുകാർ സർവീസിൽ നിന്ന് സസ്പെൻഡ് ചെയ്യപ്പെടുന്നതുവരെ പോരാട്ടം തുടരുമെന്ന് സുജിത്ത് വ്യക്തമാക്കി. ശക്തമായ നടപടികൾ സ്വീകരിക്കാത്തതിനാൽ, വരുന്ന 10-ാം തീയതി പ്രതികൾ ജോലി ചെയ്യുന്ന പൊലിസ് സ്റ്റേഷനുകളിലേക്ക് പ്രതിഷേധ മാർച്ച് നടത്തുമെന്ന് ഡി.സി.സി. പ്രസിഡന്റ് പ്രതികരിച്ചു.