ഇന്ത്യൻ ടെസ്റ്റ് നായകൻ ശുഭ്മൻ ഗില്ലിനെ പ്രശംസിച്ചിരിക്കുകയാണ് മാഞ്ചസ്റ്റർ യുണൈറ്റഡിന്റെ പോർച്ചുഗൽ മിഡ്ഫീൽഡർ ബ്രൂണോ ഫെർണാണ്ടസ്. ഗില്ലിനെ കാണാൻ കഴിഞ്ഞത് വലിയ ബഹുമതിയാണെന്നാണ് പോർച്ചുഗീസ് സൂപ്പർതാരം പറഞ്ഞത്. ക്യാപ്റ്റനെന്ന നിലയിൽ ഇന്ത്യൻ ടീമിനൊപ്പം ഗിൽ മികച്ച പ്രകടനം നടത്തുമെന്നും ബ്രൂണോ ഫെർണാണ്ടസ് അഭിപ്രായപ്പെട്ടു. ഇംഗ്ലണ്ടിനെതിരായ നാലാം ടെസ്റ്റ് മത്സരത്തിനു മുന്നോടിയായി ഇന്ത്യൻ ക്രിക്കറ്റ് ടീം മാഞ്ചസ്റ്റർ യുണൈറ്റഡ് ടീമിലെ താരങ്ങളുമായി കൂടിക്കാഴ്ച നടത്തിയിരുന്നു. ഈ പരുപാടിയിൽ വെച്ചാണ് ബ്രൂണോ ഫെർണാണ്ടസ് ഗില്ലിനെക്കുറിച്ച് സംസാരിച്ചത്. 

''ഞങ്ങൾ ക്യാപ്റ്റൻസിയെ കുറിച്ചും വ്യത്യസ്ത സ്പോർട്സുകളെ  കുറിച്ചും സംസാരിച്ചു. ശുഭ്മാൻ ഗില്ലിനെ കണ്ടുമുട്ടാൻ കഴിഞ്ഞത് വലിയ ബഹുമതിയാണ്, അദ്ദേഹം ഇന്ത്യയുടെ ക്യാപ്റ്റനായി മാറിയത് അദ്ദേഹത്തിന് വലിയ പദവിയും വലിയ ബഹുമതിയുമാണ് നൽകുന്നത്. രാജ്യത്തിന്റെ ക്യാപ്റ്റനാവുക എന്നത് വലിയ പദവിയാണ്. അദ്ദേഹം ഇന്ത്യൻ ടീമിനൊപ്പം വിജയിക്കുമെന്ന് ഞാൻ പ്രതീക്ഷിക്കുന്നു" ബ്രൂണോ ഫെർണാണ്ടസ് പറഞ്ഞു. 

നിലവിൽ ക്യാപ്റ്റനായുള്ള ഇംഗ്ലണ്ടിനെതിരെയുള്ള പരമ്പരയിൽ ഗിൽ മികച്ച പ്രകടനമാണ് നടത്തുന്നത്. ഇംഗ്ലണ്ടിനെതിരായ രണ്ടാം ടെസ്റ്റിൽ രണ്ട് ഇന്നിങ്സിലും തകർപ്പൻ പ്രകടനമാണ് നായകൻ ശുഭ്മൻ ഗിൽ നടത്തിയത്. ആദ്യ ഇന്നിങ്സിൽ ഡബിൾ സെഞ്ച്വറിയും രണ്ടാം ഇന്നിങ്സിൽ സെഞ്ച്വറി നേടിയുമാണ് ഗിൽ തിളങ്ങിയത്.ആദ്യ ഇന്നിങ്സിൽ 387 പന്തിൽ നിന്നും 269 റൺസാണ് ഗില്ലിന്റെ ബാറ്റിൽ നിന്നും പിറന്നത്. 30 ഫോറുകളും മൂന്ന് സിക്സുകളും അടങ്ങുന്നതാണ് ഗില്ലിന്റെ ഇന്നിംഗ്സ്. രണ്ടാമത്തെ ഇന്നിങ്സിൽ  161 പന്തിൽ 162 റൺസുമാണ് ഇന്ത്യൻ നായകൻ നേടിയത്. 13 ഫോറുകളും എട്ട് സിക്സുകളുമാണ് ഗിൽ നേടിയത്. 

ഇംഗ്ലണ്ടിനെതിരായ രണ്ടാം ടെസ്റ്റിൽ 336 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. എഡ്ജ്ബാസ്റ്റൺ സ്റ്റേഡിയത്തിൽ ചരിത്ര വിജയമാണ് ഇന്ത്യ നേടിയത്. ഈ വേദിയിലെ ഇന്ത്യയുടെ ആദ്യ ടെസ്റ്റ് വിജയമാണിത്. ഇതിനു മുമ്പ്. ഈ വേദിയിൽ ഇതുവരെ എട്ട് മത്സരങ്ങളിലാണ് ഇന്ത്യ കളിച്ചിട്ടുള്ളത്. ഇതിൽ ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം സമനിലയിൽ പിരിയുകയും ചെയ്തു. എന്നാൽ രണ്ടാം ടെസ്റ്റ് വിജയത്തോടെ ഗിൽ ഇന്ത്യയുടെ ചരിത്ര നായകനായും മാറി.

Bruno Fernandez Praises Shubhman Gill Captaincy Against India vs England five test seiers