തൃശൂര്‍:കഴിഞ്ഞ ലോക്‌സഭ തെരഞ്ഞെടുപ്പില്‍ തൃശൂര്‍ മണ്ഡലത്തിലെ വോട്ടര്‍പട്ടികയില്‍ ക്രമക്കേട് നടന്നതിന്റെ തെളിവുകള്‍ പുറത്ത്. പൂങ്കുന്നത്തെ ഫ്ലാറ്റില്‍ താമസക്കാര്‍ അറിയാതെ ചേര്‍ത്തത് ഒന്‍പത് വോട്ടുകള്‍. 

പൂങ്കുന്നത്തുള്ള ക്യാപിറ്റല്‍ വില്ലേജ് അപ്പാര്‍ട്ട്മെന്റ് രണ്ടാം ബ്ലോക്കിലെ 4 സി ഫ്ലാറ്റില്‍ താമസിക്കുന്ന പ്രസന്ന അശോകന്‍. കഴിഞ്ഞ നാലുവര്‍ഷമായി ഇവിടെയാണ് പ്രസന്ന അശോകന്‍ വാടകയ്ക്ക് താമസിക്കുന്നത്. ഇവിടെ താമസിക്കുന്നവരോ ഫ്ലാറ്റ് ഉടമസ്ഥരോ അറിയാത്ത ഒന്‍പത് വോട്ടുകളാണ് ഈ ഫ്ലാറ്റിന്റെ വിലാസത്തില്‍ ചേര്‍ത്തിട്ടുള്ളത്. വോട്ടര്‍മാരെ തങ്ങള്‍ക്ക് അറിയില്ലെന്ന് പ്രസന്ന പറയുന്നു.

എസ്.സുധീര്‍, സന്തോഷ് കുമാര്‍.എസ്, സജിത്ത് ബാബു.പി, സുഗേഷ്, ഹരിദാസന്‍, മനീഷ് എം.എസ്, മുഖാമിയമ്മ, സല്‍ജ.കെ, അജയകുമാര്‍ എന്നിവരുടെ വോട്ടുകളാണ് ഈ വിലാസത്തില്‍ ചേര്‍ത്തിരിക്കുന്നത്.

അതേസമയം തെളിവ് പുറത്ത് വന്നതിന്റെ അടിസ്ഥാനത്തില്‍ തെരഞ്ഞെടുപ്പ് കമ്മീഷന്‍ സ്വമേധയാ കേസെടുത്ത് അന്വേഷണം നടത്തണമെന്ന് ലോക്സഭാ തെരഞ്ഞെടുപ്പിലെ എല്‍ഡിഎഫ് സ്ഥാനാര്‍ത്ഥിയായ വിഎസ് സുനില്‍കുമാര്‍ ആവശ്യപ്പെട്ടു.

നഗരത്തില്‍ ഒഴിഞ്ഞു കിടക്കുന്ന ഫ്ലാറ്റുകള്‍ കേന്ദ്രീകരിച്ചും വീട്ടുടമസ്ഥര്‍ അറിയാതെ വിലാസം ഉപയോഗിച്ചും നിരവധി വോട്ടര്‍മാരെ ഇത്തരത്തില്‍ വോട്ടര്‍ പട്ടികയില്‍ കുത്തിക്കയറ്റിയിരുന്നു എന്ന ആക്ഷേപം തെരഞ്ഞെടുപ്പ് സമയത്ത് തന്നെ ഉയര്‍ന്നിരുന്നു.