തിരുവനന്തപുരം: സംസ്ഥാനത്തെ ജയിലുകളിലെ സുരക്ഷാ വീഴ്ചകൾ ചർച്ച ചെയ്യാൻ മുഖ്യമന്ത്രി അടിയന്തര യോഗം വിളിച്ചു. നാളെ രാവിലെ 11 മണിക്ക് ഓൺലൈൻ വഴിയാണ് യോഗം ചേരുക. പൊലിസ് മേധാവി, ജയിൽ മേധാവി, ആഭ്യന്തര സെക്രട്ടറി ഉൾപ്പെടെയുള്ള ഉന്നത ഉദ്യോഗസ്ഥർ യോഗത്തിൽ പങ്കെടുക്കും. 2011-ലെ സൗമ്യ ബലാത്സംഗ-കൊലപാതക കേസിലെ പ്രതി ഗോവിന്ദചാമിയുടെ കണ്ണൂർ സെൻട്രൽ ജയിലിൽ നിന്നുള്ള ജയിൽചാട്ടത്തിന്റെ പശ്ചാത്തലത്തിലാണ് ഈ നടപടി.

ഗോവിന്ദചാമിയുടെ രക്ഷപ്പെട്ടതുമായി സംബന്ധിച്ച വിവരങ്ങൾ മുഖ്യമന്ത്രിയുടെ ഓഫീസ് ആരാഞ്ഞിരുന്നു. വിഷയത്തിന്റെ ഗൗരവം കണക്കിലെടുത്താണ് അടിയന്തര യോഗം വിളിക്കാൻ തീരുമാനിച്ചത്. ജയിലുകളിലെ കാര്യക്ഷമതയും സുരക്ഷാ വീഴ്ചകളും യോഗത്തിൽ പ്രധാനമായി ചർച്ച ചെയ്യും. കഴിഞ്ഞ രണ്ട് വർഷത്തിനിടെ ജയിലുകളിലെ സുരക്ഷാ വീഴ്ചകൾ ഒന്നിലധികം തവണ റിപ്പോർട്ട് ചെയ്യപ്പെട്ടിരുന്നു. ഇതിന്റെ പശ്ചാത്തലത്തിൽ ജയിൽ മേധാവി കണ്ണൂരിലെത്തി യോഗം വിളിക്കാൻ തീരുമാനിച്ചിരുന്ന വേളയിലാണ് ഗോവിന്ദചാമി ജയിൽ ചാടിയത്.

ALSO READ: "അവനെ തൂക്കിലേറ്റണം, അല്ലെങ്കിൽ ഏത് അറയിൽ കൊണ്ടിട്ടാലും അവൻ ചാടും"; വികാരഭരിതയായി സൗമ്യയുടെ അമ്മ

കണ്ണൂർ സെൻട്രൽ ജയിലിൽ ഗുരുതരമായ സുരക്ഷാ വീഴ്ചയാണ് ഗോവിന്ദചാമിയുടെ രക്ഷപ്പെടലിലൂടെ തെളിഞ്ഞ് വരുന്നത്. വെള്ളിയാഴ്ച പുലർച്ചെ 1.15-നും 4.15-നും ഇടയിൽ ഗോവിന്ദചാമി അതീവ സുരക്ഷാ മേഖലയിലെ സെല്ലിൽ നിന്ന് രക്ഷപ്പെട്ടു. സിസിടിവി ദൃശ്യങ്ങൾ പ്രകാരം, ഇയാൾ സെല്ലിന്റെ ഇരുമ്പ് കമ്പികൾ മുറിച്ച്, വസ്ത്രങ്ങൾ കെട്ടി ഒരു കയർ ഉണ്ടാക്കി ജയിലിന്റെ 25 അടി ഉയരമുള്ള മതിൽ കയറി രക്ഷപ്പെട്ടതായി കണ്ടെത്തി. ജയിൽ അധികൃതർക്ക് ഇയാളുടെ അസാന്നിധ്യം രാവിലെ 5 മണിയോടെ മാത്രമാണ് മനസ്സിലായത്, തുടർന്ന് 7 മണിയോടെ കണ്ണൂർ ടൗൺ പൊലീസിനെ വിവരമറിയിക്കുകയായിരുന്നു.

