എടപ്പാള്‍: ആവശ്യത്തിനു ജീവനക്കാരില്ലാത്തതിനാല്‍ എടപ്പാള്‍ പോസ്റ്റ് ഓഫിസിലെത്തുന്നവര്‍ വലയുന്നു. വിവിധ ആവശ്യങ്ങള്‍ക്കായി എത്തുന്നവര്‍ കാത്തിരുന്നു മടുക്കുകയാണ്. ഈ പോസ്റ്റ് ഓഫിസിനു കീഴില്‍ പൊല്‍പ്പാക്കര, പെരുമ്പറമ്പ്, ശുകപുരം, ബിയ്യം, അയിലക്കാട് തുടങ്ങി അഞ്ചു ബ്രാഞ്ചുകളുണ്ട്. ഇവിടെ പോസ്റ്റ്മാസ്റ്ററടക്കം അഞ്ചുപേരുടെ തസ്തികയാണുള്ളത്.
എന്നാല്‍, ഇതില്‍ മൂന്നുപേര്‍  ദീര്‍ഘകാലത്തെ അവധിയിലാണ്. പകരം സംവിധാനമേര്‍പ്പെടുത്തണമെന്നു പലതവണ  ആവശ്യപ്പെട്ടിട്ടും നടപടിയായിട്ടില്ലെന്നു നാട്ടുകാര്‍ പറയുന്നു. നൂറുകണക്കിനു തപാല്‍, പാഴ്‌സല്‍ ഉരുപ്പടികള്‍ തരംതിരിക്കുന്നതും സ്റ്റാംപ് വിതരണം ചെയ്യുന്നതും പണം സ്വീകരിക്കുന്നതും തിരികെ നല്‍കുന്നതുമെല്ലാം പോസ്റ്റ് മാസ്റ്ററും ഒരു ജീവനക്കാരിയും ചേര്‍ന്നാണ്. ഇതിനിടയില്‍ ഇടക്കിടെ ഉണ്ടണ്ടാകുന്ന സര്‍വര്‍ തകരാറും പ്രവര്‍ത്തനങ്ങളെ സാരമായി ബാധിക്കുന്നുണ്ട്.