ഗസ്സ: ഗസ്സയില്‍ പട്ടിണി മരണം രൂക്ഷമാകുന്നു. 2.72 കിലോ ഭാരത്തോടെ ജനിച്ച കുഞ്ഞ് പോഷകാഹാരക്കുറവു മൂലം 1.8 കിലോഗ്രാം തൂക്കമായി മരിച്ചു. കുഞ്ഞുങ്ങള്‍ എല്ലും തോലുമായി മരിക്കുന്ന ഇത്തരം നിരവധി ഹൃദയഭേദകമായ വാര്‍ത്തകളാണ് ഗസ്സയില്‍ നിന്ന് വരുന്നത്. അഞ്ചു മാസം പ്രായമായ ഇസ്‌റ അബു ഹാലിബിന്റെ കുഞ്ഞാണ് 1.8 കിലോയായി തൂക്കം കുറഞ്ഞ് മരിച്ചത്.

21 മാസമായി ഇസ്‌റാഈല്‍ ഗസ്സയിലേക്കുള്ള ഭക്ഷണ വിതരണം തടഞ്ഞിട്ട്. വെള്ളിയാഴ്ച അല്‍ നാസര്‍ ആശുപത്രിയിലെ പീഡിയാട്രിക് വകുപ്പില്‍ ചികിത്സ തേടിയെങ്കിലും കുഞ്ഞിനെ രക്ഷിക്കാനായില്ലെന്ന് സൈനബ് അബൂ ഹാലിബ് പറയുന്നു. ജനിക്കുമ്പോള്‍ മൂന്നു കിലോയ്ക്ക് അടുത്ത് തൂക്കമുള്ള കുഞ്ഞാണ് അഞ്ചു മാസമായപ്പോള്‍ പകുതിയോളം തൂക്കമായത്. ഗുരുതരമായ പട്ടിണിയാണ് കുഞ്ഞിന്റെ മരണത്തിന് കാരണമെന്ന് ഡോക്ടര്‍ പറയുന്നു.

ഗസ്സയില്‍ ഇതുവരെ 85 കുട്ടികള്‍ പട്ടിണിയെ തുടര്‍ന്ന് മരിച്ചിട്ടുണ്ട്. ആകെ മരിച്ചത് 127 പേരാണെന്നാണ് ഗസ്സ ആരോഗ്യ മന്ത്രാലയത്തിന്റെ കണക്ക്.

അതേസമയം, ഭക്ഷണം വാങ്ങാനെത്തിയപ്പോള്‍ ഇസ്‌റാഈല്‍ സൈനികരുടെ വെടിയേറ്റു കൊല്ലപ്പെട്ടവരുടെ എണ്ണം 1,132 ആയി. ഇന്നലെയും ഭക്ഷണ വിതരണ കേന്ദ്രത്തില്‍ 11 പേരെ വെടിവച്ചു കൊന്നു. 36 പേര്‍ക്കു പരുക്കേറ്റു. ഇതുവരെ പരുക്കേറ്റവരുടെ എണ്ണം 7,521 ആയി. കഴിഞ്ഞ 24 മണിക്കൂറിനിടെ പട്ടിണി കിടന്ന് മരിച്ചവര്‍ ആറു പേരാണ്. ഗസ്സ ആരോഗ്യ മന്ത്രാലയത്തിന്റെ കണക്ക് പ്രകാരമാണിത്. പട്ടിണിയെ തുടര്‍ന്ന് ഇതുവരെ മരിച്ചവരുടെ എണ്ണം 133 ആയി. ഇതില്‍ 87 പേരും കുട്ടികളാണ്. ആക്രമണം 10 മണിക്കൂര്‍ ദിവസം നിര്‍ത്തിവച്ചതോടെ കൂടുതല്‍ സഹായം അടുത്ത ദിവസങ്ങളില്‍ എത്തിക്കാനാകുമെന്ന് ജോര്‍ദാന്‍ പറഞ്ഞു. ജോര്‍ദാന്‍ എയര്‍ഫോഴ്‌സും യു.എന്‍ പദ്ധതിയായ വേള്‍ഡ് ഫുഡ് പ്രോഗാമും വേള്‍ഡ് സെന്‍ട്രല്‍ കിച്ചണും സംയുക്തമായാണ് സഹായം എത്തിക്കുക. ഗസ്സയില്‍ 2023 ഒക്ടോബര്‍ ഏഴ് മുതല്‍ ഇസ്‌റാഈല്‍ ആക്രമണത്തില്‍ ഇതുവരെ കൊല്ലപ്പെട്ടത് 59,821 പേരാണ്. 1.44 ലക്ഷം പേര്‍ക്ക് പരുക്കേറ്റിട്ടുണ്ട്.

ALSO READ: ഉത്തരേന്ത്യയില്‍ യാത്ര ചെയ്യുമ്പോള്‍ സഭാവസ്ത്രം ഉപേക്ഷിക്കാന്‍ നിര്‍ദേശം, നടപടി മലയാളി കന്യാസ്ത്രീകളുടെ അറസ്റ്റിന് പിന്നാലെ; മതസ്വാതന്ത്ര്യം അപകടത്തിലെന്ന് കെ.സി.ബി.സി

Five-month-old baby dies in mother’s arms in Gaza, a new victim of starvation crisis