പട്ന: ബിഹാറിൽ നിയമസഭാ തെരഞ്ഞെടുപ്പിന് മുന്നോടിയായി നടക്കുന്ന വോട്ടർ പട്ടിക പുനഃപരിശോധനയുടെ മറവിൽ തെരഞ്ഞെടുപ്പ് കമ്മിഷൻ 52 ലക്ഷം വോട്ടർമാരെ പട്ടികയിൽ നിന്ന് ഒഴിവാക്കി. ഇതിൽ 18.66 ലക്ഷം പേർ മരണപ്പെട്ടവരാണെന്നും, 26.01 ലക്ഷം പേർ മറ്റ് മണ്ഡലങ്ങളിലേക്കോ സംസ്ഥാനത്തിന് പുറത്തോ താമസം മാറിയവരാണെന്നും, 7.5 ലക്ഷം പേർ ഒന്നിലധികം സ്ഥലങ്ങളിൽ രജിസ്റ്റർ ചെയ്തവരാണെന്നും, 11,484 പേരെ കണ്ടെത്താനായില്ലെന്നും കമ്മിഷൻ വാർത്താ കുറിപ്പിൽ വ്യക്തമാക്കി.

ജൂൺ 24-ലെ കണക്കനുസരിച്ച്, ബിഹാറിൽ 7.89 കോടി രജിസ്റ്റർ ചെയ്ത വോട്ടർമാരുണ്ട്. ഇതിൽ 90.67 ശതമാനം (7.16 കോടി) വോട്ടർമാർ എന്യൂമറേഷൻ ഫോമുകൾ (ഇ.എഫ്) സമർപ്പിച്ചു. 90.37 ശതമാനം (7.13 കോടി) ഫോമുകൾ ഡിജിറ്റലൈസ് ചെയ്തതായും കമ്മിഷൻ അറിയിച്ചു. എന്നാൽ, 15 ലക്ഷം ഫോമുകൾ ഇനിയും തിരികെ ലഭിച്ചിട്ടില്ല. 7.68 കോടി വോട്ടർമാരെ (97.30 ശതമാനം) ഫോം സമർപ്പിക്കലോ ഓൺ-ഗ്രൗണ്ട് വെരിഫിക്കേഷനോ വഴി ഉൾപ്പെടുത്തിയിട്ടുണ്ട്. ബാക്കി 2.70 ശതമാനം (21.35 ലക്ഷം) വോട്ടർമാരുടെ ഫോമുകൾ ഇനിയും തീർപ്പാക്കിയിട്ടില്ല.

ഒഴിവാക്കിയ 52.30 ലക്ഷം വോട്ടർമാരുടെ വിശദാംശങ്ങൾ സംസ്ഥാനത്തെ അംഗീകൃത രാഷ്ട്രീയ പാർട്ടികളുമായി പങ്കുവെച്ചതായി കമ്മിഷൻ അറിയിച്ചു. ഓഗസ്റ്റ് 1-ന് കരട് വോട്ടർ പട്ടിക പ്രസിദ്ധീകരിക്കും. പൊതുജനങ്ങൾക്ക് കൂട്ടിച്ചേർക്കലുകൾ, ഒഴിവാക്കലുകൾ, തിരുത്തലുകൾ എന്നിവയ്ക്കെതിരെ ഓഗസ്റ്റ് 1 മുതൽ സെപ്റ്റംബർ 1 വരെ എതിർപ്പുകൾ ഉന്നയിക്കാം. എല്ലാ നടപടിക്രമങ്ങളും പൂർത്തിയാക്കി സെപ്റ്റംബർ 30-ന് അന്തിമ പട്ടിക പ്രസിദ്ധീകരിക്കും.

