ബെംഗളൂരു: കർണാടകയിലെ ധർമസ്ഥലയിൽ നിരവധി മൃതദേഹങ്ങൾ കുഴിച്ചുമൂടിയെന്ന ശുചീകരണ തൊഴിലാളിയുടെ ആരോപണവുമായി ബന്ധപ്പെട്ട വാർത്തകളുടെ ലിങ്കുകൾ നീക്കം ചെയ്യാൻ ഉത്തരവിട്ട് കോടതി. ബെംഗളൂരു കോടതിയാണ് 8,842 ലിങ്കുകൾ നീക്കം ചെയ്യാൻ ഉത്തരവിട്ടത്. ധർമസ്ഥല ധർമാധികാരി വീരേന്ദ്ര ഹെഗ്ഗഡെയുടെ സഹോദരനായ ഹർഷേന്ദ്ര കുമാർ ഡി. നൽകിയ ഹരജിയിലാണ് കോടതിയുടെ നടപടി ഉണ്ടായത്. 

നീക്കം ചെയ്യേണ്ട 8,842 ലിങ്കുകളിൽ, 4,140 ലിങ്കുകളും യൂട്യൂബ് വിഡിയോകളുടേതാണ്. 3,584 ഇൻസ്റ്റാഗ്രാം പോസ്റ്റുകളും നീക്കം ചെയ്യണം. 932 ഫേസ്ബുക്ക് പോസ്റ്റുകൾ, 108 വാർത്താ ലിങ്കുകൾ, 37 റെഡ്ഡിറ്റ് പോസ്റ്റുകൾ, 41 ട്വീറ്റുകൾ എന്നിവയും നീക്കം ചെയ്യാനുള്ള ലിങ്കുകളുടെ പട്ടികയിൽ ഉണ്ട്. ശ്രീ  മഞ്ജുനാഥസ്വാമി ക്ഷേത്ര സ്ഥാപനങ്ങളുടെ സെക്രട്ടറി കൂടിയായ ഹർഷേന്ദ്ര കുമാർ ഡി.യാണ് ജൂലൈ 18-ന് ഹരജി നൽകിയത്. 

വീരേന്ദ്ര ഹെഗ്ഗഡെയുടെയും ഹർഷേന്ദ്ര കുമാറിന്റെയും പേരിലും കുടുംബാംഗങ്ങളും ഉൾപ്പെടെ അപകീർത്തികരമായ ഉള്ളടക്കം പങ്കുവെച്ച ലിങ്കുകളാണ് നീക്കം ചെയ്യുക. ശ്രീ മഞ്ജുനാഥസ്വാമി ക്ഷേത്രം, ധർമസ്ഥല ക്ഷേത്രം നടത്തുന്ന സ്ഥാപനങ്ങൾ എന്നിവയെ കുറിച്ചും ഇത്തരത്തിൽ അപകീർത്തികരമായ വാർത്തകൾ പ്രചരിക്കുന്നുണ്ട്. ഡിജിറ്റൽ, സോഷ്യൽ, പ്രിന്റ് മാധ്യമങ്ങളിൽ ഇത്തരം വാർത്തകൾ പ്രസിദ്ധീകരിക്കുന്നതിൽ നിന്ന് വിലക്കണമെന്ന് ഹർഷേന്ദ്ര കോടതിയോട് ആവശ്യപ്പെട്ടു. 

ഡെക്കാൻ ഹെറാൾഡ്, ദി ഹിന്ദു, ദി ന്യൂ ഇന്ത്യൻ എക്സ്പ്രസ്, ടൈംസ് ഓഫ് ഇന്ത്യ, ഇന്ത്യൻ എക്സ്പ്രസ്, ദി ന്യൂസ് മിനിറ്റ്, ഹിന്ദുസ്ഥാൻ ടൈംസ്, പി.ടി.ഐ, എ.എൻ.ഐ, ഐ.എ.എൻ.എസ്, മാതൃഭൂമി, മലയാള മനോരമ, കേരള കൗമുദി, ന്യൂസ്18, ടി.വി.9 ഗ്രൂപ്പ്, ഇന്ത്യ ടി.വി, ന്യൂസ് എക്സ്, സുവർണ പ്രജാവാണി, കന്നഡ പ്രഭ, ഹോസ ദിഗന്ത, ബാംഗ്ലൂർ മിറർ, ഉദയവാണി, ദിനമണി, ദിന തന്തി, ദിനകരൻ, സംയുക്ത കർണാടക, വിജയവാണി, വിശ്വവാണി,  രാജസ്ഥാൻ പത്രിക, ഈസഞ്ജെ, സഞ്ജേവനി, ദിനസുധാർ, സന്മാർഗ, ന്യൂസ് ഫസ്റ്റ്, ദൈജി വേൾഡ് ടി.വി. തുടങ്ങിയ മാധ്യമങ്ങളിൽ ഉൾപ്പെടെയാണ് അപകീർത്തികരമായ റിപ്പോർട്ടുകൾ വന്നതെന്നാണ് പരാതിക്കാരൻ പറയുന്നത്.