ന്യൂഡൽഹി: ഇന്ത്യയിലെ ഏറ്റവും വലിയ ഐടി സേവന ദാതാക്കളായ ടാറ്റ കൺസൾട്ടൻസി സർവീസസ് (ടിസിഎസ്) ജീവനക്കാരുടെ രണ്ട് ശതമാനം പേരെ പിരിച്ചുവിടും. ഏകദേശം 12,000 ജീവനക്കാരെ പിരിച്ചുവിടൽ ബാധിക്കും. മിഡിൽ, സീനിയർ മാനേജ്‍മെന്റ് തലത്തിലുള്ള ജീവനക്കാരെയാകും  പിരിച്ചുവിടൽ ബാധിക്കുകയെന്ന് റോയിട്ടേഴ്‌സ് റിപ്പോർട്ട് ചെയ്തു.

ആറ് ലക്ഷത്തിലധികം വരുന്ന ജീവനക്കാർക്ക് വേതന വർദ്ധനവ് നൽകുക എന്നതാണ് കമ്പനിയുടെ 'മുൻ‌ഗണന' എന്ന് ടി‌സി‌എസ് പറഞ്ഞതിന് രണ്ടാഴ്ച കഴിഞ്ഞാണ് ഈ പുതിയ നീക്കം. 2025 ജൂൺ 30 ലെ കണക്കനുസരിച്ച് ടിസിഎസിന്റെ ജീവനക്കാരുടെ എണ്ണം 6,13,069 ആയിരുന്നു. കമ്പനിയുടെ വിവിധ പ്രവർത്തനങ്ങൾ ആർട്ടിഫിഷ്യൽ ഇന്റലിജൻസ് സംവിധാനത്തിലേക്ക് മാറ്റി ഭാവിക്ക് വേണ്ടി കൂടുതൽ ഒരുങ്ങാനുള്ള കമ്പനിയുടെ തന്ത്രത്തിന്റെ ഭാഗമാണ് ഈ കൂട്ടപിരിച്ചുവിടൽ എന്നാണ് സൂചന.

ഈ സാഹചര്യം നേരിടാൻ, ബാധിക്കപ്പെട്ട ജീവനക്കാർക്ക് ഉചിതമായ ആനുകൂല്യങ്ങൾ, സ്ഥലംമാറ്റം, കൗൺസിലിംഗ്, പിന്തുണ എന്നിവ ലഭിക്കുമെന്ന് ടിസിഎസ് അറിയിച്ചു. അതേസമയം, ടെക്കികൾക്ക് മുന്നറിയിപ്പ് നൽകുന്ന തീരുമാനമാണ്  ടാറ്റ കൺസൾട്ടൻസി സർവീസിന്റെ ഭാഗത്ത് നിന്നുണ്ടാകുന്നത്. 

എന്നാൽ ജീവനക്കാരുടെ എണ്ണം കുറയ്ക്കുന്നതിന് എഐയെ കുറ്റപ്പെടുത്തേണ്ടതില്ലെന്ന് ടിസിഎസ് ചീഫ് എക്സിക്യൂട്ടീവ് ഓഫീസറും മാനേജിംഗ് ഡയറക്ടറുമായ കെ. കൃതിവാസൻ മണികൺട്രോളിനോട് പറഞ്ഞു. ചെലവ് ചുരുക്കലോ ഓട്ടോമേഷനോ അല്ല, മറിച്ച് കമ്പനിയുടെ വികസിച്ചുകൊണ്ടിരിക്കുന്ന നൈപുണ്യ ആവശ്യകതകളുമായി പൊരുത്തപ്പെടാത്ത പ്രതിഭകളെ വീണ്ടും വിന്യസിക്കുന്നതിന്റെ വെല്ലുവിളികളാണ് പിരിച്ചുവിടലിന് കാരണമെന്ന് ടിസിഎസ് പറഞ്ഞു.

ഇന്ത്യയിലെ ഏറ്റവും വലിയ ഐടി കയറ്റുമതിക്കാരായ കമ്പനിയുടെ പ്രഖ്യാപനത്തിന് പിന്നാലെ ഓഹരിയിൽ ഇടിവ് രേഖപ്പെടുത്തി. ബിഎസ്ഇയിൽ ഓഹരി വില 1.7 ശതമാനം ഇടിഞ്ഞ് 3,081 രൂപയായി താഴ്ന്നു.