ALSO READ: ഗോവിന്ദച്ചാമിയെ വിയ്യൂരിലേക്ക് മാറ്റും; കണ്ണൂരില്‍ തെളിവെടുപ്പ് തുടരുന്നു, ഉടന്‍ കോടതിയില്‍ ഹാജരാക്കും

ഒന്നര മാസത്തെ ആസൂത്രണത്തിലൂടെയാണ് സെല്ലിലെ കമ്പി മുറിച്ച് ഇയാൾ പുറത്തുകടന്നത്. എന്നാൽ, ഈ തയ്യാറെടുപ്പുകൾ ജയിൽ ഉദ്യോഗസ്ഥർക്ക് മനസിലായില്ല. സിസിടിവി ദൃശ്യങ്ങൾ നിരീക്ഷിക്കുന്നതിലും ഗുരുതര വീഴ്ച വന്നു. സംഭവത്തിൽ നാല് ഉദ്യോഗസ്ഥരെ അന്വേഷണ വിധേയമായി സസ്പെൻഡ് ചെയ്തിട്ടുണ്ട്. സംഭവത്തെക്കുറിച്ച് വിശദമായ അന്വേഷണം നടത്തുമെന്ന് ജയിൽ എഡിജിപി ബൽറാം കുമാർ ഉപാധ്യായ അറിയിച്ചു. കണ്ണൂർ തളാപ്പിലെ ആളൊഴിഞ്ഞ കെട്ടിടത്തിലെ കിണറ്റിൽ നിന്നാണ് ഗോവിന്ദചാമിയെ പൊലീസ് പിടികൂടിയത്. പ്രദേശവാസികളിൽ നിന്ന് ലഭിച്ച വിവരത്തിന്റെ അടിസ്ഥാനത്തിൽ നടത്തിയ തിരച്ചിലിലാണ് ഇയാളെ കണ്ടെത്തിയത്. കിണറ്റിൽ ചാടിയെങ്കിലും പൊലീസ് ഇയാളെ പുറത്തെടുത്തു. ജയിൽചാട്ടത്തിന് പുറത്ത് നിന്ന് സഹായം ലഭിച്ചിട്ടുണ്ടോ എന്നതും അന്വേഷിക്കുമെന്ന് എഡിജിപി വ്യക്തമാക്കി.

ALSO READ: കനത്ത മഴയും കാറ്റും: മധ്യകേരളത്തിൽ വൻ നാശനഷ്ടം; മൂന്ന് ജില്ലകളിലെ വിദ്യാഭ്യാസ സ്ഥാപനങ്ങൾക്ക് നാളെ അവധി

പൊലീസ് ചോദ്യം ചെയ്യലിൽ ഗോവിന്ദചാമി നടത്തിയ മാസങ്ങൾ നീണ്ട ആസൂത്രണമാണെന്ന് ബോധ്യമായി. സെല്ലിന്റെ കമ്പികൾ ഹാക്‌സോ ബ്ലേഡ്   ഉപയോഗിച്ചു മുറിക്കുകയും മുറിച്ച കമ്പികൾ ജയിൽ അധികൃതർക്ക് മനസിലാകാതിരിക്കാൻ ഇവയിൽ നൂൽ കെട്ടിവെച്ചു. ജയിൽ മോചിതരുടെ വസ്ത്രങ്ങൾ ശേഖരിച്ച് വെച്ച്, ജയിലിന്റെ വെള്ള വസ്ത്രം മാറ്റി. കുളിക്കാനുള്ള വെള്ളം ശേഖരിക്കുന്ന ടാങ്ക് വഴി ക്വാറന്റൈൻ ബ്ലോക്കിലെത്തി. പ്ലാസ്റ്റിക് ഡ്രമ്മിന് മുകളിൽ കയറി, ഫെൻസിങ് തൂണിൽ കുടുക്കിട്ട് പുറത്തുകടന്നു. ബ്ലേഡ് ജയിൽ അടുക്കളയിൽ ജോലി ചെയ്യുന്ന അന്തേവാസിയിൽ നിന്നാണ് ലഭിച്ചതെന്നും പ്രതി വെളിപ്പെടുത്തി. ശരീരഭാരം കുറയ്ക്കാൻ മാസങ്ങളോളം വ്യായാമം ചെയ്തു. ചോറ് ഒഴിവാക്കി, ഡോക്ടറുടെ നിർദേശപ്രകാരം ചപ്പാത്തി മാത്രം കഴിച്ചു. ശരീരഭാരം പകുതിയോളം കുറച്ചാണ് ഇയാൾ സെല്ലിലെ കമ്പികൾക്കിടയിലൂടെ പുറത്തുകടന്നത്. രക്ഷപ്പെടലിന് ജയിലിനുള്ളിൽ നിന്നോ പുറത്ത് നിന്നോ സഹായം ലഭിച്ചോ എന്നതടക്കം പൊലീസ് അന്വേഷിക്കും.

In response to notorious criminal Govindachami's escape from Kannur Central Jail, exposing serious security lapses, the Chief Minister has called an urgent meeting tomorrow at 11 AM. The online meeting, involving top officials like the Police Chief and Jail Superintendent, will address prison security and efficiency, following reports of repeated lapses over the past two years