വോട്ടർ പട്ടിക ശുദ്ധീകരിക്കുന്നതിനായി 1 ലക്ഷം ബൂത്ത് ലെവൽ ഓഫീസർമാർ (ബി.എൽ.ഒ), 4 ലക്ഷം വോളന്റിയർമാർ, 1.5 ലക്ഷം ബൂത്ത് ലെവൽ ഏജന്റുമാർ (ബി.എൽ.എ) എന്നിവരെ തെരഞ്ഞെടുപ്പ് കമ്മിഷൻ വിന്യസിച്ചു. എന്യൂമറേഷൻ ഫോമുകൾ സമർപ്പിക്കാത്തവരെയും ഫീൽഡ് വെരിഫിക്കേഷനിൽ കണ്ടെത്താനാകാത്തവരെയും കണ്ടെത്തുകയായിരുന്നു ഈ ടീമിന്റെ ചുമതല. വോട്ടർ പട്ടിക പരിഷ്കരണത്തിന്റെ മറവിൽ കേന്ദ്രസർക്കാർ എൻ.ആർ.സി (നാഷണൽ രജിസ്റ്റർ ഓഫ് സിറ്റിസൺസ്) നടപ്പാക്കുന്നുവെന്ന ആരോപണം ഉയർന്നിട്ടുണ്ട്. ഇതിനെതിരെ സുപ്രീംകോടതിയിൽ ഹർജി നിലവിലുണ്ട്, ഈ മാസം 28-ന് കേസ് വീണ്ടും പരിഗണിക്കും. പാർലമെന്റിന്റെ ഇരുസഭകളിലും മൂന്ന് ദിവസമായി ഇതുമായി ബന്ധപ്പെട്ട പ്രതിഷേധം തുടരുകയാണ്.

ALSO READ: കേരളത്തിലെ ദേശീയപാത നിർമാണത്തകരാറുകൾ: ഉത്തരവാദികൾക്കെതിരെ കർശന നടപടി സ്വീകരിച്ചെന്ന് നിതിൻ ​ഗഡ്കരി

ഇൻഡ്യാ സഖ്യം തെരഞ്ഞെടുപ്പ് ബഹിഷ്കരിക്കുമോ?
 
52 ലക്ഷത്തിലധികം വോട്ടർമാരെ ഒഴിവാക്കിയ നടപടിയുടെ പശ്ചാത്തലത്തിൽ, നവംബറിൽ നടക്കാനിരിക്കുന്ന തെരഞ്ഞെടുപ്പ് ഇൻഡ്യാ സഖ്യം ബഹിഷ്കരിക്കുമെന്ന സൂചന നൽകി ആർ.ജെ.ഡി നേതാവും മുൻ മുഖ്യമന്ത്രിയുമായ തേജസ്വി യാദവ്. തെരഞ്ഞെടുപ്പ് കമ്മിഷൻ ബി.ജെ.പിയുടെ ഉത്തരവുകൾ സ്വീകരിക്കുകയാണെന്നും, ഇത്തരം സാഹചര്യത്തിൽ തെരഞ്ഞെടുപ്പ് നടത്തുന്നത് അർഥശൂന്യമാണെന്നും അദ്ദേഹം ആരോപിച്ചു. “വ്യാജ വോട്ടർ പട്ടിക ഉപയോഗിച്ച് ബി.ജെ.പി സർക്കാർ രൂപീകരിക്കാൻ ശ്രമിക്കുകയാണെങ്കിൽ, ഇപ്പോഴത്തെ സർക്കാരിന്റെ കാലാവധി നീട്ടിനൽകുന്നതാണ് ബുദ്ധി. തെരഞ്ഞെടുപ്പ് ബഹിഷ്കരണം ഒരു ഓപ്ഷനാണ്, അതിനെക്കുറിച്ച് ഇൻഡ്യാ സഖ്യം ചർച്ച ചെയ്ത് തീരുമാനിക്കും,” തേജസ്വി യാദവ് പറഞ്ഞു.

ALSO READ: ഓടിക്കൊണ്ടിരുന്ന ഓട്ടോയിലേക്ക് കുതിര ഇടിച്ചുകയറി അപകടം; യാത്രക്കാർക്കും ഡ്രൈവർക്കും പരുക്ക്

The Election Commission of India has removed 52 lakh names from Bihar's voter list during a revision exercise. This has sparked concerns, with the INDIA Alliance reportedly considering a boycott of the upcoming elections in response to the exclusions