2025 ഐപിഎല്ലിൽ പഞ്ചാബ് കിങ്സിനായി മിന്നും പ്രകടനം നടത്തി ശ്രദ്ധ നേടിയ താരമാണ് പ്രിയാൻഷ് ആര്യ. തന്റെ അരങ്ങേറ്റ ഐപിഎൽ സീസണിൽ തന്നെ 475 റൺസ് ആണ് താരം അടിച്ചെടുത്തത്. ഇപ്പോൾ തന്റെ മുന്നിലുള്ള പ്രധാന ലക്ഷ്യം എന്താണെന്ന് തുറന്നു പറഞ്ഞിരിക്കുകയാണ് പ്രിയാൻഷ് ആര്യ. ഭാവിയിൽ ഇന്ത്യൻ ടീമിനുവേണ്ടി കളിക്കാൻ ആഗ്രഹിക്കുന്നുണ്ടെന്നാണ് താരം വെളിപ്പെടുത്തിയത്. ടൈംസ് നൗവിന് നൽകിയ അഭിമുഖത്തിലാണ് പ്രിയാൻഷ് ആര്യ തന്റെ ലക്ഷ്യം തുറന്നുപറഞ്ഞത്.

"ഇന്ത്യയ്ക്കു വേണ്ടി കളിക്കാൻ ഞാൻ ആഗ്രഹിക്കുന്നു. ആ സ്വപ്നം ഇപ്പോഴും എന്റെ കൂടെയുണ്ട്. ഞാൻ ക്രിക്കറ്റിൽ ശ്രദ്ധ കേന്ദ്രീകരിക്കുന്നു. ഇപ്പോൾ എന്റെ ടീമിനു വേണ്ടി ഞാൻ നന്നായി കളിക്കുന്നുണ്ട്. അത് ഔട്ട് ഡൽഹി വാരിയേഴ്‌സാണ്. ഒരു ക്രിക്കറ്റ് താരമെന്ന നിലയിൽ എന്റെ വളർച്ചയെക്കുറിച്ച് കൂടുതൽ ചോദ്യങ്ങൾ ചോദിക്കുന്ന യുവാക്കളെ സഹായിക്കാൻ ഞാൻ ശ്രമിക്കാറുണ്ട്" പ്രിയാൻഷ് ആര്യ പറഞ്ഞു. 

2025 ഐപിഎല്ലിൽ ചെന്നൈ സൂപ്പർ കിങ്സിനെതിരെ പ്രിയാൻഷ് ആര്യ സെഞ്ച്വറി നേടിയും തിളങ്ങിയിരുന്നു. ചെന്നൈക്കെതിരെ പ്രിയാൻഷ് 42 പന്തിൽ ഏഴ് ഫോറും ഒൻപത് സിക്സുമടക്കം 103 റൺസ് ആണ് നേടിയത്. ഐപിഎൽ ചരിത്രത്തിൽ ഒരു ഇന്ത്യക്കാരന്റെ ഏറ്റവും വേ​ഗതയേറിയ രണ്ടാമത്തെ സെഞ്ച്വറി ആയിരുന്നു ഇത്. 39 പന്തിൽ നിന്നുമാണ് താരം സെഞ്ച്വറി പൂർത്തിയാക്കിയത്. 37 പന്തിൽ നിന്നും സെഞ്ച്വറി നേടിയ യുസഫ് പത്താനാണ് ഈ റെക്കോർഡിൽ ഒന്നാം സ്ഥാനത്തുള്ളത്. ഇതിനു പുറമെ ഒരു അൺക്യാപ് താരം നേടുന്ന ഏറ്റവും വേ​ഗതയേറിയ സെഞ്ച്വറി കൂടിയാണിത്.

അതേസമയം നിലവിൽ ഏഷ്യ കപ്പിനുള്ള തയ്യാറെടുപ്പിലാണ് ഇന്ത്യൻ ടീം. ഏഷ്യാ കപ്പിനുള്ള 15 അംഗ ഇന്ത്യൻ ടീമിനെ കഴിഞ്ഞ ദിവസമാണ് പ്രഖ്യാപിച്ചത്. ഇന്ത്യൻ ടെസ്റ്റ് ടീം ക്യാപ്റ്റൻ ശുഭ്മാൻ ഗിൽ ടി20 ടീമിന്റെ വൈസ് ക്യാപ്റ്റനായി ടീമിലെത്തി. സഞ്ജു സാംസൺ ടീമിൽ സ്ഥാനം നിലനിർത്തിയപ്പോൾ, ജസ്പ്രീത് ബുംറയും കുൽദീപ് യാദവും ടീമിൽ തിരിച്ചെത്തി. 

സെപ്റ്റംബർ 10ന് യുഎഇക്കെതിരെയാണ് ഏഷ്യ കപ്പിൽ ഇന്ത്യയുടെ ആദ്യ മത്സരം. ആരാധകർ ഏറെ പ്രതീക്ഷയോടെ കാത്തിരിക്കുന്ന ഇന്ത്യ-പാകിസ്ഥാൻ ഗ്രൂപ്പ് ഘട്ട മത്സരം സെപ്റ്റംബർ 14ന് നടക്കും. ഇന്ത്യ, പാകിസ്ഥാൻ, യുഎഇ, ഒമാൻ എന്നിവ ഉൾപ്പെടുന്നതാണ് എ ഗ്രൂപ്പ്.

Priyansh Arya is a player who gained attention for his brilliant performance for Punjab Kings in the 2025 IPL. Priyansh Arya has openly revealed what his main goal.