കോഴിക്കോട്ടുകാര്‍ക്ക് ഇനി, അല്ലെങ്കില്‍ കോഴിക്കോട് കുടുംബത്തോടും സുഹൃത്തുക്കള്‍ക്കുമൊപ്പം എത്തുന്നവര്‍ക്ക്  സമയം ചെലവിടാന്‍ പറ്റുന്ന ഒരു ഇടമുണ്ട് പേരാമ്പ്ര പട്ടണത്തില്‍. കോഴിക്കോടിന്റെ ഹൃദയത്തില്‍ അധികമാരും കാണാതെ ഒളിച്ചിരിക്കുന്ന ഒരിടമാണ് ചേര്‍മല.

ചേര്‍മലയില്‍ നരിമഞ്ച എന്നറിയപ്പെടുന്ന ഗുഹ സഞ്ചാരികളുടെ പ്രധാന ആകര്‍ഷണമോണ്.  ഗ്രാമപഞ്ചായത്തിലെ 16ാം വാര്‍ഡിലാണ് ചേര്‍മലയുള്ളത്. ഈ പ്രദേശത്തെ ഏറ്റവും ഉയരമുള്ള സ്ഥലമാണിത്.  കേരളത്തിലെ തന്നെ ഏറ്റവും വലുപ്പമുള്ള പ്രകൃതിദത്ത ഗുഹകളില്‍ ഒന്നുതന്നെയാണ് ഇവയും. 

പേരാമ്പ്ര ഹൈസ്‌കൂളിനടുത്ത് ചേര്‍മല കുന്നിന്‍മുകളില്‍ 2.10 ഏക്കര്‍ സ്ഥലത്താണ് ഓപ്പണ്‍ എയര്‍ തിയേറ്റര്‍ ഉള്‍പ്പെടുന്ന പാര്‍ക്ക് ഒരുങ്ങുന്നത്. ടൂറിസം വകുപ്പ് അനുവദിച്ച 3.72 കോടി രൂപയാണ് ഇതിന്റെ നിര്‍മാണച്ചെലവ്. 
 
സര്‍ക്കാരിന് കീഴിലുള്ള കേരള ഇലക്ട്രിക്കല്‍ ആന്‍ഡ് അലൈഡ് എന്‍ജിനിയറിങ് കമ്പനി ലിമിറ്റഡിനാണ് (കെല്‍) പ്രവൃത്തിയുടെ നടത്തിപ്പു ചുമതല. സെക്യൂരിറ്റി ക്യാബിന്‍, നടപ്പാതകള്‍, ടിക്കറ്റ് കൗണ്ടര്‍, ശൗചാലയം, കഫ്റ്റീരിയ, ഉത്പന്നവിപണന കേന്ദ്രം, സ്റ്റേജ്, ചുറ്റുമതില്‍ എന്നിവ ഇതിനോടകം നിര്‍മിച്ചു കഴിഞ്ഞിട്ടുണ്ട്.

എല്‍ഇഡി വിളക്കുകള്‍ സ്ഥാപിക്കല്‍, വൈദ്യുതീകരണം, പ്രവേശനകവാടത്തിന്റെ ജോലി എന്നിവ പുരോഗമിക്കുകയാണ്. പണി പൂര്‍ത്തിയാവുന്നതോടെ ചേര്‍മലയുടെ മുകളിലെത്തുന്നവരെ കാത്തിരിക്കുന്നത് അതിമനോഹരമായ കാഴ്ചകളാണ്. 
പുറത്തു നിന്നു വരുന്നവര്‍ക്കും പേരാമ്പ്രയിലെ ചേര്‍മല കേവ് പാര്‍ക്ക് അനുഗ്രഹമായിരിക്കും. അതിസുന്ദരിയായി നില്‍ക്കുന്ന പ്രകൃതിയെ നിങ്ങള്‍ക്കു കാണാവുന്നതാണ്. ഇവിടുത്തെ സായാഹ്നവും കാണേണ്ടതാണ്. 

പകല്‍കാലത്തിന്റെ രാജാവായി തിളങ്ങി അഗ്നിഗോളമായി ആകാശത്തു ജ്വലിക്കുന്ന സൂര്യന്റെ അസ്തമയവും കാണാം.
ആകാശക്കാഴ്ചകളും കുന്നിന്‍മുകളിലെ അതിവിശാലമായ പുല്‍മൈതാനവും നിങ്ങളെ ആകര്‍ഷിക്കുന്നതാണ്. ഇനി പുലര്‍കാലത്താണ് നിങ്ങള്‍ വരുന്നതെങ്കിലോ? മഞ്ഞു പുതച്ചു കിടക്കുന്ന മലകളും കാണാം.

പേരാമ്പ്ര ടൗണില്‍ നിന്ന് രണ്ടു കിലോമീറ്റര്‍ മാത്രം ദൂരം.

നിങ്ങള്‍ക്ക് വാഹനത്തില്‍ യാത്രചെയ്യാം. ഇവിടെ വിശാലമായ പാര്‍ക്കിങ് സൗകര്യവുമുണ്ട്.