കൊച്ചി: കൺസ്യൂമർ ഫെഡ് സഹകരണ ഓണം വിപണി 26 മുതൽ സെപ്റ്റംബർ നാലു വരെ നടക്കുമെന്ന് കൺസ്യൂമർ ഫെഡ് ചെയർമാൻ പി.എം ഇസ്മയിൽ പറഞ്ഞു. സംസ്ഥാനതല ഉദ്ഘാടനം  26ന് വൈകിട്ട് അഞ്ചിന് തിരുവനന്തപുരത്ത് മുഖ്യമന്ത്രി പിണറായി വിജയൻ നിർവഹിക്കും. സഹകരണ മന്ത്രി വി.എൻ വാസവൻ അധ്യക്ഷനാകും. സംസ്ഥാനത്ത് ത്രിവേണി സ്‌റ്റോറുകളിലും സഹകരണ സംഘങ്ങളുടെ സ്‌റ്റോറുകളിലുമായി 1800 ഓണം വിപണികൾ പ്രവർത്തിക്കും. 13 ഇന നിത്യോപയോഗ സാധനങ്ങൾ  സർക്കാർ സബ്‌സിഡിയോടെ സപ്ലെയ്‌കോ നൽകുന്ന നിരക്കിൽ ഓണം വിപണിയിൽ വിൽപ്പന നടത്തും.

ഒരു കുടുംബത്തിനാവശ്യമായ അവശ്യ നിത്യോപയോഗ സാധനങ്ങൾ (നോൺസബ്‌സിഡി ഇനങ്ങൾ) പൊതു മാർക്കറ്റിനേക്കാൾ 10ശതമാനം മുതൽ 40ശതമാനം വരെ വിലക്കുറവിൽ ലഭ്യമാക്കും. ഓണസദ്യ ഒരുക്കുന്നതിനാവശ്യമായ പച്ചക്കറി ഉൾപ്പെടെയുള്ള എല്ലാ സാധനങ്ങളും ഒരു കുടക്കീഴിൽ ലഭിക്കും. 

വിപണന കേന്ദ്രങ്ങളിൽ തിരക്ക് ഒഴിവാക്കുന്നതിന് മുൻകൂർ കൂപ്പൺ നൽകും. സമയക്രമവും അനുവദിക്കും.  കേരളത്തിലെ സഹകരണ സ്ഥാപനങ്ങൾ നേരിട്ട് ഉൽപ്പാദിപ്പിക്കുന്ന 75 കോടി രൂപയുടെ വെളിച്ചെണ്ണ ഗുണനിലവാരം ഉറപ്പാക്കി വിപണികളിൽ എത്തിച്ചുകഴിഞ്ഞു. കൺസ്യൂമർ ഫെഡ് ഓണക്കാലത്ത് 300 കോടി രൂപയുടെ വിൽപ്പനയാണ് ലക്ഷ്യമിടുന്നത്. വൈസ് ചെയർമാൻ വി.കെ രാജൻ, എം.ഡി ആർ. ശിവകുമാർ, പർച്ചേസ് മാനേജർ കെ.കെ രൂപേഷ്  വാർത്താ സമ്മേളനത്തിൽ പങ്കെടുത്തു.